سوتتالعانداردىڭ تۋىستارى مەن تانىستارى تىيىم سالىنعان زاتتاردى پەنيتەنتسيارلىق مەكەمەلەرگە جەتكىزۋگە تىرىسىپ، زاڭدى بەلدەن باسۋدى جالعاستىرۋدا. مۇنداي ارەكەتتەر قىلمىستىق-اتقارۋ جۇيەسىندەگى قاۋىپسىزدىككە زور قاتەر ءتوندىرىپ، ءتارتىپتى بۇزۋعا ىقپال ەتەدى.

2025 جىلدىڭ العاشقى ءۇش ايىندا مەكەمەلەرگە تىيىم سالىنعان زاتتاردى وتكىزبەك بولعانداردىڭ ايلاسى اشكەرەلەندى. اتاپ ايتقاندا: 136 ۇيالى تەلەفون تاركىلەندى، 7,6 كگ ەسىرتكى زاتى انىقتالدى، 40,6 ليتر الكوگول زاڭسىز اكەلىنبەك بولدى، 393 590 تەڭگە كولەمىندە اقشا اينالىمعا تۇسپەي ۇستالدى. قاجد قىزمەتكەرلەرى تۇرمە اۋماقتارىندا باقىلاۋ جۇمىستارىن كۇشەيتىپ، كۇدىكتى ايماقتاردى پاترۋلدەۋدى جانداندىردى. ناتيجەسىندە تىيىم سالىنعان زاتتاردى وتكىزۋگە ارەكەتتەنگەن 79 ادام ۇستالدى. ولاردىڭ 31-ءى اكىمشىلىك جاۋاپكەرشىلىككە تارتىلسا، 11 ادامعا قاتىستى ەسىرتكى قۇرالدارىن زاڭسىز دايىنداۋ، قايتا وڭدەۋ، ساقتاۋ جانە تاسىمالداۋ بويىنشا قىلمىستىق ىستەر قوزعالدى. تىيىم سالىنعان زاتتاردى جەتكىزۋ تاسىلدەرى دە كۇردەلەنىپ كەلەدى. جۋىردا اتىراۋ قالاسىنداعى كولونياعا زاڭسىز جۇكتى جەتكىزۋ ءۇشىن درون قولدانۋ دەرەگى تىركەلدى. بۇل جاعداي قىلمىستىق-اتقارۋ جۇيەسىندەگى قاۋىپسىزدىككە جاڭا تەحنولوگيالاردىڭ دا قاۋىپ ءتوندىرىپ وتىرعانىن ايعاقتايدى. ۇلتتىق ۇلان مەن پوليتسيا دەپارتامەنتىمەن بىرلەسكەن جەدەل شارالار بارىسىندا 26 قۇقىق بۇزۋشى ۇستالدى. سوتتالعاندار مۇنداي زاڭسىز ارەكەتتەردى جۇزەگە اسىرۋ ءۇشىن جاقىندارى مەن تانىستارىن عانا ەمەس، كەيدە قورعاۋشىلار مەن ادۆوكاتتاردى دا تارتاتىنى بەلگىلى. جاقىندا استانا قالاسىنداعى پەنيتەنتسيارلىق مەكەمەلەردىڭ بىرىندە ەرەكشە وقيعا تىركەلدى. جۇبايىمەن ۇزاق مەرزىمدى كەزدەسۋگە كەلگەن ايەل 200 گرامم ەسىرتكىنى مۇشەقاپقا سالىپ، ءىش كيىمىنە جاسىرعان. تىيىم سالىنعان زات مەديتسينا قىزمەتكەرىنىڭ كومەگىمەن عانا الىنىپ، ساراپتاماعا جىبەرىلدى. قىلمىستىق-اتقارۋ مەكەمەلەرىندەگى ءتارتىپ پەن قاۋىپسىزدىكتى قامتاماسىز ەتۋدىڭ ماڭىزدى قادامى – جاپپاي بەينەباقىلاۋ جۇيەسىنىڭ ەنگىزىلۋى. بۇل جاڭاشىلدىق مەكەمەلەردەگى جاعدايدى تاۋلىك بويى باقىلاۋعا مۇمكىندىك بەرىپ، قىزمەتكەرلەردىڭ جۇمىسىن ايتارلىقتاي جەڭىلدەتۋدە. كامەرالار كولونيا اۋماعىندا عانا ەمەس، وعان ىرگەلەس اۋماقتاردا دا ورناتىلىپ، كۇدىكتى ارەكەتتەردى جەدەل انىقتاۋعا جول اشادى. بەينەباقىلاۋ جۇيەسى ارقىلى تىيىم سالىنعان زاتتاردى لاقتىرۋ سياقتى زاڭسىز ارەكەتتەردىڭ الدىن الۋ، كىنالىلەردى جاۋاپكەرشىلىككە تارتۋ جانە قۇقىق بۇزۋشىلىقتاردى تەرگەۋ بارىسىندا دالەلدەمەلەردى جيناۋ مۇمكىندىگى ارتا ءتۇستى. قىلمىستىق-اتقارۋ جۇيەسىندەگى قاۋىپسىزدىكتى نىعايتۋ – قوعام تىنىشتىعى مەن قۇقىقتىق ءتارتىپتى ساقتاۋدىڭ ماڭىزدى كەپىلى.

اقپارات كوزى Polisia.kz سايتىندا