قما-نىڭ ماڭعىستاۋ وبلىسى بويىنشا دەپارتامەنتى جاڭاوزەن قالالىق كوپبەيىندى اۋرۋحاناسىنا دەمەۋشىلىك كومەك رەتىندە بولىنگەن قاراجاتتىڭ جىمقىرىلۋىنا قاتىستى تەرگەۋ جۇرگىزىپ جاتىر.

2025 جىلى ماڭعىستاۋ وبلىسىنىڭ دەنساۋلىق ساقتاۋ باسقارماسى كۇيىك بولىمشەسىن اشۋعا دەمەۋشىلىك كومەك كورسەتۋ تۋرالى «قازمۇنايگاز» ۇك» اق-عا ءوتىنىش جاساعان. جوبانى ىسكە اسىرۋعا 223 ملن تەڭگە ءبولىنىپ، ونى «وزەنمۇنايگاز» اق «جارىلقاۋ» قوعامدىق قورىنا اۋدارعان.

باستاپقىدا جوبا اياسىندا مەديتسينالىق جابدىقتىڭ سەگىز ءتۇرىن ساتىپ الۋ جانە مامانداردى وقىتۋ كوزدەلگەن. الايدا كەيىن جوبانىڭ شارتتارى وزگەرتىلىپ، بولىمشەنى كەشەندى تۇردە جابدىقتاۋدىڭ ورنىنا قوعامدىق قور، قالالىق اۋرۋحانا جانە «AKBS Invest» جشس اراسىندا جالپى قۇنى 210 ملن تەڭگە تۇراتىن، كۇيىككە شالدىققان ناۋقاستارعا ارنالعان نەبارى ەكى ارنايى كەرەۋەت ساتىپ الۋ جونىندە ۇشجاقتى شارت جاسالعان.

بۇل رەتتە ساتىپ الۋ زاڭ تالاپتارىن اينالىپ ءوتىپ جۇرگىزىلگەن. ويتكەنى مۇنداي باعاداعى مەديتسينالىق تەحنيكانى زاڭناماعا سايكەس بىرىڭعاي ديستريبيۋتور ارقىلى ساتىپ الۋ قاجەت.

تەرگەۋ دەرەگىنشە، زاڭسىز ىسكە قالالىق اۋرۋحانا ديرەكتورىنىڭ ورىنباسارى، «جارىلقاۋ» قوعامدىق قورىنىڭ باسشىسى، جاڭاوزەن قالاسى اكىمىنىڭ بۇرىنعى ورىنباسارى جانە ءونىم بەرۋشى قاتىسى بار.

جابدىق ساتىپ الۋعا نەبارى 92 ملن تەڭگە جۇمسالعان. تەرگەۋ نۇسقاسى بويىنشا، قالعان قاراجات ۇلەستەس كاسىپورىندار ارقىلى قولما-قول اقشاعا اينالدىرىلىپ، ىسكە قاتىسۋشىلار اراسىندا بولىنگەن.

«AKBS Invest» جشس وكىلى قىلمىستىق جولمەن تۇسكەن قاراجاتقا ەلوردادان پاتەر ساتىپ الىپ، ونى ءۇشىنشى تۇلعالاردىڭ اتىنا راسىمدەگەن.

جاڭاوزەن قالاسى اكىمىنىڭ بۇرىنعى ورىنباسارىنا قاتىستى قر قىلمىستىق كودەكسىنىڭ 361-بابى بويىنشا لاۋازىمدىق وكىلەتتىكتەرىن تەرىس پايدالانۋ دەرەگىمەن تەرگەۋ باستالدى.

ءۇش كۇدىكتى قاماۋعا الىندى.

سوتتىڭ سانكتسياسىمەن ولاردىڭ مۇلكىنە، سونىڭ ىشىندە 2 پاتەرگە، 2 تۇرعىن ۇيگە جانە اۆتوكولىككە تىيىم سالىندى.

تەرگەۋ جالعاسىپ جاتىر.

قر قىلمىستىق-پروتسەستىك كودەكسىنىڭ 201-بابىنا سايكەس وزگە اقپارات جاريا ەتىلمەيدى.

قر قما ءباسپاسوز قىزمەتى