«بۇل ءورشىل مۇراتقا قول جەتكىزۋگە ابدەن بولادى. قازىردىڭ وزىندە قازاقستان قارقىندى دامىپ كەلە جاتقان پروگرەسسيۆتى مەملەكەت سانالادى. ءوز جاستارىمىز عانا ەمەس، ءتۇرلى ەلدەردىڭ، سونىڭ ىشىندە كورشى مەملەكەتتەردىڭ كوپتەگەن ازاماتتارى دا بولاشاعىن قازاقستانمەن بايلانىستىرعىسى كەلەدى. ءبىز حالىقارالىق ارەناداعى وسى ابىروي-بەدەلىمىزدى بىرتە-بىرتە نىعايتىپ، تالانتتار، جاڭاشىل يدەيالار مەن يننوۆاتسيالىق تەحنولوگيالار شوعىرلاناتىن ەلگە اينالۋىمىز كەرەك.

بۇگىن ءبارىمىز تۇتاس ەل بولىپ جاساپ جاتقان ءاربىر قادام، ءاربىر شەشىم قازاقستاننىڭ تاۋەلسىزدىگىن نىعايتىپ، كەلەشەگىن ايقىندايدى. بيلىك تە، سىزدەر دە، قۇرمەتتى ۇستازدار، ءبىر ماقسات جولىندا ەڭبەك ەتىپ كەلەمىز، بۇل – وسكەلەڭ ۇرپاقتىڭ اماندىعى جانە جارقىن بولاشاعى. سوندىقتان، ءبىز الداعى ۋاقىتتا دا مۇعالىم مارتەبەسىن كوتەرۋ ءۇشىن قاجەتتى جاعدايدىڭ ءبارىن جاسايمىز».

اقوردا.كز