قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ جازۋشى، جۋرناليست، مەملەكەتتىك سىيلىقتىڭ يەگەرى، قازاقستاننىڭ ەڭبەك سىڭىرگەن قايراتكەرى ساۋىتبەك ابدراحمانوۆتى مەرەيتويىمەن قۇتتىقتادى.
مەملەكەت باسشىسىنىڭ قۇتتىقتاۋ حاتىن مەرەيتوي يەسىنە قر مادەنيەت جانە اقپارات ءمينيسترى ارمان قىرىقباەۆ تابىستادى.
قۇتتىقتاۋدا پرەزيدەنت ساۋىتبەك ابدراحمانوۆتىڭ وتاندىق جۋرناليستيكا مەن ادەبيەتتى دامىتۋعا، ۇلتتىق رۋحاني قۇندىلىقتاردى دارىپتەۋگە قوسقان ەلەۋلى ۇلەسىن اتاپ ءوتتى.
«سانالى عۇمىرىڭىزدى ۇلتتىق رۋحاني قۇندىلىعىمىزدىڭ كەڭ قانات جايۋىنا ارناپ كەلەسىز. قازاق ءباسپاسوزىنىڭ قارا شاڭىراعى – «ەگەمەن قازاقستان» گازەتىنىڭ بەدەلىن ارتتىرۋعا، وتاندىق مەديا سالاسىنىڭ جاڭا بەلەسكە كوتەرىلۋىنە قوسقان ۇلەسىڭىز مول. ءسىز ساياسي-اكىمشىلىك قىزمەتتەردى ابىرويلى اتقارىپ، قوعام دامۋىنداعى ىرگەلى ىستەردىڭ بەل ورتاسىندا ءجۇردىڭىز»، – دەلىنگەن قۇتتىقتاۋدا.
مەملەكەت باسشىسى مەرەيتوي يەسىنە مىقتى دەنساۋلىق، وتباسىنا اماندىق، ۇزاق تا جەمىستى عۇمىر تىلەدى.
قر مادەنيەت جانە اقپارات مينيسترلىگىنىڭ ءباسپاسوز قىزمەتى
