جۇمىس ساپارى بارىسىندا پرەمەر-ءمينيستردىڭ ورىنباسارى قانات بوزىمباەۆ سەرگەەۆ سۋ قويماسىنىڭ، ۋششەۆ بوگەتىنىڭ جانە پەتروپاۆل گيدروتورابىنىڭ تەحنيكالىق جاعدايىمەن تانىسىپ، ەسىل وزەنى بويىنداعى ەلدى مەكەندەردى اۋەدەن شولىپ ءوتتى: نيكولاەۆكا، پوكروۆكا، چيريكوۆكا، سەميپالاتنوە، بوگوليۋبوۆو، بەسكول، پريبرەجنوە، كوجەۆەننىي، پودگورا، زارەچنىي، ولشانكا، سوكولوۆكا، بولشايا مالىشكا.

ۆيتسە-پرەمەر م. جۇماباەۆ اۋدانىنىڭ بۋلاەۆو قالاسىندا ورمان ءورت ءسوندىرۋ ستانتسياسىنىڭ جۇمىسىمەن تانىستى. ودان كەيىن تەپليچنوە جانە پريبرەجنوە اۋىلدارىنا بارىپ، قورعانىس بوگەتتەرىن تەكسەردى.

وبلىس اكىمدىگىنىڭ مالىمەتىنشە، سۋ تاسقىنى قاۋپى بار 112 ەلدى مەكەن باقىلاۋدا. ولاردىڭ قاۋىپسىزدىگىن جالپى ۇزىندىعى 105,4 كم بولاتىن 60 بوگەت قامتاماسىز ەتەدى. پەتروپاۆل قالاسىندا ەكى بوگەتتى قايتا جاڭعىرتۋ جۇمىستارى اياقتالدى (كوجەۆەننىي كەنتى، ۋششەۆ كوشەسى). قىزىلجار اۋدانىندا بيوپرۋد جانە جالپى ۇزىندىعى 24,4 كم بولاتىن ءۇش بوگەت بويىنشا جوبالار اياقتالۋعا جاقىن. ۇكىمەت قولداۋىمەن پريبرەجنوە جانە تەپليچنوە اۋىلدارىندا تەمىربەتون جابىندىسىن توسەۋ ارقىلى قورعانىس بوگەتىن قايتا جاڭعىرتۋدىڭ نەگىزگى جۇمىستارى اياقتالدى. قازىرگى ۋاقىتتا اباتتاندىرۋ جۇمىستارى جۇرگىزىلۋدە. بولشايا مالىشكا اۋىلىندا ۇزىندىعى 3,9 كم بولاتىن جەر بىلىگى سالىندى جانە قوسىمشا نىعايتىلدى. پريبرەجنوە اۋىلىنا اپاراتىن ۇزىندىعى 2,1 كم جولدى قايتا جاڭعىرتۋ جانە كوپىر سالۋ جۇمىستارى باستالدى، سوكولوۆكا اۋىلى ماڭىندا ەسىل وزەنىنىڭ ارناسى تۇزەتىلدى. زارەچنىي كەنتى تۇرعىندارىن جوسپارلى تۇردە كوشىرۋ جالعاسۋدا – 90 وتباسى جاڭا تۇرعىن ۇيمەن قامتاماسىز ەتىلدى. مامىر ايىندا 72 پاتەرلى تۇرعىن ءۇي قۇرىلىسى اياقتالادى، بيىل تاعى ءبىر وسىنداي ءۇيدىڭ قۇرىلىسى باستالادى.

جوعارى تاۋەكەل ايماعىندا عابيت مۇسىرەپوۆ اتىنداعى، شال اقىن، ەسىل، قىزىلجار اۋداندارى جانە پەتروپاۆل قالاسى قالىپ وتىر. قازىرگى ۋاقىتتا سۋ تاسقىنىنىڭ ەكىنشى تولقىنىنىڭ شارىقتاۋ شەگى ع. مۇسىرەپوۆ جانە شال اقىن اۋداندارىندا وتۋدە، ال پەتروپاۆل قالاسىندا 30 ءساۋىر-2 مامىر ارالىعىندا بولجانىپ وتىر.

مۇز كەپتەلىستەرىنىڭ الدىن الۋ ماقساتىندا 24 مىڭ شارشى مەتردەن استام اۋماقتا جارىلىس جۇمىستارى جۇرگىزىلدى. 23,6 مىڭ توننا ينەرتتى ماتەريال جانە 549 مىڭ قاپ دايىندالدى. 2 223 ادامنان، 1428 تەحنيكادان، 476 سۋ سورعىش جانە 120 ءجۇزۋ قۇرالىنان تۇراتىن كۇشتەر مەن قۇرالدار دايىن. جالپى سىيىمدىلىعى 15,5 مىڭ ادامعا ارنالعان 283 ۋاقىتشا ورنالاستىرۋ پۋنكتى ازىرلەندى.

سۋ رەجيمىنە تاۋلىك بويى مونيتورينگ 27 گيدرولوگيالىق بەكەت ارقىلى جۇرگىزىلۋدە. وبلىستىڭ نەگىزگى سۋ ارتەرياسى – ەسىل وزەنى 12 گيدروبەكەت ارقىلى باقىلاۋدا. 24 ساۋىردەگى جاعداي بويىنشا سەرگەەۆ سۋ قويماسىنىڭ تولىمدىلىعى 120,58% (كولەمى 835,6 ملن تەكشە مەتر). سۋ دەڭگەيى – 139,16 سم، تاسۋ دەڭگەيى – 116 سم (تاۋلىگىنە +12 سم). پەتروپاۆل گيدروتورابىنداعى سۋ دەڭگەيى 93,08 سم (تاۋلىگىنە -12 سم).

بۇگىنگى كۇنگە دەيىن تۇرعىن ۇيلەردى سۋ باسۋ دەرەكتەرى تىركەلگەن جوق. سۋ تاسقىنى كەزەڭى باستالعالى بەرى رەسپۋبليكالىق، وبلىستىق جانە اۋداندىق ماڭىزى بار اۆتوموبيل جولدارىندا 4 سۋ اسۋ فاكتىسى تىركەلدى، الايدا ەلدى مەكەندەرگە قاۋىپ تونگەن جوق.

وڭىردەگى احۋال تۇراقتى باقىلاۋدا، بارلىق قىزمەتتەر ءوزارا ۇيلەسىمدى جۇمىس ىستەپ جاتىر. قابىلدانعان ساقتىق شارالارى تۇرعىنداردىڭ قاۋىپسىزدىگىن جانە سۋ تاسقىنى كەزەڭىنىڭ بىرقالىپتى ءوتۋىن قامتاماسىز ەتۋدە. سۋ تاسقىنى كەزەڭى مامىر ايىنىڭ باسىنا قاراي قالىپتى دەڭگەيدە اياقتالادى دەپ كۇتىلۋدە.