سەناتى ءبىلىم جانە بالا قۇقىقتارىن قورعاۋ ماسەلەلەرى جونىندەگى زاڭدى ماقۇلدادى. قر وقۋ-اعارتۋ مينيسترلىگى باستاماشىلىق ەتكەن جاڭا زاڭ جوباسىندا جەكەمەنشىك مەكتەپتەردە وسال وتباسىلار ساناتىنداعى بالالارعا الەۋمەتتىك كومەك كورسەتۋدى ەنگىزۋ كوزدەلگەن. زاڭ جوباسىندا بەس نوۆەللا ۇسىنىلدى، ونىڭ بىرەۋى جەكەمەنشىك مەكتەپتەردە وقيتىن از قامتىلعان وتباسىلار بالالارىنا قاتىستى. وندا ەڭ تومەنگى كۇنكورىس دەڭگەيىنەن تومەن ەمەس مولشەردە قاجەتتى مەكتەپ كەرەك-جاراقتارىمەن قامتاماسىز ەتۋگە باعىتتالعان نورمالار كوزدەلگەن.
«بۇعان دەيىن كومەك تەك مەملەكەتتىك مەكتەپتەردىڭ وقۋشىلارىنا عانا بەرىلەتىن، ال ەندى جەكە مەكتەپتەردە وقيتىن بالالار دا وسىنداي كومەك الاتىن بولادى. بۇل مەكتەپتىڭ مەنشىك نىسانىنا قاراماستان، بارلىق بالالار ءۇشىن ءبىلىم بەرۋدىڭ تەڭ مۇمكىندىكتەرىن قامتاماسىز ەتۋگە باعىتتالعان ماڭىزدى قادام»، - دەپ اتاپ ءوتتى قر وقۋ-اعارتۋ ۆيتسە-ءمينيسترى ەدىل وسپان. ايتا كەتەيىك، بيىلعى جىلى الەۋمەتتىك وسال وتباسىلاردان شىققان 510 مىڭنان استام بالا مەملەكەتتەن كيىم-كەشەك، وقۋ قۇرالدارىن ساتىپ الۋ ءۇشىن قارجىلاي قولداۋ الدى. بۇعان دەيىن وقۋ-اعارتۋ مينيسترلىگى كومەك كورسەتۋ مەحانيزمىن جاقسارتۋ ماقساتىندا اتا-انالاردىڭ ەسەپشوتتارىنا قاراجات اۋدارۋ شارالارىن ەنگىزگەن ەدى. كومەك الۋ ءۇشىن اتا-انا الدىمەن بالاسىنىڭ وقيتىن مەكەمەسىنە ءتيىستى ءوتىنىش بەرۋى قاجەت.
وقۋ-اعارتۋ مينيسترلىگى
