پرەمەر-ءمينيستردىڭ ءبىرىنشى ورىنباسارى نۇرلىبەك نالىباەۆ East Hope Group كومپانياسىنىڭ ستراتەگيالىق ينۆەستيتسيالار جونىندەگى باس ديرەكتورى چەن لەيمەن كەزدەسۋ وتكىزدى.

كەزدەسۋ بارىسىندا قازاقستاندا وندىرىستىك جانە ەنەرگەتيكالىق نىسانداردى قۇرۋدى كوزدەيتىن اليۋميني سالاسىنداعى ءىرى ينۆەستيتسيالىق جوبانى ىسكە اسىرۋ ماسەلەلەرى تالقىلاندى.

اتاپ ايتقاندا، كومپانيا قوستاناي وبلىسىندا جالپى قۇنى $10 ملرد-تان اساتىن وندىرىستىك كەشەندى ىسكە قوسۋدى جوسپارلاپ وتىر. جوبا بوكسيتتەردى وڭدەيتىن تاۋ-كەن بايىتۋ كومبيناتىن، اليۋميني وندىرەتىن ەلەكتروليز زاۋىتىن جانە جەل ەلەكتر ستانتسياسىن سالۋدى قامتيدى.

تاراپتار جوبانى پىسىقتاۋدىڭ اعىمداعى مارتەبەسىن، سونداي-اق شيكىزات بازاسىمەن، ەنەرگەتيكالىق ينفراقۇرىلىممەن قامتاماسىز ەتۋ جانە مەملەكەتتىك ورگاندارمەن ودان ءارى ءوزارا ءىس-قيمىل جاساۋ ماسەلەلەرىن قاراستىردى.

كەزدەسۋ قورىتىندىسى بويىنشا نۇرلىبەك نالىباەۆ ۇكىمەتتىڭ جوبانى ىسكە اسىرۋ بويىنشا بىرلەسكەن جۇمىستى جالعاستىرۋ نيەتىن راستادى.

انىقتاما: East Hope Group الەمدەگى ەڭ ءىرى ەلەكتروليتتىك اليۋميني، گلينوزەم جانە پوليكرەمني وندىرۋشىلەردىڭ قاتارىنا كىرەدى. 2010 جىلدان باستاپ كومپانيا قىتايدا ەلەكتروليتتىك اليۋميني، ونەركاسىپتىك كرەمني جانە پوليكرەمني ءوندىرىسىن، سونداي-اق قۋاتتىلىعى 4,2 گۆت بولاتىن اۆتونومدى ەلەكتر ستانتسياسىن قامتيتىن بىرىكتىرىلگەن ونەركاسىپتىك پاركتى قۇرۋعا شامامەن $10 ملرد ينۆەستيتسيالادى. جوبا اياسىندا 10,7 مىڭ تىكەلەي جانە 30 مىڭنان استام جاناما جۇمىس ورنى قۇرىلدى.

ءباسپاسوز قىزمەتى