اقتاۋ قالاسىندا ەرلى-زايىپتىلار Instagram, TikTok جانە Telegram جەلىلەرىندە 850 مىڭنان استام وقىرماندارى بولا تۇرا، اۋقىمدى ونلاين-لوتەرەيالار ۇيىمداستىرعان.

لوتەرەيا وپەراتورى رەتىندە تىركەلمەگەنىنە قاراماستان، ولار اۆتوكولىك، پاتەر جانە باسقا دا باعالى جۇلدەلەر ويناتقان.

قاتىسۋشىلار قۇنى 500-دەن 50 000 تەڭگەنى قۇرايتىن بيلەت (تسيفرلىق ءنومىر) ساتىپ الىپ وتىرعان.

تەرگەۋ مالىمەتتەرىنە سايكەس، بۇل لوتەرەيالارعا 1 800-دەن استام ازامات قاتىسقان.

زاڭسىز قىزمەت ناتيجەسىندە قىلمىستىق تابىس سوماسى 162 ميلليون تەڭگەدەن اسقانى انىقتالدى.

قازىرگى ۋاقىتتا كۇدىكتىلەردىڭ مۇلكى مەن بانك شوتتارىنا تىيىم سالىندى.

سوتقا دەيىنگى تەرگەۋ جالعاسۋدا.

قر قىلمىستىق-پروتسەستىك كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى.

قر قما ءباسپاسوز قىزمەتى