قازىر ازاماتتاردىڭ بانكتىك ءموبيلدى قوسىمشالارىنا حابارلامالار جىبەرىلىپ جاتىر. سول جەردەن سالىقتىڭ مولشەرىن ءبىلىپ جانە ونى تولەي الاسىز.

سالىق سوماسى تەمىر تۇلپار تۇرىنە، شىققان جىلىنا جانە قوزعالتقىش قۋاتىنا قاراي ءار ءتۇرلى ەسەپتەلەدى. كولىك يەلەرىن ەلەكتروندى تۇردە اقپاراتتاندىرۋ بيىل ناۋرىزدىڭ 12-سىنەن باستالعان. كوپشىلىك جىبەرىلگەن حابارلامالار ارقىلى بەرەشەگىن بىرتىندەپ وتەپ جاتىر.

جالپى مەگاپوليستە 456 مىڭ تۇرعىننىڭ اتىنا 764 مىڭ اۆتوكولىك تىركەلگەن. بۇل 2023 جىلمەن سالىستىرعاندا 7 پايىزعا كوپ. تيىسىنشە، سالىقتىڭ جالپى سوماسى 20 ملرد-تان 22 ملرد تەڭگەگە دەيىن ءوستى. الايدا بەرەشەگىن بەرۋدەن جالتارىپ جۇرگەندەر دە جوق ەمەس. ءبىر عانا الماتىنىڭ وزىندە 60 مىڭ ادام مىندەتتى تولەمىن تولەۋگە قۇلىقسىز كورىنەدى. بورىشكەرلەردىڭ جالپى قارىزى 3 ملرد تەڭگەگە جۋىقتايدى. ولارعا جازا دا قاتاڭ.

قاناعات كۇلىمباەۆ، الماتى قالاسى بويىنشا مەملەكەتتىك كىرىستەر دەپارتامەنتىنىڭ باسقارما باسشىسى:

بىرىنشىدەن بانك سچەتتارىن بۇعاتتايدى، مۇلىكتەرىن شەكتەيدى. شەتەلگە شىعۋعا تىيىم سالىنادى. جۇرگىزۋ كۋالىگىن ۋاقىتشا توقتاتادى. ءبىز وسى ايدىڭ 12- نەن 15-ءى ارالىعىندا رەيد جۇرگىزدىك، الماتى قالاسىندا سول كەزدە تولەنبەگەن سالىق تولەۋشىلەردىڭ كولىكتەرى ايىپپۇل اۆتوتۇراعىنا قويىلدى.

ءارتۇرلى سەبەپپەن سالىقتان جالتارىپ جۇرگەندەردىڭ باسىم بولىگى الماتى قالاسى، الماتى وبلىسى، استانا مەن شىمكەنت قالاسىنىڭ تۇرعىندارى ەكەن. ايتا كەتەيىك، 1 ساۋىرگە دەيىن بىلتىرعى كولىك سالىعىن تولەۋ قاجەت. ءتارتىپ سولاي، ەسەپتەۋ ءبىر جىلعا كەش جۇرەدى.