قر پرەمەر-ءمينيسترىنىڭ ءبىرىنشى ورىنباسارى نۇرلىبەك نالىباەۆ قىزىلوردا وبلىسىنا جۇمىس ساپارىمەن باردى. مەملەكەت باسشىسىنىڭ تاپسىرماسىمەن جۇزەگە اسىرىلىپ جاتقان الەۋمەتتىك جانە ينفراقۇرىلىمدىق جوبالاردىڭ قۇرىلىس بارىسىن تەكسەردى.

قىزىلوردا وبلىسىندا كەيىنگى جىلدارى سالىنعان ءبىلىم بەرۋ، دەنساۋلىق ساقتاۋ، مادەنيەت جانە سپورت نىساندارى بۇگىندە ەل يگىلىگىنە قىزمەت ەتۋدە.     

مەملەكەت باسشىسى جىل باسىندا وتكەن ۇلتتىق قۇرىلتاي وتىرىسىندا «مەنىڭ تاپسىرماممەن قىزىلوردادا 300 ورىنعا ارنالعان كوپسالالى اۋرۋحانانىڭ قۇرىلىسى باستالدى. كوپ ۇزاماي 500 ورىندىق ەمحانا جانە 200 ورىندىق پەرزەنتحانا سالىنادى» دەپ الەۋمەتتىك سالانىڭ ينفراقۇرىلىمىن دامىتۋ باعدارىن بەلگىلەگەن بولاتىن. بۇل اۋقىمدى جوبالاردىڭ ءار كەزەڭىندە اتقارىلعان جۇمىستار پرەمەر-ءمينيستردىڭ باقىلاۋىندا.

دەلەگاتسيا الدىمەن پرەزيدەنت ساياباعى اۋماعىنداعى توعىز قاباتتى 15 تۇرعىن ءۇيدىڭ قۇرىلىسىمەن تانىستى. جالپى قۇنى 22 ملرد تەڭگە بولاتىن جوبا رەسپۋبليكالىق بيۋدجەت ەسەبىنەن قارجىلاندىرىلعان. باس مەردىگەر «مەليوراتور» جشس سالعان تۇرعىن ءۇي كەشەنىندە 945 پاتەر قاراستىرىلعان، جاقىندا پايدالانۋعا بەرىلەدى. 

جۇمىس ساپارى كەزىندە مەملەكەت باسشىسىنىڭ قولداۋىمەن سالىنعان بوتانيكالىق باق تا نازاردان تىس قالمادى. پرەزيدەنت ساياباعى اۋماعىنداعى كەشەندە قىتاي، جاپونيا، وڭتۇستىك افريكا، اۋستراليا، ماداگاسكار، وڭتۇستىك جانە ورتالىق امەريكادان اكەلىنگەن 92 ءتۇرلى 3,3 مىڭنان استام ەكزوتيكالىق جانە تروپيكالىق وسىمدىك وتىرعىزىلعان. ميكروكليماتتى اۆتوماتتى باسقارۋدىڭ، سۋارۋ جانە سۋ دايىنداۋدىڭ زاماناۋي ينجەنەرلىك جۇيەلەرىمەن جابدىقتالعان.

اتالعان اۋماقتا ەلىمىزدەگى ءۇشىنشى پرەزيدەنتتىك كىتاپحانا مەن دراما تەاتر بوي كوتەرىپ كەلەدى. 

قىزىلوردا قالاسىندا تاۋلىك بويى جۇمىس ىستەيتىن كىتاپحانا مەن جاڭا دراما تەاتر سالۋ مەملەكەت باسشىسىنىڭ ۇلتتىق قۇرىلتاي وتىرىسىندا بەرگەن تاپسىرماسى اياسىندا جۇزەگە اسىرىلۋدا.

ءساۋىر ايىندا عيماراتتىڭ ىرگەتاسى قالانىپ، كاپسۋلاسى سالىندى.

ينۆەستور قاراجاتى ەسەبىنەن قۇرىلىسىنا 20 ملرد تەڭگە قارالعان كىتاپحانادا زاماناۋي وقۋ جانە كونفەرەنتسيا زالدارى، مۇراعات ءبولىمى، باسپاحانا، مەديازەرتحانا، پودكاست ستۋدياسى بولادى. مۇندا 1 ملن-نان استام كىتاپ قورى ساقتالادى. 

جاڭا دراما تەاتر قۇرىلىسىنا دا 20 ملرد تەڭگە بولىنگەن، عيمارات 520 كورەرمەنگە ارنالعان. جوبا بويىنشا قويىلىم الدى دايىندىق زالدارى، ستۋديا جانە شىعارماشىلىق كەڭىستىكتەر، اكىمشىلىك كابينەتتەر بار. ءتۇرلى جانرداعى قويىلىمداردى ساحنالاۋعا قاجەتتى زاماناۋي تەحنيكامەن، قۋاتتى دىبىس جۇيەسىمەن جابدىقتالادى.   

سونداي-اق سىرداريا وزەنى جاعالاۋىنا شايىلۋدان قورعايتىن ارنايى تىرەك قۇرىلىمدارى ورناتىلۋدا. تۇرعىندارعا ىڭعايلى بولۋ ءۇشىن جاياۋ جۇرگىنشىلەر جولى مەن ۆەلوجولاق سالىنادى. بۇگىندە جۇمىستىڭ 50%-ى اياقتالعان.

«قىزىلوردا ارەنا» كوپفۋنكتسيونالدى سپورت كەشەنىنىڭ قۇرىلىس الاڭىندا دا جۇمىس قارقىندى ءجۇرىپ جاتىر. كەشەندە 50 مەترلىك ءجۇزۋ باسسەينى، حالىقارالىق جارىستار وتكىزۋگە ارنالعان 2,5 مىڭ ورىندىق امبەباپ سپورت زالى جانە 300 ورىندىق كونفەرەنتس-زال ورنالاسادى.

قازىر ارلەۋ، مەتالل كونسترۋكتسيالارىن مونتاجداۋ، ينجەنەرلىك جانە ەلەكتر جەلىلەرىن تارتۋ، ۆيتراج ورناتۋ، اۋماقتى اباتتاندىرۋ جۇمىستارى جۇرگىزىلۋدە. نىساندى بيىل پايدالانۋعا بەرۋ جوسپارلانعان.

ساپار بارىسىندا وڭىردە جۇزەگە اساتىن جاڭا ينۆەستيتسيالىق جوبالار دا تانىستىرىلدى. 

ينۆەستورلار سىرداريانىڭ سول جاعالاۋىنان تۇرعىن ءۇي كەشەنىن سالۋ، جەلدەتۋ جانە اۋا باپتاۋ قوندىرعىلارىن قۇراستىرۋ، سانيتارلىق-تەحنيكالىق بۇيىمدار قۇراستىرۋ جانە ءوندىرۋ جوبالارىنا باسىمدىق بەرىپ وتىر. تومات پاستاسى مەن كوكونىس پيۋرەسى ءوندىرىسى اگروسالانىڭ الەۋەتىن ارتتىرۋعا باعىتتالعان. سونداي-اق ينۆەستورلار سۇيىتىلعان تابيعي گاز وندىرۋگە، ەكى قورعاسىن-مىرىش تاۋ-كەن بايىتۋ زاۋىتىن، كوپفۋنكتسيونالدى ساۋدا-ويىن-ساۋىق كەشەنىن سالۋعا نيەت ءبىلدىرىپ، كەلىسسوزدەر جۇرگىزىلۋدە.   

قىزىلوردا قالاسىنىڭ شەت ايماعى تيتوۆ شاعىن اۋدانىنداعى №5 قالالىق ەمحانا ءبىر اۋىسىمدا 400 ادام قابىلدايتىن مەديتسينالىق مەكەمەگە اينالادى. قۇرىلىسقا 9,7 ملرد تەڭگە بولىنگەن. قازىر ءۇشىنشى قاباتتىڭ ءمونوليتتى كونسترۋكتسيالارى بەتوندالىپ، ىشكى ينجەنەرلىك جەلىلەر تارتىلۋدا.

تاعى ءبىر ەمحانا مەملەكەت باسشىسىنىڭ تاپسىرماسىمەن 14 ملرد. 780 ملن. تەڭگەگە سىرداريا وزەنىنىڭ سول جاعالاۋىنان بوي كوتەرىپ كەلەدى. 

ءبىر اۋىسىمدا 500 كەلۋشىنى قابىلدايتىن مەكەمەدە امبۋلاتوريالىق-ەمحانالىق، دياگنوستيكالىق جانە كۇندىزگى ستاتسيونارلىق قىزمەت كورسەتىلەدى. مامانداندىرىلعان بولىمدەرمەن قاتار، 50 توسەكتىك كۇندىزگى ستاتسيونار، وقۋ كابينەتتەرى جانە كونفەرەنتس-زال قاراستىرىلعان.

مەملەكەت باسشىسى اتاپ وتكەن 300 توسەكتىك كوپبەيىندى اۋرۋحانانىڭ قۇرىلىسى دا قارقىندى جۇرگىزىلۋدە. وعان 34,9 ملرد. تەڭگە بولىنگەن. مەديتسينالىق كەشەن قۇرامىندا ەمحانا، وپەراتسيا جانە رەانيماتسيا بولىمدەرى، حيميوتەراپيا جانە راديوتەراپيا ورتالىقتارى، فيزيوتەراپيا، پانسيونات جانە اكىمشىلىك بلوكتار بولادى. قازىرگى ۋاقىتتا ىشكى جانە سىرتقى ارلەۋ، ينجەنەرلىك جۇيەلەردى مونتاجداۋ، كەراميكالىق پليتكا توسەۋ، قاسبەتتى قاپتاۋ جانە اباتتاندىرۋ جۇمىستارى جالعاسۋدا.

نىسانداردى ارالاۋ كەزىندە مەردىگەر مەكەمە باسشىلارىنا قۇرىلىس ساپاسى مەن مەرزىمىنە قاتىستى تالاپتاردى قاتاڭ ساقتاۋ تاپسىرىلدى.

«وزدەرىڭىزگە بەلگىلى، مەملەكەت باسشىسىنىڭ قولداۋىمەن ءوڭىردىڭ دەنساۋلىق ساقتاۋ سالاسى ينفراقۇرىلىمىن دامىتۋدا بىرنەشە اۋقىمدى جوبا قولعا الىنعان. ماقسات – مەديتسينالىق قىزمەتتى جۇرتشىلىققا قولجەتىمدى ەتۋ. نىساندار مەملەكەت باسشىمىزدىڭ ەرەكشە نازارىندا، پرەمەر-مينيستر قۇرىلىستىڭ ءار كەزەڭىن باقىلاۋدا ۇستايدى. بۇل مەكەمەلەردىڭ حالىققا ساپالى، جان-جاقتى قىزمەت كورسەتۋىن باقىلاۋ وسى قۇرىلىس ساتىسىنان باستالۋى كەرەك. عيماراتتار بەلگىلەنگەن مەرزىمدە، بارلىق تالاپقا ساي كۇيىندە پايدالانۋعا بەرىلۋى ءتيىس. سوندا عانا ەمدەلۋشىلەرگە كورسەتىلەتىن قىزمەت ساپاسى ءمىنسىز بولماق»، — دەدى نۇرلىبەك نالىباەۆ.