ەلىمىزدىڭ وڭىرلەرىندەگى وبلىستىق اۋرۋحانالاردى اۋقىمدى جاڭعىرتۋ باعدارلاماسى شەڭبەرىندە سۇرانىسقا يە تەراپيالىق باعىتتار بويىنشا 23 جاڭا بولىمشە اشىلدى.

جاڭا بولىمشەلەر ەرەسەكتەر مەن بالالاردىڭ اراسىندا قاجەتتىلىگى جوعارى مەديتسينالىق باعىتتار بويىنشا قۇرىلدى. ولار: رەۆماتولوگيا، پۋلمونولوگيا، گاستروەنتەرولوگيا، ەندوكرينولوگيا، گەماتولوگيا، نەفرولوگيا جانە كارديولوگيا.

جوبا 2024–2030 جىلدارعا ارنالعان دەنساۋلىق ساقتاۋ ينفراقۇرىلىمىن دامىتۋ تۇجىرىمداماسى شەڭبەرىندە جۇزەگە اسىرىلىپ، ءوڭىر تۇرعىندارى ءۇشىن مامانداندىرىلعان مەديتسينالىق كومەكتىڭ قولجەتىمدىلىگىن ارتتىرۋعا باعىتتالعان.

جالپى العاندا، ماستەر-جوسپارلارعا سايكەس ەلىمىزدەگى 19 وبلىستىق كوپبەيىندى اۋرۋحانادا، 15 وبلىستىق بالالار اۋرۋحاناسىندا جانە 19 پەريناتالدىق ورتالىقتا 2700 توسەككە ارنالعان 55 جاڭا بولىمشە اشۋ كوزدەلگەن.

بۇگىنگى كۇنى ولاردىڭ ىشىندە: 7 رەۆماتولوگيا بولىمشەسى; 4 پۋلمونولوگيا بولىمشەسى; 6 گاستروەنتەرولوگيا بولىمشەسى; 2 گەماتولوگيا بولىمشەسى; 3 ەندوكرينولوگيا بولىمشەسى; 2 نەفرولوگيا بولىمشەسى; 2 كارديولوگيا بولىمشەسى اشىلدى.

وبلىستىق بالالار اۋرۋحانالارىندا 302 توسەككە ارنالعان 22 بولىمشە اشۋ جوسپارلانعان. ونىڭ ىشىندە قازىردىڭ وزىندە 168 توسەككە ارنالعان 9 بولىمشە پايدالانۋعا بەرىلدى.

سونىمەن قاتار پۋلمونولوگيالىق، نەۆرولوگيالىق، وتورينولارينگولوگيالىق، وڭالتۋ، تراۆماتولوگيالىق جانە پاللياتيۆتىك كومەكتى كەڭەيتۋ كوزدەلگەن.

2026 جىلدىڭ 1-ءشى توقسانىنىڭ قورىتىندىسى بويىنشا ەلىمىزدىڭ وبلىستىق جانە قالالىق ستاتسيونارلارىندا 59 895 پاتسيەنت ەم قابىلدادى. بۇل رەتتە وبلىستىق دەڭگەيدەگى ستاتسيونارلاردا ەمدەلگەن پاتسيەنتتەر سانى وتكەن جىلدىڭ سايكەس كەزەڭىمەن سالىستىرعاندا 1 337 ادامعا ارتتى.

دەنساۋلىق ساقتاۋ مينيسترلىگى 2026 جىلدىڭ باسىنان باستاپ وبلىستىق اۋرۋحانالاردى جاڭعىرتۋ باعدارلاماسىن قابىلداپ، ىسكە اسىرۋدا. بۇل باعدارلاما دەنساۋلىق ساقتاۋ جۇيەسىن كەشەندى جاڭعىرتۋدىڭ ءبىر بولىگى بولىپ تابىلادى جانە ەلىمىزدىڭ بارلىق وڭىرلەرىنىڭ تۇرعىندارىنا ساپالى، قاۋىپسىز ءارى قولجەتىمدى مامانداندىرىلعان مەديتسينالىق كومەك كورسەتەتىن زاماناۋي مەديتسينالىق ۇيىمدار جەلىسىن قالىپتاستىرۋعا باعىتتالعان.