الدىن الۋ شارالارىن وتكىزۋ بارىسىندا پوليتسيا قىزمەتكەرلەرى قالاداعى ساۋدا ويىن-ساۋىق ورتالىقتارىنىڭ بىرىندە تەرمينال جانىندا تۇرىپ، ءبىر ۋاقىتتا تەلەفونمەن سويلەسىپ تۇرعان ەر ادامدى بايقايدى. ەر ادامنىڭ دەرەكتەردى ەنگىزۋ كەزىندە ۋايىمداپ، اسىعىس ارەكەت ەتۋى كۇمان تۋدىرعان. پوليتسەيلەر ارالاسىپ، تەلەفوننىڭ ار جاعىندا الاياقتار بولۋى مۇمكىن ەكەنىن تۇسىندىرۋگە تىرىسقان. الايدا ەر ادام اقشانى اۋدارۋعا تابانداپ تۇرىپ العان. تەلەفون تۇتقاسىنداعى ءوزىن "تامارا" دەپ تانىستىرعان ايەل وعان ەشكىمدى تىڭداماۋعا كەڭەس بەرىپ، بىرنەشە مينۋتتان كەيىن "قىزى" مەن "ۇلى" دا اڭگىمەگە قوسىلعان. كەيىن بەلگىلى بولعانداي، بىرنەشە كۇن بويى الاياقتار ەر ادامعا تەلەفون شالىپ، وزدەرىن پوليتسيا قىزمەتكەرلەرى رەتىندە تانىستىرىپ، ونىڭ جيناقتارى قاۋىپتە ەكەنىن ايتىپ سەندىرگەن. اقشانى "قۇتقارۋ" ءۇشىن وعان دەپوزيتتەن قاراجاتتى شەشىپ، "قاۋىپسىز" ەسەپشوتقا اۋدارۋ كەرەك بولعان. پوليتسيا قىزمەتكەرلەرىنىڭ دەر كەزىندە ارەكەت ەتۋىنىڭ ارقاسىندا 1,3 ميلليون تەڭگەنىڭ اۋدارىلۋىنا جول بەرىلمەدى. تەلەفون جانە ينتەرنەت ارقىلى جاسالاتىن الاياقتىقتىڭ، اسىرەسە زەينەتكەرلەرگە باعىتتالعان قىلمىستاردىڭ كوبەيۋىنە بايلانىستى باتىس قازاقستان وبلىسىندا پوليتسيا جانە جەكە كۇزەت قىزمەتكەرلەرى بانكوماتتار ماڭىندا جانە حالىق كوپ جينالاتىن ورىنداردا — ەڭ الدىمەن ساۋدا ويىن-ساۋىق ورتالىقتارىندا — الدىن الۋ شارالارىن جۇرگىزۋدە. ماقسات — "تاۋەكەل ايماعىندا" جەدەل ارەكەت ەتۋ، الاياقتارعا اقشا اۋدارۋدىڭ الدىن الۋ جانە حالىقتىڭ حاباردارلىعىن ارتتىرۋ. پوليتسيا ەسكەرتەدى: قۇقىق قورعاۋ ورگاندارىنىڭ ناعىز قىزمەتكەرلەرى ەشقاشان اقشا اۋدارۋدى تالاپ ەتپەيدى. كۇمان تۋدىراتىن كەز كەلگەن قوڭىراۋ كەزىندە بىردەن “102” نومىرىنە حابارلاسۋىڭىزدى سۇرايمىز.

اقپارات كوزى Polisia.kz سايتىندا