سوڭعى جىلدارى قىلمىستىق جولمەن الىنعان تابىستاردى زاڭداستىرۋ سحەمالارىندا زاڭسىز كريپتوايىرباستاۋشىلار ماڭىزدى ءرول اتقارادى، ولار كريپتوۆاليۋتانى فياتتىق ۆاليۋتالارعا جانە كەرىسىنشە كونۆەرتاتسيالاۋعا مۇمكىندىك بەرەدى.

مۇنداي قۇرىلىمدار ءوز كليەنتتەرىن سايكەستەندىرمەيدى جانە كۇدىكتى وپەراتسيالاردى انىقتامايدى. سوندىقتان، ولاردىڭ قىزمەتتەرىن كوبىنە كيبەرالاياقتار مەن ەسىرتكى زاتتارىن وتكىزۋشىلەر پايدالانادى.

2024 جىلى جالپى اينالىمى 60 ملرد تەڭگەنى قۇرايتىن 36 زاڭسىز كريپتو ايىرباستاۋ پۋنكتى جويىلدى. 4,8 ملن USDT (شامامەن 2,5 ملرد تەڭگە) سوماسىنا اكتيۆتەر بۇعاتتالىپ، تاركىلەندى.

ۇلتتىق قاۋىپسىزدىك كوميتەتىمەن، مادەنيەت جانە اقپارات مينيسترلىگىمەن بىرلەسىپ جۇرگىزگەن جۇمىس ناتيجەسىندە 3,5 مىڭنان استام زاڭسىز ونلاين كريپتوايىرباستاۋ قىزمەتى بۇعاتتالدى.

ينۆەستيتسيالار تارتۋ ءۇشىن كريپتوۆاليۋتانى پايدالانعان ەكى قارجىلىق پيراميدا اشكەرەلەندى. 545 مىڭ USDT قايتارىلدى جانە 120 مىڭ USDT بۇعاتتالدى.

قارجىلىق مونيتورينگ اگەنتتىگى كريپتوترانزاكتسيالارعا باقىلاۋدى كۇشەيتۋ جانە ولاردىڭ قىلمىستىق ماقساتتاردا قولدانىلۋىنا قارسى كۇرەس جۇرگىزۋدە حالىقارالىق ارىپتەستەرمەن جۇمىستى جالعاستىرۋدا.

اقشا جىمقىرۋ سالاسىنداعى بۇزۋشىلىقتار ءۇشىن تسيفرلىق اكتيۆتەر پروۆايدەرلەرىنە جاۋاپكەرشىلىك جۇكتەيتىن زاڭنامالىق تۇزەتۋلەر ازىرلەندى.

قارجى ۇيىمدارىنداعى كريپتوۆاليۋتا وپەراتسيالارىن تەكسەرۋ كۇشەيتىلدى.

قارجىلىق مونيتورينگ اگەنتتىگى قىلمىستىق سحەمالارعا قارسى كۇرەسۋ ماقساتىندا قارجىلىق وپەراتسيالارعا ءتيىمدى باقىلاۋ قۇرالدارىن جەتىلدىرۋدى جالعاستىراتىن بولادى.

فوتو اشىق دەرەككوزدەردەن الىندى