قۇرمەتتى جەرلەستەر، ۇستازدار، اتا-انالار جانە وقۋشىلار!

تاۋەلسىزدىك كۇنى قارساڭىندا سىزدەردى كوپتەن كۇتكەن قۋانىش – ونەر مەكتەبىنىڭ جاڭا عيماراتىنىڭ اشىلۋىمەن قۇتتىقتاۋعا رۇقسات ەتىڭىزدەر!

مەملەكەت باسشىسى ق.ق.توقاەۆتىڭ تاپسىرماسى بويىنشا ءبىز ءاربىر وقۋشىنىڭ جان-جاقتى دامۋىنا قولايلى جاعداي جاساۋىمىز كەرەك. 

بۇل اقتوبە وبلىسىندا سالىنعان العاشقى ونەر مەكتەبى. جاڭا عيمارات 150 ورىنعا ەسەپتەلگەن. مۇندا قوسىمشا ءبىلىم بەرۋدىڭ 5 باعىتى بويىنشا 550-گە جۋىق بالا ءبىلىم الاتىن بولادى. قارعالى ونەر مەكتەبى بالالار شىعارماشىلىعىن كەڭىنەن ناسيحاتتاۋدا كوپتەگەن جۇمىستار اتقارىپ جۇرگەن يۋنەسكو كلۋبىنىڭ مۇشەسى رەتىندە تانىمال.جاڭا ونەر مەكتەبىنىڭ قابىرعالارى ۇزاق جىلدار بويى بالالاردىڭ، سىڭعىرلاعان داۋىستارىنا، اسەم اۋەندەرىنە جانە جاڭا تالانتتاردىڭ نۇرىنا تولىپ تۇرۋىن شىن جۇرەكتەن تىلەيمىن! - دەلىنگەن قۇتتىقتاۋ جازبادا. 

ايتا كەتۋ كەرەك، PISA زەرتتەۋلەرىنە سايكەس، ونەر مەن شىعارماشىلىق باعىتىنداعى قوسىمشا ءبىلىم وقۋشىلاردىڭ شىعارماشىلىق ويلاۋىن، ەموتسيونالدى ينتەللەكتىن، سىني جانە ەستەتيكالىق تالعامىن دامىتىپ، ءوزىن-ءوزى كورسەتۋىنە مۇمكىندىك بەرەدى. سونىمەن قاتار، بۇل باعىت اكادەميالىق جەتىستىكتەرگە وڭ اسەر ەتىپ، زەيىن قويۋ، تاباندىلىق جانە ءبىر ءىستى سوڭىنا دەيىن جەتكىزۋ داعدىلارىن قالىپتاستىرادى. شىعارماشىلىق ساباقتار توپتىق جۇمىستار ارقىلى الەۋمەتتىك بايلانىستاردى نىعايتىپ، مادەني مۇرا مەن ونەر تۋىندىلارىن باعالاۋدى ۇيرەتەدى. PISA مالىمەتتەرى بويىنشا، شىعارماشىلىق باعىتتاعى قوسىمشا بىلىمگە قاتىساتىن وقۋشىلاردىڭ ومىرگە قاناعاتتانۋشىلىق دەڭگەيى جوعارىراق جانە بولاشاق كاسىبي ومىردە تابىستى بولۋعا بەيىم كەلەدى.