ءماجىلىس توراعاسى ەرلان قوشانوۆ ۇلى وتان سوعىسىنداعى جەڭىس كۇنىنە وراي كەڭەس وداعىنىڭ باتىرى اتاعىن ەكى مارتە يەلەنگەن تالعات بيگەلدينوۆتىڭ ەسكەرتكىشىنە گۇل شوعىن قويدى.
ءىس-شاراعا پارلامەنت فراكتسيالارى مەن ارداگەرلەر ۇيىمدارىنىڭ وكىلدەرى جانە جەرگىلىكتى تۇرعىندار قاتىستى. ولار ەرلىكپەن قازا تاپقان قاھارمانداردىڭ رۋحىنا تاعزىم ەتىپ، مايدانگەرلەر مەن تىل ەڭبەككەرلەرىن ءبىر مينۋت ۇنسىزدىكپەن ەسكە الدى.
تالعات جاقىپبەكۇلى بيگەلدينوۆ – قازاقتىڭ ماڭدايىنا بىتكەن داڭقتى ۇشقىشى، اۆياتسيا گەنەرال-مايورى. 305 رەت اسكەري شابۋىلعا شىعىپ، ەرلىكتىڭ شىنايى ۇلگىسىن پاش ەتكەن ءبىرتۋار باتىر. سونىمەن قاتار ول ءۇش مارتە كسرو جوعارعى كەڭەسىنىڭ دەپۋتاتى بولىپ سايلانعان.
اتى اڭىزعا اينالعان ۇشقىشتىڭ ەسكەرتكىشى ەلوردانىڭ سارىارقا اۋدانىنداعى باتىردىڭ قۇرمەتىنە بەرىلگەن كوشەدەگى ساياباقتا ورنالاسقان.
