جەتىسۋ وبلىسىندا بۇگىندە شاعىن جانە ورتا بيزنەستى دامىتۋعا 25 مىڭنان استام كاسىپكەر ايەل ۇلەس قوسۋدا. بۇل شاعىن جانە ورتا بيزنەس سۋبەكتىلەرىنىڭ جالپى سانىنىڭ 45 %-دان استامى. بۇل تۋرالى بۇگىن تالدىقورعاندا «اتامەكەن» كاسىپكەرلەر پالاتاسىندا «ايەل كاسىپكەرلىگى – مەملەكەتتىڭ تىرەگى» تاقىرىبىندا وتكەن «جەتىسۋ Women Forum – 2026» وبلىستىق فورۋمى مەن جوبالار كورمەسىندە ايتىلدى. فورۋمدا ىسكەر ايەلدەر قاۋىمداستىعىنىڭ، مەملەكەتتىك ورگانداردىڭ، قارجى ينستيتۋتتارى مەن قوعامدىق ۇيىمداردىڭ وكىلدەرى باس قوسىپ، جىل قورىتىندىسىن شىعارىپ، تاجىريبە الماستى، سونداي-اق ايەلدەر كاسىپكەرلىگىن دامىتۋدىڭ الداعى باعىتتارىن تالقىلادى، – دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
فورۋمعا قاتىسقان وبلىس اكىمىنىڭ ورىنباسارى دياس ەسداۋلەتوۆ ءوز سوزىندە:
- بۇگىندە جەتىسۋ وبلىسىندا 25 مىڭنان استام ايەل كاسىپكەرلىكپەن اينالىسادى. بۇل شاعىن جانە ورتا بيزنەس سۋبەكتىلەرىنىڭ جالپى سانىنىڭ 45 پايىزىنان استامىن قۇرايدى. بۇل كورسەتكىش رەسپۋبليكالىق دەڭگەيگە جاقىنداپ قالدى. دەگەنمەن بىزدە ودان ءارى دە ءوسۋ الەۋەتى بار. وسى ماقساتتا ايەلدەردىڭ ءوز ءىسىن اشىپ، كاسىپكەرلىگىن كەڭەيتۋىنە قولايلى جاعداي جاساۋعا ۇمتىلىپ وتىرمىز، – دەپ اتاپ ءوتتى د. ەسداۋلەتوۆ.
ونىڭ ايتۋىنشا، شاعىن جانە ورتا بيزنەستى دامىتۋ مەملەكەتتىك ساياساتتىڭ باسىم باعىتتارىنىڭ ءبىرى بولىپ قالا بەرەدى. بۇل رەتتە جەڭىلدەتىلگەن قارجىلاندىرۋ، سۋبسيديالاۋ، وقىتۋ، كونسۋلتاتسيالىق قولداۋ سياقتى قولجەتىمدى كومەك تەتىكتەرى ماڭىزدى ءرول اتقارادى. اسىرەسە، كاسىپكەرلىككە ەندى قادام باسقان ايەلدەرگە جانە اۋىلدىق جەرلەردە ءوز ءىسىن دامىتىپ وتىرعان كاسىپكەر ايەلدەرگە ەرەكشە نازار اۋدارۋ قاجەت.
وسى ورايدا وبلىستىق كاسىپكەرلەر پالاتاسىنىڭ ديرەكتورى داۋرەن وڭالباەۆ ءوز ءىسىن اشۋعا نەمەسە كاسىبىن كەڭەيتۋگە نيەتتى ايەلدەرگە پراكتيكالىق قولداۋ كورسەتۋدە ىسكەر ايەلدەر كەڭەسىنىڭ ايرىقشا ءرول اتقاراتىنىن اتاپ ءوتتى. تەك بيىلدىڭ وزىندە 1 500-دەن استام ايەل وقىتىلعان. ولار مۇندا تاجىريبەلىك داعدىلاردى مەڭگەرىپ، كونسۋلتاتسيالىق كومەك، مەنتورلىق قولداۋ كورسەتىلىپ، جوبالارى سۇيەمەلدەنەدى. ايەلدەر ءۇشىن بۇل وقۋ ءوز كاسىبىن باستاۋعا جاسالعان العاشقى قادام دەۋگە بولادى.
وقىتۋعا «ءبىر اۋىل – ءبىر ءونىم» جوباسىنىڭ تابىستى كاسىپكەر ايەلدەرى دە تارتىلىپ، ولار ءوز كاسىبىن اشۋ مەن دامىتۋ تاجىريبەسىن بولىسەدى. اتاپ وتسەك، جوبا باستالعان 2023 جىلدان بەرى وعان 138 كاسىپكەر قاتىسىپ، ولاردىڭ 25-ءى وڭىرلىك ىرىكتەۋدىڭ فيناليستەرى اتانعان. سونىمەن قاتار 20-دان استام ايەل «اۋىل اماناتى» جوباسى اياسىندا ءتۇرلى گرانتتار مەن جەڭىلدەتىلگەن نەسيەلەر تۇرىندە قارجىلاي قولداۋ العان. بۇل باعىتتاعى جۇمىسقا حالىقتىڭ الەۋمەتتىك وسال توپتارىنا ارنالعان «كاسىپكە جول» جوباسىنىڭ قاتىسۋشىلارى دا تارتىلعان.
فورۋمعا قاتىسۋشىلار ەڭبەگىنىڭ ناقتى ناتيجەلەرى ءىس-شارا اياسىندا ۇيىمداستىرىلعان كورمەدە تانىستىرىلدى. وندا ەت جانە بالىق ونىمدەرى، ءسۇت، نان-توقاش ونىمدەرى، بال، تۇرمىستىق جانە كوسمەتولوگيالىق قۇرالدار، زەرگەرلىك بۇيىمدار، سونداي-اق ۇلتتىق قولونەر تۋىندىلارى ۇسىنىلدى.
كورمەگە وتكەن جىلعى «ءبىر اۋىل – ءبىر ءونىم» جوباسىنىڭ جەڭىمپازى بيبىگۇل الىمبەكقىزى دا قاتىستى. ول ءوز كاسىبىن دامىتۋمەن قاتار، باسقا ايەلدەرگە اشىتقىسىز نان ءپىسىرۋدى ۇيرەتىپ، ولاردىڭ جاڭا داعدىلاردى مەڭگەرۋىنە جانە كاسىپكەرلىككە العاشقى قادام جاساۋىنا كومەكتەسۋدە.
اسەل كۇلبەكوۆا ەكى جىل بويى دامىتىپ كەلە جاتقان جىلىجاي شارۋاشىلىعى جوباسىن تانىستىردى. الەۋمەتتىك كاسىپكەر سۆەتلانا ءزۋبوۆيچتىڭ مەنتورلىق قولداۋىنىڭ ارقاسىندا جوبا ناقتى ىسكە اسىپ، جاڭا جۇمىس ورىندارىن اشۋعا مۇمكىندىك بەردى. ال سانيا قۇرمانعاليەۆا كيىزدەن ويىنشىق جاساۋمەن اينالىسادى.
- مەن كيىزدەن ويىنشىق جاسايمىن. ءار ويىنشىقتى جاساۋمەن اينىلىسىپ كەلە جاتقانىما 7 جىلدان استى. بۇل ءىس ماعان وتە ۇنايدى، ءوز كاسىبىمنەن دەمالامىن. ءار ويىنشىقتى ازىرلەۋگە شامامەن ەكى ساعاتتاي ۋاقىت كەتەدى. تەك تازا ماتەريالداردى پايدالانامىن، سوندىقتان اللەرگيا تۋعىزبايدى. تەك ۇلتتىق مازمۇنداعى ويىنشىقتار عانا ەمەس، سونىمەن قاتار بالالاردى قىزىقتىراتىن زاماناۋي كەيىپكەرلەردىڭ بەينەسىن دە جاسايمىن. سونداي-اق ەتنو-ستيلدەگى شاپاندار، جيلەتتەر، سۋمكالار مەن ارقا قورجىندارىن دا دايىندايمىن. الداعى ۋاقىتتا ءىسىمدى دامىتقىم كەلەدى، - دەدى س. قۇرمانعاليەۆا.
- 20 جىلدان بەرى ومارتاشىلىقپەن اينالىسىپ كەلەمىز. العاشىندا 5 ۇيادان باستادىق، قازىر ولاردىڭ سانىن 300-گە جەتكىزدىك. بالدىڭ 8 ءتۇرىن دايىندايمىز، سونىمەن قاتار پەرگا، كرەمدەر، بالاۋىز شامدارىن شىعارامىز. ءوزىم كوپ بالالى انامىن. وتباسىلىق ىسىمىزگە بالالارىم قولعابىس ەتەدى. شارۋاشىلىقتى ۇلكەن ۇلىمىز جۇرگىزەدى. ال ءبىز جولداسىمىز ەكەۋمىز ءونىمدى وتكىزۋمەن اينالىسامىز. ءبىزدىڭ تاۋارلارىمىزدى تۇتىنۋشىلار كوپ. بۇل - ءبىزدىڭ كۇندەلىكتى قاجىرلى ەڭبەگىمىز بەن ءونىمنىڭ ساپالى شىعارىلۋىنىڭ ناتيجەسى، - دەدى كاسىپكەر يرينا سيۋرا.
جوبالاردىڭ تانىستىرىلىمى قورىتىندىلانعان سوڭ ماراپاتتاۋ ءراسىمى ءوتىپ، وڭىردە ايەلدەر كاسىپكەرلىگىن دامىتۋعا ۇلەس قوسقان بىرقاتار ايەلگە قۇرمەت كورسەتىلدى.
«جەتىسۋ Women Forum – 2026» فورۋمى ايەلدەر كاسىپكەرلىگىنىڭ ءوڭىر ەكونوميكاسىنىڭ ماڭىزدى بولىگى ەكەنىن تاعى ءبىر مارتە دالەلدەدى. كاسىپكەر ايەلدەردىڭ ءبىر الاڭعا توپتاسۋى، ءبىلىم الۋى، تالىمگەرلىك قولداۋ مەن مەملەكەتتىك كومەك تەتىكتەرىنە قول جەتكىزۋى ولاردىڭ تىڭ يدەيالاردى جۇزەگە اسىرۋىنا، جاڭا جۇمىس ورىندارىن اشۋىنا، قالا مەن اۋىلدىق جەرلەردە بيزنەستى دامىتۋىنا جول اشادى.
جەتىسۋ وبلىسى اكىمىنىڭ ءباسپاسوز قىزمەتى
فوتوگراف: دميتري ەروفەەۆ
