ءتورت كۇنگە حالىقارالىق تەمىرجول تۋرى تۋريستەرگە ەجەلگى قالالاردىڭ اتموسفەراسىنا ەنىپ، ۇلى جىبەك جولىنىڭ ىزىمەن ساياحاتتاۋعا مۇمكىندىك بەرەدى. مارشرۋت تۇركىستان مەن تاشكەنتتىڭ باستى كورىكتى جەرلەرىن قامتيدى. تۋريستەرگە ىڭعايلى بولۋ ءۇشىن تۋر باعدارلاماسىندا گيد قىزمەتى، تاماقتانۋ، كولىك قىزمەتى جانە كىرۋ بيلەتتەرى قاراستىرىلعان. «بىرلەسكەن كۇش-جىگەردىڭ ناتيجەسىندە ەكى ەلدى بايلانىستىراتىن ەرەكشە تەمىرجول تۋرى ىسكە قوسىلماق. اتالعان تۋر ءبىزدىڭ ازاماتتارىمىز بەن ەلدەرىمىزدىڭ مادەني بايلىعى مەن تاريحي مۇراسىنا قىزىعۋشىلىق تانىتاتىن شەتەلدىك تۋريستەر ءۇشىن ىڭعايلى ءارى قولجەتىمدى بولماق. بۇل قازاقستان مەن وزبەكستان اراسىنداعى مادەني بايلانىستاردى نىعايتۋ مەن ءتۋريزمدى دامىتۋداعى ماڭىزدى قادام»، – دەپ اتاپ ءوتتى قر تۋريزم جانە سپورت ۆيتسە-ءمينيسترى ەرجان ەركىنباەۆ.

سونداي-اق ساياحاتشىلار ورتالىق ازيا اۋماعىنداعى ەڭ كونە قالالاردىڭ ءبىرى – وتىرار قالاسىمەن تانىسا الادى. تۋر باعدارلاماسىنا ارىستان-باب كەسەنەسىنە، «ازىرەت سۇلتان» تاريحي-مادەني قورىق-مۋزەيىنە، ورتالىق ازياداعى ءوز كەزەگىندە ەڭ ۇلكەن «كەرۋەن-ساراي» تۋريستىك كەشەنىنە بارۋ كىرەدى. تاشكەنتتەگى تۋر اياسىندا قالانىڭ تاريحي نىساندارىمەن عانا ەمەس، سونىمەن قاتار زاماناۋي دامۋىمەن دە تانىسۋعا بولادى.

حالىقارالىق تۋردى «Tau Komek Travel»، «تۇران قازاقستان ترەۆەل»، «Grand Soluxe Travel Company»، «SkyWay Travel»، «Kompas»، «KhanTuran Travel» كومپانيالارىمەن بىرلەسىپ «جولاۋشىلار تاسىمالى» اق ىسكە اسىرادى. ال «Kazakh Tourism» ۇك» اق مارشرۋتتىڭ حالىقارالىق دەڭگەيدە ناسيحاتتالۋىنا قولداۋ كورسەتەدi.