پرەمەر-مينيستر كەلتىرگەن دەرەكتەرگە قاراعاندا، ءۇش اۋىسىمدا وقىتاتىن مەكتەپتەردىڭ 57 %-ى اۋىلدىق جەردە ورنالاسقان. باسىم بولىگى - الماتى مەن تۇركىستان وبلىستارىندا. مەملەكەت باسشىسى قاسىم-جومارت توقاەۆ قازاقستان حالقىنا كەزەكتى جولداۋىندا ۇكىمەتكە ءبىلىم بەرۋ جۇيەسىن جەتىلدىرۋگە قاتىستى قاداۋ-قاداۋ تاپسىرما بەرگەن بولاتىن. سولاردىڭ ءبىرى – اۋىل مەكتەپتەرى، ونداعى ءبىلىم بەرۋ ساپاسىن ارتتىرۋ، ورتالىقتىڭ ءبىلىم بەرۋ دەڭگەيىنە جەتكىزۋ.

ولجاس بەكتەنوۆ، مەكتەپتەردىڭ 76 %-ى دا اۋىلدىق ەلدى مەكەندەردە ورنالاسقانىن اتاپ ءوتتى. ولار اقتوبە، قىزىلوردا، باتىس قازاقستان جانە تۇركىستان وبلىستارىندا قىزمەت ەتىپ تۇر. شاعىن كومپلەكتىلى مەكتەپتەردە مۇعالىمدەردىڭ جەتىسپەۋىنە بايلانىستى ءبىر پەداگوگ بىرنەشە ءپاندى وقىتاتىنى جاسىرىن ەمەس. بىلىكتىلىگى جوعارى ماماندار از، ماتەماتيكا، فيزيكا، شەت تىلدەرى پاندەرىنەن ماماندار جەتىسپەيدى. سالدارىنان – اۋىل مەن قالا مەكتەپتەرىنىڭ اراسىنداعى ءبىلىم بەرۋ، وقىتۋ ساپاسىندا ەداۋىر الشاقتىقتىڭ بارى بايقالادى، - دەگەن پىكىردى العا تارتتى.

وسى ماسەلەلەردى جۇيەلى شەشۋ ءۇشىن و. بەكتەنوۆ وقۋ-اعارتۋ مينيسترلىگىنە اكىمدىكتەرمەن بىرگە، كەلەسى جىلدىڭ سوڭىنا دەيىن اقتوبە وبلىسىنىڭ تاجىريبەسى اياسىندا كەمىندە 200 تىرەك مەكتەپ جەلىسىن قۇرۋدى مىندەتتەدى.

اقتوبە وبلىسىندا «قازاقستان حالقىنا» قوعامدىق قورى تىرەك جانە شاعىن كومپلەكتىلى مەكتەپتەردى جاراقتاندىرۋعا 1 ملرد 800 ملن تەڭگە بولگەن. مۇعالىمدەردىڭ بىلىكتىلىگىن ارتتىرۋ جانە زاماناۋي رەسۋرستارمەن جاراقتاندىرۋ ەسەبىنەن تىرەك مەكتەپتەردىڭ تاجىريبەلى مۇعالىمدەرى شاعىن كومپلەكتىلى مەكتەپتەردىڭ وقۋشىلارىنا ساباق بەرەدى. قىسقاسى، تىرەك مەكتەپتەر شاعىن مەكتەپتەردەگى ءبىلىم دەڭگەيىن كوتەرۋگە اتسالىسىپ جاتىر، - دەپ اتاپ ءوتتى پرەمەر-مينيستر.

«بيىل قىركۇيەك ايىندا اقتوبە وبلىسىنا بارعان ساپارىمدا وسى جوبانىڭ العاشقى وڭ ناتيجەلەرىمەن تانىستىم. بالالاردىڭ ءبىلىم ساپاسى جاقسارا تۇسكەن. ەڭ باستى ناتيجە وسى بولۋى كەرەك. سوندىقتان مەن جوبانى باسقا وڭىرلەرگە دە كەڭىنەن تاراتۋدى تاپسىردىم»، - دەدى ۇكىمەت باسشىسى. شاعىن كەشەندى مەكتەپتەردىڭ الەۋەتىن ارتتىرۋ ءۇشىن ناقتى جول كارتاسى بولۋى كەرەك.

 ايتا كەتۋ كەرەك، اقتوبەدەگى مودەلدىڭ ەرەكشەلىگى – وقۋ ءۇردىسىن جەرگىلىكتى ۇستازدار ۇيىمداستىردى. سىرتقى مامانداردى ەمەس، ايماقتىق وقىتۋ الەۋەتىن وسىلايشا پايدالانۋ تسيفرلىق شەشىمدەردى ءتيىمدى پايدالانۋعا ىقپال ەتەدى جانە جوبانىڭ ۇزاق مەرزىمدى تۇراقتىلىعىن قامتاماسىز ەتەتىنى ءسوزسىز.

دەگەنمەن، جەتىستىكتەرگە قاراماستان، قوسىمشا نازار اۋدارۋدى قاجەت ەتەتىن ماسەلەلەر ءالى دە بار. بۇعان شاعىن جيناقتى مەكتەپتەردەگى مۇعالىمدەردىڭ تاپشىلىعى، مۇعالىمدەردىڭ بىلىكتىلىگىن ارتتىرۋ قاجەتتىلىگى، زاماناۋي ءبىلىم بەرۋ رەسۋرستارىنا قولجەتىمدىلىكتىڭ ارتۋى جاتادى.

وتىرىستا تسيفرلىق دامۋ مينيسترلىگىنە 2025 جىلعى 1 قىركۇيەككە قاراي اۋىل مەكتەپتەرىن جىلدامدىعى جوعارى ينتەرنەتكە قوسۋ جۇمىسىن اياقتاۋدى دا تاپسىردى. ال، ءبىلىم سالاسىنىڭ ساراپشىلارى، اۋىل مەكتەپتەرىن تسيفرلاندىرۋ – جاي عانا تەحنولوگيالىق يننوۆاتسيا ەمەس، بۇل ءبىلىم ساپاسىن ارتتىرۋدىڭ جانە قالا مەن اۋىل اراسىنداعى ءبىلىم بەرۋدەگى تەڭسىزدىكتى جويۋدىڭ ستراتەگيالىق جولى دەگەندى العا تارتادى. وسى رەتتە ايتا كەتۋ كەرەك، اقتوبە وبلىسىنىڭ تاجىريبەسى كورسەتكەندەي، تسيفرلىق تەحنولوگيالاردى پەداگوگتاردىڭ بىلىكتىلىگىن ارتتىرۋمەن جانە ينتەرنەت-ينفراقۇرىلىمدى جەتىلدىرۋمەن ۇيلەستىرۋ وقۋ ۇدەرىسىنىڭ تيىمدىلىگىن ايتارلىقتاي ارتتىرۋعا مۇمكىندىك بەرەدى. بۇل ءبىلىم سالاسى ماسەلەلەرىن تۇبەگەيلى شەشۋدىڭ توتە جولى ەكەنى انىق. وسى جاعىنان اقتوبە وبلىسىنىڭ ءبىلىم سالاسى كوش باستاپ تۇرعانى بەلگىلى. بۇل اقتوبە وبلىسى اكىمى اسحات شاحاروۆتىڭ ستراتەگيالىق جوبالارعا ەرەكشە ەكپىن بەرىپ، الىستى بولجاي الاتىنىن اڭعارتادى.