شارادا جاڭا كونستيتۋتسيادا كوزدەلگەن جاستار ساياساتىن دامىتۋ، ءبىلىم بەرۋ جۇيەسىن جەتىلدىرۋ، كاسىپكەرلىكتى، جاستاردىڭ قوعامدىق باستامالارىن قولداۋ جانە ءوڭىردى الەۋمەتتىك-ەكونوميكالىق تۇرعىدان دامىتۋداعى كەيىنگى بۋىننىڭ ءرولى كەڭىنەن تالقىلاندى.

ايماق باسشىسى ەلدەگى ساياسي رەفورمالاردىڭ ماڭىزىنا توقتالىپ، جاڭا كونستيتۋتسيانىڭ قابىلدانۋى جاڭا كەزەڭنىڭ باستاۋى ەكەنىن اتاپ ءوتتى.

«بۇل – ادىلەتتى قوعام قۇرۋعا جانە بولاشاققا دەگەن سەنىمدى نىعايتۋعا باعىتتالعان تاريحي شەشىم. مەملەكەت باسشىسى قاسىم-جومارت كەمەلۇلى اتاپ وتكەندەي، ادىلەتتى قازاقستاندى قۇرۋدا ءبىلىمدى، وتانشىل جاستاردىڭ ءرولى ايرىقشا. سوندىقتان جاستاردىڭ ساپالى ءبىلىم الىپ، ەڭبەك ەتۋىنە، كاسىپ باستاۋىنا جانە جان-جاقتى دامۋىنا مەملەكەت جۇيەلى قولداۋ كورسەتىپ وتىر. بيىل جاستار ساياساتىن ىسكە اسىرۋعا جەرگىلىكتى بيۋدجەتتەن 2 ملرد تەڭگە ءبولىندى.

مەملەكەت باسشىسى ايقىنداعان «زاڭ مەن ءتارتىپ»، «ادال ازامات» جانە «تازا قازاقستان» باستامالارىن جۇزەگە اسىرۋدا جاستاردىڭ بەلسەندىلىگى مەن قوعامدىق جاۋاپكەرشىلىگى ەرەكشە ماڭىزدى»، – دەدى مۇرات نالقوجاۇلى.

ەركىن پىكىر الماسۋ كەزىندە جاستار ۇسىنىس-پىكىرلەرىن ورتاعا سالدى. 

وبلىس اكىمى بارلىق ۇسىنىستار جان-جاقتى قارالاتىنىن، جاستار باستامالارىن قولداۋ جۇيەلى جالعاساتىنىن جەتكىزدى. سونىمەن قاتار جاستاردى ءوڭىردىڭ الەۋمەتتىك-ەكونوميكالىق دامۋىنا باعىتتالعان جوبالاردى ىسكە اسىرۋعا بەلسەندى قاتىسۋعا شاقىردى.

ستاتيستيكالىق مالىمەتتەرگە قاراعاندا، وتكەن جىلى وبلىستا 14 پەن 35 ارالىعىنداعى 248 279 جاس ەسەپكە الىنعان، بۇل – جالپى حالىقتىڭ 29,4%-ى. «مەملەكەتتىك جاستار ساياساتىنىڭ 2023-2029 جىلدارعا ارنالعان تۇجىرىمداماسى» اياسىندا جۇيەلى جۇمىس ورىندالۋدا.

جاستاردى ەڭبەككە باۋلۋ ماقساتىندا قۇرىلعان ەڭبەك بريگادالارىنىڭ سانى 30-دان اسىپ، قۇرامىنا 800-دەن استام ادام تىركەلدى. ەڭبەك جاساعىنا الەۋمەتتىك از قامتىلعان وتباسىلاردان شىققان، NEET ساناتىنداعى جاستار دا تارتىلدى.

وبلىستىق جاستار رەسۋرستىق ورتالىعى جانىندا 6 ۇيىرمە مەن كلۋبتار بار. «وقۋشىلار سارايى»، «تەننيس ورتالىعى»، «سىر جۇلدىزدارى» شىعارماشىلىق-يننوۆاتسيالىق اكادەمياسى، «اناعا تاعزىم»، «وتباسى ورتالىعى»، بارلىق اۋدانداعى «رۋحانيات ورتالىقتارىندا» جاستاردىڭ بوس ۋاقىتىن ءتيىمدى وتكىزۋىنە جاعداي جاسالعان.

ءوڭىر جاستارىن قولجەتىمدى باسپانامەن قامتاماسىز ەتۋ جانە جاس وتباسىلاردى قولداۋ ماقساتىندا نۇرلىبەك ماشبەكۇلىنىڭ باستاماسىمەن «سىر جاستارى» جەڭىلدەتىلگەن يپوتەكالىق نەسيە بەرۋ باعدارلاماسى قابىلدانعان. باعدارلاما بويىنشا 35 جاستان اسپاعان، قىزىلوردا وبلىسىندا تۇراقتى تىركەۋى بار جاستار جىلدىق 6% پايىزدىق مولشەرلەمەمەن، ءۇي باعاسىنىڭ 10% جارناسىن جيناپ ءۇي الا الادى. 

ەسكە سالساق، 2024 جىلى 798 ادام قۇجات تاپسىرىپ، جولداما العان 471-ءىنىڭ 100-ءى تولەم قابىلەتتىن راستاپ، ءۇش بولمەلى پاتەر يەسى اتاندى. وتكەن جىلى 691 ادام قۇجات تاپسىرىپ، ونىڭ 453-ءنىڭ قۇجاتى قابىلدانىپ، 300 جاسقا «وتباسى بانك» اق-نان جولداما بەرىلدى. تولەم قابىلەتىن ءساتتى راستاعان جاستار سول جاعالاۋداعى كوپقاباتتى تۇرعىن ۇيدەن پاتەر الدى.  

مەملەكەت باسشىسىنىڭ باستاماسىمەن 2026 جىلدى بۇۇ باس اسسامبلەياسى «ورنىقتى دامۋ جولىندا حالىقارالىق ەرىكتىلەر جىلى» دەپ جاريالادى. سوعان سايكەس حالىقارالىق جانە رەسپۋبليكالىق دەڭگەيدەگى ەكى اۋقىمدى شارا وتەدى.

تامىز ايىنداعى رەسپۋبليكالىق ۆولونتەرلەر سلەتى جاستار مەن ەرىكتىلەردىڭ تاجىريبە الماسۋىنا، جاڭا باستامالاردى تالقىلاۋعا جانە قوعام يگىلىگىنە ارنالعان جوبالاردى دامىتۋعا ارنالادى. سونداي-اق، «مەنىڭ ماماندىعىم – مەنىڭ جەتىستىگىم» تاقىرىبىندا رەسپۋبليكالىق جاس ماماندار فورۋمىن وتكىزۋ جوسپارلانعان.

قازان ايىندا حالىقارالىق «Green Aral: Volunteers for Life» حالىقارالىق ەرىكتىلەر اپتالىعى اياسىندا ارال ماڭى تابيعاتىن قالپىنا كەلتىرۋ جانە ەكولوگيالىق ماسەلەلەردى شەشۋگە باعىتتالعان جوبالار ىسكە اسىرىلادى.

قىزىلوردا وبلىسى اكىمىنىڭ ءباسپاسوز قىزمەتى