ەلورداداعى جيھاز دۇكەندەرىنىڭ بىرىندە جۇمىس ىستەيتىن ساتۋشى ساتىپ الۋشىلاردان تۇسكەن اقشانى يەسىنە تاپسىرۋدىڭ ورنىنا، ءوز قاجەتىنە جاراتىپ وتىرعان. دۇكەن يەسى قارجىنىڭ جەتىسپەۋشىلىگىن بايقاپ، پوليتسياعا حابارلاسقان. ءتارتىپ ساقشىلارى جۇرگىزگەن تەكسەرۋ بارىسىندا كۇدىكتىنىڭ ساتىلىمنان تۇسكەن قاراجاتتىڭ ءبىر بولىگىن كونۆەرتكە سالىپ، جاسىرىن تۇردە الىپ كەتىپ جۇرگەنى انىقتالدى. جالپى العاندا، ول 800 مىڭ تەڭگەگە جۋىق اقشانى قولدى قىلعان.
قازىرگى ۋاقىتتا اتالعان دەرەك بويىنشا قر قىلمىستىق كودەكسىنىڭ 188-بابى نەگىزىندە سوتقا دەيىنگى تەرگەۋ امالدارى جۇرگىزىلۋدە. كۇدىكتى ءوز كىناسىن تولىق مويىندادى. استانا قالاسى پوليتسيا دەپارتامەنتى كاسىپكەرلەرگە تاۋارلىق-ماتەريالدىق قۇندىلىقتاردى ۇرلاۋ دەرەكتەرىنىڭ الدىن الۋ ءۇشىن قاۋىپسىزدىك شارالارىن كۇشەيتۋگە كەڭەس بەرەدى. قۇرىلىس جانە ساۋدا نىساندارىن بەينەباقىلاۋ جۇيەلەرىمەن جابدىقتاپ، كۇزەت دابىلىن ورناتۋ ۇسىنىلادى.
