جيىندا استانا، تۇركىستان، شىمكەنت جانە اقتاۋ قالالارىندا ۇيىمداستىرىلاتىن بىرقاتار حالىقارالىق تۋرنيرلەرگە دايىندىق بارىسى قارالدى. اسىرەسە، سپورتشىلار مەن كورەرمەندەردىڭ قاۋىپسىزدىگىن قامتاماسىز ەتۋ، سپورت ينفراقۇرىلىمىنىڭ دايىندىعى، لوگيستيكا، مەديتسينالىق قىزمەت كورسەتۋ، شەتەلدىك دەلەگاتسيالاردى ورنالاستىرۋ، سونداي-اق ورتالىق جانە جەرگىلىكتى اتقارۋشى ورگاندار اراسىنداعى ۇيلەسىمدى ءوزارا ءىس-قيمىل ماسەلەلەرىنە ەرەكشە نازار اۋدارىلدى.

كەڭەس بارىسىندا قاتىسۋشىلار ەلوردادا وتەتىن بوچچادان الەم كۋبوگىنە دايىندىقتى تالقىلادى. اتالعان جارىسقا الەمنىڭ 25 ەلىنەن سپورتشىلار قاتىسادى. سونىمەن قاتار 16 ەلدەن شامامەن 350 سپورتشى باق سىنايتىن بايداركا مەن كانوەدە ەسكەك ەسۋدەن ازيا چەمپيوناتى، 1600-گە جۋىق سپورتشى قاتىساتىن تاەكۆوندودان (WT) حالىقارالىق تۋرنيرلەر، 15 ەلدەن شامامەن 250 سپورتشى جينالاتىن جەڭىل اتلەتيكادان XXXV عۇسمان قوسانوۆ مەموريالى، 50 ەلدەن 500-گە جۋىق سپورتشى بەلدەسەتىن كۋراشتان الەم چەمپيوناتى جانە 700 سپورتشى قاتىساتىن WKF كاراتەدەن ورتالىق ازيا چەمپيوناتىنا دايىندىق ماسەلەلەرى دە ءسوز بولدى.

تۋريزم جانە سپورت ءمينيسترىنىڭ ورىنباسارى سەرىك جاراسباەۆ حالىقارالىق جارىستاردى جوعارى دەڭگەيدە وتكىزۋدىڭ ماڭىزىن اتاپ ءوتىپ، مۇنداي ءىرى سپورتتىق ءىس-شارالار قازاقستاننىڭ حالىقارالىق سپورت ارەناسىنداعى بەدەلىن نىعايتۋعا، سپورت ينفراقۇرىلىمىن دامىتۋعا جانە بۇقارالىق سپورتتى كەڭىنەن ناسيحاتتاۋعا ىقپال ەتەتىنىن ايتتى.

كەزدەسۋ قورىتىندىسى بويىنشا جاۋاپتى مەملەكەتتىك ورگاندارعا، فەدەراتسيالارعا جانە جارىس ۇيىمداستىرۋشىلارىنا الداعى حالىقارالىق دودالارعا ساپالى ءارى ۋاقتىلى دايىندىقتى قامتاماسىز ەتۋ جونىندە ناقتى تاپسىرمالار بەرىلدى.

ءباسپاسوز قىزمەتى