جارتىجىلدىقتىڭ قورىتىندىسى بويىنشا وڭىردەگى ەكونوميكالىق ءوسىم 13,8%-دى قۇرادى. نەگىزگى سالالار بويىنشا وڭ ديناميكا تىركەلدى: ونەركاسىپ – 20,6%-عا، ونىڭ ىشىندە وڭدەۋشى ونەركاسىپ – 15,4%-عا، اۋىل شارۋاشىلىعى – 4,3%-عا، قۇرىلىس – 11,5%-عا، تۇرعىن ءۇي قۇرىلىسى – 2,2%-عا، ساۋدا – 3%-عا، كولىك – 11,8%-عا، بايلانىس – 9,6%-عا ءوستى.

ونەركاسىپ ءوندىرىسىنىڭ كولەمى 627,6 ملرد. تەڭگەنى قۇراپ، 2024 جىلدىڭ ساكەس كەزەڭىمەن سالىستىرعاندا 20,6%-عا ارتتى. وڭدەۋشى ونەركاسىپتىڭ ۇلەسى 64%-دى قۇراپ، التى ايدا 401,9 ملرد. تەڭگەنىڭ ءونىمى ءوندىرىلدى.

ەكونوميكالىق ءوسىمنىڭ قوزعاۋشى كۇشتەرى رەتىندە حيميا ونەركاسىبى (1,3 ەسەگە وسكەن), تاماق ونەركاسىبى (1,2 ەسەگە), قۇرىلىس يندۋسترياسى (1,6 ەسەگە), ماشينا جاساۋ (1,5 ەسەگە), قاعاز ءوندىرىسى (1,3 ەسەگە), رەزەڭكە جانە پلاستماسسا بۇيىمدارىن ءوندىرۋ (1,9 ەسەگە) ارتقان.

اۋىل شارۋاشىلىعى سالاسىندا 98,9 ملرد. تەڭگەنىڭ ءونىمى ءوندىرىلىپ، بارلىق اۋدانداردا وڭ ناتيجە بايقالدى.

نەگىزگى كاپيتالعا سالىنعان ينۆەستيتسيالار كولەمى 301,8 ملرد. تەڭگەنى قۇراپ، وتكەن جىلمەن سالىستىرعاندا 48,1%-عا ارتتى. بيىل جالپى قۇنى 175 ملرد. تەڭگەنى قۇرايتىن 30 ينۆەستيتسيالىق جوبانى ىسكە اسىرۋ جوسپارلانعان، ناتيجەسىندە 1143 جاڭا جۇمىس ورنى اشىلادى. قازىرگى ۋاقىتتا 11,5 ملرد. تەڭگەگە 6 جوبا ىسكە قوسىلىپ، 148 جۇمىس ورنى قۇرىلدى.

قۇرىلىس جۇمىستارىنىڭ كولەمى 138,7 ملرد. تەڭگەگە جەتىپ، 11,5%-عا ءوستى. پايدالانۋعا بەرىلگەن تۇرعىن ءۇي كولەمى – 317,7 مىڭ شارشى مەتر، ءوسىم – 2,2%. قازىرگى تاڭدا بيۋدجەت ەسەبىنەن 2550 پاتەرلىك 52 كوپقاباتتى ءۇيدىڭ قۇرىلىسى جۇرگىزىلۋدە.

ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ساندۋعاش ابدراليەۆانىڭ ايتۋىنشا، كەيبىر اۋدانداردا تومەن كورسەتكىشتەر بايقالادى. ءوز كەزەگىندە ەربول قاراشوكەەۆ جۇمىسىنا سالعىرت قاراعان اۋدان اكىمدەرىنە جۇمىستى شيراتۋدى قاتاڭ ەسكەرتتى.

القا ماجىلىسىندە قارجى باسقارماسىنىڭ باسشىسى باتىرحان اكەك تە بايانداما جاساپ، التى اي ىشىندەگى بيۋدجەتتىڭ ورىندالۋىنا جانە ءوڭىردىڭ قارجىلىق كورسەتكىشتەرىنە جۇرگىزىلگەن تالداۋ ناتيجەسىن ۇسىندى.

اۋداندار مەن باسقارمالارعا بيۋدجەت قاراجاتىن قولدانىستاعى زاڭناماعا سايكەس ءتيىمدى ءارى ماقساتتى يگەرۋ بويىنشا تاپسىرمالار بەرىلدى.

وبلىس اكىمى حالىقتىڭ تابىسىن ارتتىرۋ جانە تۇراقتى جۇمىس ورىندارىن اشۋ ءۇشىن مەملەكەتتىك قولداۋ شارالارىن ۇتىمدى پايدالانۋ قاجەت ەكەنىن اتاپ ءوتتى.

– التى ايدىڭ قورىتىندىسىنا سايكەس كەيبىر باسشىلاردىڭ جەكەلەگەن كورسەتكىشتەر بويىنشا ارتتا قالعانىن كورىپ وتىرمىز. بەرىلگەن تاپسىرمالاردىڭ ۋاقىتىلى ورىندالماۋى جانە جۇمىسقا سالعىرت قاراعان باسشىلاردىڭ تارتىپتىك جاۋاپكەرشىلىككە تارتىلاتىندىعىن ەسكەرتەمىن، – دەدى وبلىس اكىمى.

ەربول قاراشوكەەۆتىڭ ايتۋىنشا، ينۆەستيتسيا تارتۋ – باسىم باعىتتاردىڭ ءبىرى بولىپ قالا بەرەدى. اسىرەسە، كولىك لوگيستيكاسىنا ەرەكشە نازار اۋدارۋ قاجەت، سەبەبى بۇل – ينۆەستورلاردىڭ قىزىعۋشىلىعىن ارتتىراتىن فاكتورلار قاتارىندا.

جيىندا ايماق باسشىسى ەلدى مەكەندەردەگى قاۋىپسىزدىك پەن اباتتاندىرۋ جۇمىستارى – حالىقتىڭ بيلىككە دەگەن سەنىمىن ارتتىراتىنىن ەرەكشە اتاپ ءوتتى.

– ءاربىر ەلدى مەكەن جايلىلىق جانە قاۋىپسىزدىك ستاندارتتارىنا ساي بولۋى ءتيىس، – دەپ تۇيىندەدى ەربول قاراشوكەەۆ.