مەملەكەت باسشىسىنىڭ ارنايى تاپسىرماسىمەن پرەمەر-مينيستر ولجاس بەكتەنوۆ جانە پرەزيدەنت اكىمشىلىگىنىڭ باسشىسى رومان سكليار الماتى وبلىسى ءماسليحاتتارى دەپۋتاتتارىنىڭ وتىرىسىنا قاتىستى.
رومان سكليار دەپۋتاتتارعا پرەزيدەنت قاسىم-جومارت توقاەۆتىڭ الماتى وبلىسىنىڭ اكىمى لاۋازىمىنا ەكى كانديداتتى: بۇرىنعى توتەنشە جاعدايلار ءمينيسترى شىڭعىس ءارىنوۆ پەن الماتى وبلىسى اكىمىنىڭ ورىنباسارى عاني مايلىباەۆتى ۇسىنۋ تۋرالى حاتىن وقىدى.
جيىنعا 178 دەپۋتات قاتىستى. اشىق داۋىس بەرۋ قورىتىندىسى بويىنشا شىڭعىس ءارىنوۆتىڭ كانديداتۋراسىن دەپۋتاتتاردىڭ 83%-ى قولدادى.
قازاقستان رەسپۋبليكاسى پرەزيدەنتىنىڭ ءتيىستى جارلىعىمەن شىڭعىس ءارىنوۆ الماتى وبلىسىنىڭ اكىمى بولىپ تاعايىندالدى.
ءوڭىر اكتيۆىمەن وتكەن جيىندا پرەمەر-مينيستر ولجاس بەكتەنوۆ مارات سۇلتانعازيەۆكە وبلىستىڭ الەۋمەتتىك-ەكونوميكالىق دامۋىنا قوسقان ۇلەسى ءۇشىن العىس ءبىلدىردى.
ۇكىمەت جەتەكشىسى الماتى وبلىسىنىڭ اكتيۆىنە ءوڭىردىڭ جاڭا اكىمى شىڭعىس ءارىنوۆتى تانىستىردى.
جيىندا جاڭا كونستيتۋتسيانىڭ كۇشىنە ەنۋى ەلىمىزدى ودان ءارى جاڭعىرتۋداعى ماڭىزدى جاڭا تاريحي كەزەڭنىڭ باستاۋى بولعانى اتاپ ءوتىلدى. ۇكىمەت الدىندا مەملەكەت باسشىسى ايقىنداعان ماقسات ەكونوميكانىڭ ساپالى ءارى ورنىقتى ءوسۋىن قامتاماسىز ەتۋگە قول جەتكىزۋ مىندەتى تۇر.
ولجاس بەكتەنوۆ قۇرىلتايدىڭ ءبىرىنشى سەسسياسىندا ازاماتتارىمىز بەن ەل ەكونوميكاسى ءۇشىن ماڭىزدى نىسانداردىڭ قۇرىلىسىن وزىق قارقىنمەن جۇرگىزۋ تۋرالى پرەزيدەنت تاپسىرمالارىن ورىنداۋعا باسا نازار اۋداردى. اتاپ ايتقاندا، ولار – حالىقتىڭ ءومىر ءسۇرۋ ساپاسىن ودان ءارى ارتتىرۋعا اسا قاجەتتى الەۋمەتتىك، ينجەنەرلىك، ەنەرگەتيكالىق جانە سۋ ينفراقۇرىلىمى. بۇگىنگى تاڭدا الماتى وبلىسىنىڭ اكىمدىگىنە دەنساۋلىق ساقتاۋ سالاسىنىڭ بىرقاتار جاڭا جوبالارىنا قوسىمشا قاراجات ءبولىندى. ولاردىڭ ىشىندە قاراساي اۋدانىندا پەريناتالدىق ورتالىق پەن ەمحانا سالۋ، قاسكەلەڭ قالاسىندا جۇقپالى اۋرۋلار اۋرۋحاناسىن، ىلە اۋدانىندا پەرزەنتحانا بولىمشەسىن جاڭعىرتۋ جۇمىستارى بار. نىسانداردى ۋاقتىلى پايدالانۋعا بەرۋ قاجەت. پرەمەر-مينيستر بولىنگەن قاراجاتتىڭ ماقساتتى ءارى ءتيىمدى جۇمسالۋىن قاتاڭ باقىلاۋدى تاپسىردى. ءاربىر تەڭگە ءوڭىر تۇرعىندارى ءۇشىن ناقتى ناتيجە اكەلۋى ءتيىس. قاداعالاۋدى كۇشەيتۋ ءۇشىن «تسيفرلىق تەڭگە» تەتىگى قولدانىلاتىن بولادى.
سونىمەن قاتار اۋقىمدى قۇرىلىس باعدارلامالارىن جۇزەگە اسىرۋ كەزىندە وتاندىق تاۋار وندىرۋشىلەرگە باسىمدىق بەرىلۋى ءتيىس. بۇل جەرگىلىكتى قۇرىلىس ۇيىمدارىن جۇمىسقا تارتۋعا، سونداي-اق قازاقستاندىق قۇرىلىس ماتەريالدارى مەن جابدىقتارىن قولدانۋعا قاتىستى. وسى رەتتە ولجاس بەكتەنوۆ ساتىپ الىناتىن قىزمەتتەر مەن تاۋارلارعا باعانىڭ الىپساتارلىقپەن وسۋىنە جول بەرمەۋدى تاپسىردى. كاسىپكەرلەر ءۇشىن بۇل – ءوندىرىس كولەمىن ۇلعايتۋعا بەرىلگەن وتە جاقسى مۇمكىندىك، سول سەبەپتى وتاندىق وندىرۋشىلەر باعانى جاساندى جولمەن كوتەرۋگە ەمەس، جۇمىس كولەمىن ۇلعايتۋعا باسا ءمان بەرۋى قاجەت. اتالعان قادامدار كەپىلدەندىرىلگەن پايدا تابۋعا، جاڭا جۇمىس ورىندارىناشۋعا، جالاقىنى كوتەرۋگە مۇمكىندىك بەرەدىى. مۇنداي ءتاسىل ىشكى ءوندىرىس پەن ازاماتتاردى جۇمىسپەن قامتۋدىڭ بارلىق تىزبەگىن ىنتالاندىرۋدى قامتاماسىز ەتەدى.
پرەمەر-مينيستر الماتى وبلىسى اكىمدىگىنىڭ جۇمىسىنىڭ نەگىزگى باسىمدىقتارىن اتاپ ءوتتى. اۋىلدىق جەرلەردە الەۋمەتتىك قىزمەتتەردىڭ قولجەتىمدىلىگىن ارتتىرۋ جانە قالا مەن اۋىل اراسىنداعى ينفراقۇرىلىمدىق الشاقتىقتى قىسقارتۋ بويىنشا مىندەتتەر ايقىندالدى. ەلدى مەكەندەردى ساپالى كوممۋنالدىق قىزمەتتەرمەن قامتۋدى ارتتىرىپ، ينفراقۇرىلىمنىڭ اۆاريالىق جاعداپيلارىن ازايتۋ قاجەت. سۋ، جىلۋ، ەلەكترمەن جابدىقتاۋ جانە سۋ بۇرۋ جۇيەلەرىن كەزەڭ-كەزەڭىمەن جاڭعىرتۋعا، سونداي-اق جاڭا ەلەكتر قۋاتىن ءوندىرۋ كوزدەرىن سالۋعا باسا نازار اۋدارىلدى.
اوك سالاسىندا سۋارمالى ەگىنشىلىكتى دامىتۋ، سۋ شىعىنىن ازايتۋ، اۋىل شارۋاشىلىعىندا سۋ ۇنەمدەۋ تەحنولوگيالارىن كەڭىنەن ەنگىزۋ جانە ءوڭىر ەكونوميكاسىنداعى اگروونەركاسىپ كەشەنىنىڭ ۇلەسىن ۇلعايتۋ قاجەتتىگى اتاپ ءوتىلدى. كولىك قوزعالىسىنىڭ قاۋىپسىزدىگىن قامتاماسىز ەتۋ ءۇشىن ءوڭىردىڭ اۆتوموبيل جولدارىن جوندەۋ مەن رەكونسترۋكتسيالاۋدى جانداندىرۋ تاپسىرىلدى. وڭىرگە ينۆەستيتسيا تارتۋدى كۇشەيتۋ، وڭدەۋ ونەركاسىبىن، اگروونەركاسىپتىك كەشەندى، ءتۋريزمدى جانە شاعىن جانە ورتا بيزنەستى دامىتىپ، جاڭا ەكونوميكالىق ءوسۋ نۇكتەلەرىن قالىپتاستىرۋ، سونىمەن قاتار الاتاۋ قالاسىنىڭ الەۋەتىن ءتيىمدى پايدالانۋدىڭ ماڭىزدىلىعى اتاپ ءوتىلدى.
ولجاس بەكتەنوۆ مەملەكەت باسشىسى قويعان مىندەتتەر بارلىق باعىتتار مەن سالالار بويىنشا جۇيەلى ءارى كەشەندى تۇردە جۇزەگە اسىرىلۋى ءتيىس ەكەنىن اتاپ ءوتتى. ءوڭىردىڭ ودان ءارى الەۋمەتتىك-ەكونوميكالىق دامۋىن قامتاماسىز ەتۋ ءۇشىن جان-جاقتى شارالار قابىلداۋ قاجەت.
ۇكىمەتتىڭ ءباسپاسوز قىزمەتى
