قازاقستان رەسپۋبليكاسىنىڭ باس پروكۋرورى بەرىك اسىلوۆ باس پروكۋراتۋرا جانىنداعى قۇقىق قورعاۋ ورگاندارى اكادەمياسىنىڭ ماگيستراتۋراسى مەن دوكتورانتۋراسى تۇلەكتەرىنە ديپلوم تاپسىرۋدىڭ سالتاناتتى راسىمىنە قاتىستى.
ءىس-شاراعا عىلىم جانە جوعارى ءبىلىم ءمينيسترى ساياسات نۇربەك، قۇقىق قورعاۋ جانە ارناۋلى ورگانداردىڭ باسشىلارى، سونداي-اق Maqsut Narikbayev University, ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى، استانا حالىقارالىق ۋنيۆەرسيتەتى، Astana IT University, ۇلتتىق قورعانىس ۋنيۆەرسيتەتى جانە ىشكى ىستەر مينيسترلىگىنىڭ اكادەمياسى سياقتى جەتەكشى جوعارى وقۋ ورىندارىنىڭ وكىلدەرى قاتىستى.
سوڭعى ون جىلدا اكادەميانىڭ جوعارى وقۋ ورنىنان كەيىنگى ءبىلىم بەرۋ باعدارلامالارى بويىنشا قۇقىق قورعاۋ ورگاندارىنىڭ 534 قىزمەتكەرى ءبىلىم الدى. ونىڭ ىشىندە 459-ى ماگيستراتۋرانى، 75-ءى دوكتورانتۋرانى ءتامامدادى.
اكادەميانىڭ باستى ەرەكشەلىگى – ءارتۇرلى ۆەدومستۆولاردىڭ وكىلدەرى ءبىر اۋديتوريادا ءبىلىم الادى. بۇل قۇقىق قورعاۋ قىزمەتىندەگى ءتۇرلى تاجىريبەلەردى بىرىكتىرىپ، زاڭ جانە ءتارتىپتى قامتاماسىز ەتۋگە نەگىزدەلگەن بىرىڭعاي كاسىبي ىنتىماقتاستىق مادەنيەتى مەن ورتاق ەكوجۇيەنى قالىپتاستىرادى.
سالتاناتتى ءراسىمدى اشا وتىرىپ، باس پروكۋرور بۇگىنگى تۇلەكتەر ەل دامۋىنىڭ تاريحي كەزەڭىندە ءبىلىم الىپ شىققانىن اتاپ ءوتتى.
جاڭا كونستيتۋتسيا ادام قۇقىقتارىن قورعاۋدىڭ ساپالىق جاڭا دەڭگەيىن بەكىتىپ، العاش رەت ادام كاپيتالىن دامىتۋ، عىلىم، ءبىلىم بەرۋ، ازاماتتاردىڭ تسيفرلىق قۇقىقتارى، سونداي-اق پروگرەسستىڭ، يننوۆاتسيالاردىڭ جانە ءبىلىم قۇندىلىقتارىن جاۋاپتى وتانسۇيگىشتىكتىڭ كونستيتۋتسيالىق نەگىزى رەتىندە ايقىندادى.
بەرىك اسىلوۆتىڭ ايتۋىنشا، ءدال وسى وزگەرىستەر قۇقىق قورعاۋ جۇيەسىنىڭ ودان ءارى ەۆوليۋتسياسىنىڭ باعىتىن ايقىندايدى.
«بۇگىندە اكادەميا عىلىمدى، ءبىلىمدى، IT-تەحنولوگيالاردى جانە پراكتيكانى بىرىكتىرەتىن قۇقىق قورعاۋ جۇيەسىنىڭ ينتەللەكتۋالدىق ءارى تەحنولوگيالىق وزەگىنە اينالۋدا. ءبىز تسيفرلىق ورتادا ءتيىمدى جۇمىس ىستەيتىن، قاتەرلەردى جاپپاي سيپات الماي تۇرىپ الدىن الا بولجاي الاتىن جاڭا بۋىن ماماندارىن دايارلاپ جاتىرمىز.
XXI عاسىردا قىلمىسقا جىلدام ارەكەت ەتەتىن ەمەس، ونى الدىن الا بولجاي الاتىن عانا جەڭىسكە جەتەدى. سوندىقتان قۇقىق قورعاۋ جۇيەسىنىڭ بولاشاعى بۇگىننەن – عىلىمي زەرتحانالاردا، اكادەميا اۋديتوريالارىندا جانە جاڭا تەحنولوگيالاردى ازىرلەۋ ورتالىقتارىندا باستالادى»، – دەدى بەرىك اسىلوۆ.
باس پروكۋرور تسيفرلاندىرۋدى دامىتۋ ەلدىڭ جاڭا كونستيتۋتسيالىق مودەلىنە جانە مەملەكەت باسشىسىنىڭ ازاماتتارعا ءمىنسىز قىزمەت ەتۋگە، زاڭ ۇستەمدىگىن قامتاماسىز ەتۋگە ءارى تەحنولوگيالىق تۇرعىدان ەگەمەن، يكەمدى قازاقستان قۇرۋ جونىندەگى ستراتەگيالىق باعىتىنا تولىق سايكەس كەلەتىنىن اتاپ ءوتتى.
پرەزيدەنتتىڭ ءبىلىم بەرۋ مەن عىلىمي زەرتتەۋلەردىڭ ساپاسىن ارتتىرۋ جونىندەگى تاپسىرمالارىن ىسكە اسىرۋ اياسىندا اكادەميا تسيفرلىق كريميناليستيكا، كيبەرقىلمىستاردى تەرگەۋ، ەلەكتروندىق دالەلدەمەلەردى، اشىق دەرەككوزدەردى تالداۋ جانە قۇقىق قورعاۋ قىزمەتىندە جاساندى ينتەللەكتىنى قولدانۋ سالالارىندا ماماندار دايارلاۋدىڭ كەشەندى ەكوجۇيەسىن قالىپتاستىرۋدا.
وسى ماقساتتا تسيفرلىق تەحنولوگيالار جانە كيبەرقىلمىسقا قارسى ءىس-قيمىل ينستيتۋتى قۇرىلىپ، وندا تسيفرلىق كريميناليستيكا مەن كيبەرقىلمىستاردى، ونىڭ ىشىندە كريپتواكتيۆتەردى پايدالانا وتىرىپ جاسالعان قىلمىستاردى تەرگەۋگە ارنالعان بىرەگەي ءبىلىم بەرۋ باعدارلامالارى ازىرلەندى.
تاعى ءبىر ستراتەگيالىق باعىت – قۇقىق قورعاۋ جۇيەسىنىڭ بىرىڭعاي عىلىمي كەڭىستىگىن قالىپتاستىرۋ. بۇگىنگى تاڭدا اكادەميانىڭ باستاماسىمەن 60-تان استام ۆەدومستۆوارالىق عىلىمي زەرتتەۋ جۇرگىزىلدى.
كەلەسى كەزەڭدە عىلىمي-ادىستەمەلىك كەڭەس ازاماتتىق جوعارى وقۋ ورىندارىنىڭ قاتىسۋىمەن ۆەدومستۆوارالىق كەڭەس بولىپ قايتا قۇرىلادى.
بۇل فورمات قۇقىق قورعاۋ جۇيەسىن دامىتۋدىڭ بىرىڭعاي شەشىمدەرىن ازىرلەۋ ءۇشىن عىلىمي الەۋەتتى، پراكتيكالىق تاجىريبەنى جانە زاماناۋي ءبىلىم بەرۋ تاسىلدەرىن بىرىكتىرۋگە مۇمكىندىك بەرەدى.
الداعى ۋاقىتتا اكادەميا زەرتتەۋ ۋنيۆەرسيتەتى مارتەبەسىن الۋدى، حالىقارالىق ىنتىماقتاستىقتى كەڭەيتۋدى، قوس ديپلوم باعدارلامالارى مەن اكادەميالىق ۇتقىرلىقتى دامىتۋدى جوسپارلاپ وتىر.
راسىمگە قاتىسۋشىلارعا كيبەرپوليگوننىڭ، فورسايت-ورتالىقتىڭ، Innovation Lab جانە عىلىمي پرەۆەنتسيا مەن ۆەدومستۆوارالىق ءوزارا ءىس-قيمىل ورتالىعىنىڭ جۇمىسى تانىستىرىلدى.
پيلوتتىق رەجيمدە جۇمىس ىستەيتىن فورسايت-ورتالىق ديپفەيك تەحنولوگيالارىن پايدالانۋ ارقىلى جاسالاتىن الاياقتىققا قارسى ءىس-قيمىل، ۇشقىشسىز جۇيەلەردى دامىتۋ جانە كولەڭكەلى تسيفرلىق نارىقتار ماسەلەلەرى بويىنشا تەرەڭ تالدامالىق زەرتتەۋلەر ازىرلەدى.
Innovation Lab زەرتحاناسى اياسىندا تاجىريبەدە قولدانىلىپ جاتقان 14 قولدانبالى ءونىم (ادىستەمەلىك ۇسىنىمدار مەن الگوريتمدەر) ازىرلەندى. بۇل تاجىريبە وڭىرلىك ProLab زەرتحانالارىنىڭ جەلىسى جانە اۋماقتىق پروكۋراتۋرالارداعى وقۋ-پراكتيكالىق كابينەتتەر ارقىلى كەڭەيتىلۋدە.
اكادەميا پايدالى مودەلدەرگە 20-عا جۋىق پاتەنت الدى. ازىرلەمەلەر قاتارىندا ۇشقىشسىز ۇشۋ اپپاراتتارىنىڭ پروتوتيپتەرى، تەرگەۋ ارەكەتتەرىن جۇرگىزۋگە ارنالعان مامانداندىرىلعان تەحنيكالىق قۇرالدار، سونداي-اق ىزدەستىرۋ ءىس-شارالارى مەن كريميناليستيكالىق زەرتتەۋلەردە قولدانىلاتىن مەتالل زاتتاردى انىقتاۋعا ارنالعان ۇشقىشسىز سۋاستى درونى بار.
ساپار قورىتىندىسىن شىعارا وتىرىپ، بەرىك اسىلوۆ قازىرگى زامانعى مەملەكەتتىڭ قاۋىپسىزدىگىن عىلىمسىز، تەحنولوگياسىز جانە جاساندى ينتەللەكتىسىز قامتاماسىز ەتۋ مۇمكىن ەمەس ەكەنىن اتاپ ءوتتى.
باس پروكۋراتۋرانىڭ ءباسپاسوز قىزمەتى
