گرەكيانىڭ كوستا-ناۆارينو قالاسىندا وتكەن حالىقارالىق وليمپيادالىق كوميتەتىنىڭ (حوك) 144-ءشى سەسسياسىندا ۇيىمنىڭ جاڭا پرەزيدەنتى سايلاندى.
داۋىس بەرۋ ناتيجەسىندە جۇزۋدەن ەكى دۇركىن وليمپيادا چەمپيونى، زيمبابۆە سپورت ءمينيسترى كيرستي كوۆەنتري حالىقارالىق وليمپيادالىق كوميتەتىنىڭ پرەزيدەنتى اتاندى. وسىلايشا، كيرستي كوۆەنتري حوك-ءتى باسقاراتىن العاشقى ايەل باسشى ءارى اتالعان لاۋازىمعا سايلانعان ءبىرىنشى افريكا قۇرلىعىنىڭ وكىلى بولدى.
ال حالىقارالىق وليمپيادالىق كوميتەتىن 2013 جىلدان بەرى باسقارعان سەمسەرلەسۋدەن وليمپيادا چەمپيونى توماس باح قىزمەتىنەن كەتتى. ونىڭ قىزمەتتەن كەتەتىنىن بيىلعى اقپان ايىندا حوك اتقارۋشى كوميتەتى قولداعان بولاتىن. دەگەنمەن، توماس باح ءومىر بويىنا حوك-ءتىڭ قۇرمەتتى پرەزيدەنتى بولىپ سايلاندى.
توماس باحتىڭ وكىلەتتىگىن رەسمي تۇردە كيرستي كوۆەنتريگە تاپسىرۋ ءراسىمى 2025 جىلى 23 ماۋسىمدا وتەدى.
ايتا كەتەيىك، حالىقارالىق وليمپيادالىق كوميتەتىنىڭ كەزەكتى سەسسياسىندا بوكستى 2028 جىلى اقش-تىڭ لوس-اندجەلەس قالاسىندا وتەتىن جازعى وليمپيا ويىندارىنىڭ باعدارلاماسىنا قوسۋ تۋرالى شەشىم قابىلداندى.
