قازاقستان پرەمەر-ءمينيسترى ولجاس بەكتەنوۆ قارجى، ۇلتتىق ەكونوميكا مينيسترلىكتەرى جانە «اتامەكەن» ۇلتتىق كاسىپكەرلەر پالاتاسى باسشىلىعىنىڭ قاتىسۋىمەن كاسىپكەرلىكتى دامىتۋ ماسەلەلەرى جونىندە كەڭەس وتكىزدى.
جيىندا كاسىپكەرلىك سالاسىنداعى قازىرگى جاعداي، سالىق رەفورماسىنىڭ الدىن الا ناتيجەلەرى جانە بيزنەس سۋبەكتىلەرىنىڭ قىزمەتىن ءادىل رەتتەۋدى قامتاماسىز ەتۋ شارالارى قارالدى. سونداي-اق ىسكەرلىك بەلسەندىلىككە، سالالىق جانە وڭىرلىك كورسەتكىشتەرگە نازار اۋدارىلدى.
قارجى ءمينيسترى ءمادي تاكيەۆتىڭ بايانداۋىنشا، ءى جارتىجىلدىق قورىتىندىسى بويىنشا رەسپۋبليكالىق بيۋدجەتكە كورپوراتيۆتىك تابىس سالىعىنان تۇسەتىن تۇسىمدەر 15,7%-عا ارتقان. سالالار اراسىندا وڭ سەرپىن اسىرەسە قارجى سەكتورىندا جانە وڭدەۋ ونەركاسىبىندە بايقالادى.
سونداي-اق ءبىرىنشى جارتىجىلدىق قورىتىندىسى بويىنشا شاعىن جانە ورتا بيزنەس سۋبەكتىلەرىنىڭ سانى شامامەن 550 مىڭعا ارتتى. قارجى مينيسترلىگىنىڭ دەرەكتەرىنە سايكەس، بۇل كورسەتكىش ءوزىن-ءوزى جۇمىسپەن قامتىعان ازاماتتاردىڭ قىزمەتىن زاڭداستىرۋ جۇمىستارىنىڭ ناتيجەسىندە قالىپتاستى. بۇل رەتتە ءوزىن-ءوزى جۇمىسپەن قامتىعاندار تەك الەۋمەتتىك تولەمدەردى جۇزەگە اسىرا وتىرىپ، سالىق تولەۋدەن بوساتىلادى. سونىمەن قاتار جالدانبالى جۇمىسكەرلەرى جوق 260 مىڭعا جۋىق شاعىن جانە ورتا بيزنەس سۋبەكتىسى ءوز قىزمەتىن توقتاتقان، بۇل بيزنەستىڭ جاساندى تۇردە «بولشەكتەۋ» تاجىريبەسىنىڭ ايتارلىقتاي قىسقارعانىن كورسەتەدى.
سونىمەن قاتار سالىق كودەكسىنە ەنگىزىلگەن وزگەرىستەردى ەسكەرە وتىرىپ، 2026 جىلعى 1 قاڭتاردان باستاپ كورپوراتيۆتىك تابىس سالىعى بويىنشا اۆانستىق تولەمدەردى تولەۋ شەگى 325 مىڭ اەك-تەن (1,4 ملرد تەڭگە) 600 مىڭ اەك-كە (2,6 ملرد تەڭگە) دەيىن كوتەرىلدى. ناتيجەسىندە جاڭا تالاپتارعا سايكەس كەلەتىن كاسىپورىندار كورپوراتيۆتىك تابىس سالىعى بويىنشا تۇپكىلىكتى ەسەپ ايىرىسۋدى جىلىنا ءبىر رەت جۇرگىزەدى. وسىعان بايلانىستى 2026 جىلدىڭ قورىتىندىسى بويىنشا تۇسەتىن ءتيىستى تۇسىمدەر 2027 جىلدىڭ بيۋدجەتىندە كورسەتىلەدى (بۇعان دەيىن ولار ەسەپتى جىل ىشىندە اي سايىن ءتۇسىپ وتىرعان). بۇل بيزنەسكە ەسەپتىلىك كولەمىن قىسقارتۋعا جانە اينالىم قاراجاتىن ساقتاپ قالۋعا مۇمكىندىك بەرەدى.
«اتامەكەن» ۇكپ توراعاسى قانات شارلاپاەۆ بيزنەسكە قاتىستى بىرقاتار ماسەلەنى كوتەرىپ، ىسكەر قوعامداستىق اتىنان ۇسىنىستار ايتتى. سونداي-اق ۇلتتىق ەكونوميكا ءبىرىنشى ۆيتسە-ءمينيسترى ازامات ءامرين پىكىر ءبىلدىردى.
تالقىلاۋ قورىتىندىسى بويىنشا ولجاس بەكتەنوۆ ەكونوميكانىڭ تۇراقتى ءوسىمىن قامتاماسىز ەتۋ جونىندەگى ورتاق ماقساتقا قول جەتكىزۋ ءۇشىن مەملەكەت پەن بيزنەس اراسىنداعى ءوزارا ءىس-قيمىلدىڭ تيىمدىلىگىن ارتتىرۋ ماقساتىندا ىنتىماقتاستىقتى جالعاستىرۋدى تاپسىردى. قارجى جانە ۇلتتىق ەكونوميكا مينيسترلىكتەرىنە «اتامەكەن» ۇكپ-مەن بىرلەسىپ، كاسىپكەرلىك سەكتوردىڭ جاي-كۇيىنە سالالىق جانە وڭىرلىك بولىنىستە كەشەندى تالداۋدى اي سايىن جۇرگىزىپ، ونىڭ ناتيجەلەرى بويىنشا ءتيىستى اقپاراتتى ەنگىزىپ وتىرۋ تاپسىرىلدى.
