ليتۆانىڭ ۆيلنيۋس قالاسىندا 37-ءشى حالىقارالىق بيولوگيا وليمپياداسى (International Biology Olympiad, IBO-2026) ءوز مارەسىنە جەتتى. 12-19 شىلدە ارالىعىندا وتكەن الەمدەگى ەڭ بەدەلدى زياتكەرلىك جارىستاردىڭ بىرىنە 84 ەلدەن 330-دان استام دارىندى جاس بيولوگ قاتىستى.
وليمپيادا بارىسىندا قاتىسۋشىلار كۇردەلى تەوريالىق تاپسىرمالارمەن قاتار، تەرەڭ ءبىلىم مەن زەرتتەۋشىلىك داعدىلاردى تالاپ ەتەتىن زەرتحانالىق تاجىريبەلەردى دە ءساتتى ورىندادى.
جارىس قورىتىندىسى بويىنشا قازاقستان قۇراماسى ءۇش كۇمىس جانە ءبىر قولا مەدال جەڭىپ الىپ، 1996 جىلى قول جەتكىزىلگەن ۇلتتىق قۇرامانىڭ حالىقارالىق بيولوگيا وليمپياداسىنداعى ۇزدىك ناتيجەسىن قايتالادى.
قازاقستان قۇراماسىنىڭ جۇلدەگەرلەرى:
قايىركەن ەرسۇلتان - پاۆلودار وبلىسىنداعى «ءبىلىم-يننوۆاتسيا» دارىندى ەر بالالارعا ارنالعان ليتسەي-ينتەرناتىنىڭ 11-سىنىپ وقۋشىسى;
ءاشىرحانوۆ ءاليحان - الماتى قالاسىنداعى «ءبىلىم-يننوۆاتسيا» مامانداندىرىلعان ليتسەي-ينتەرناتىنىڭ 9-سىنىپ وقۋشىسى;
جەلتوۆا سوفيا - الماتى قالاسى مەدەۋ اۋدانىنداعى NIS-ءتىڭ 11-سىنىپ وقۋشىسى;
مەجەنينا ەۆگەنيا - قاراعاندى قالاسىنداعى NIS-ءتىڭ 11-سىنىپ وقۋشىسى.
قۇراما كوماندانىڭ جەتەكشىلەرى مەن جاتتىقتىرۋشىلارى:
🔺لەيلا اسقاروۆا - MD, Nazarbayev University;
ء🔺ىلياس ساكىموۆ - «ءبىلىم-يننوۆاتسيا» حقق ادىسكەرى;
🔺كاميلا سادىقوۆا - Nazarbayev University زەرتحاناسىنىڭ ۇيلەستىرۋشىسى;
🔺دىنمۇحاممەد ورازباەۆ - استانا مەديتسينا ۋنيۆەرسيتەتىنىڭ ستۋدەنتى.
حالىقارالىق بيولوگيا وليمپياداسى 1990 جىلدان بەرى وتكىزىلىپ كەلەدى. قازاقستان بۇل وليمپياداعا 1994 جىلدان بەرى تۇراقتى قاتىسىپ كەلەدى. 2025 جىلى ۇلتتىق قۇراما ءتورت قولا مەدال جەڭىپ السا، 2026 جىلى 1996 جىلعى ۇزدىك ناتيجەنى قايتالاپ، قازاقستاندىق وقۋشىلاردىڭ الەمدىك دەڭگەيدەگى جوعارى دايارلىعىن تاعى ءبىر مارتە دالەلدەدى.
