جيىندا 2024–2025 جىلعى جىلىتۋ ماۋسىمىنىڭ قورىتىندىلارى شىعارىلىپ، 2025–2026 جىلعى ماۋسىمعا دايىندىق بارىسى سارالاندى.
2025 جىلدىڭ 14 ساۋىرىندە جىلىتۋ ماۋسىمى اياقتالدى. ماۋسىم بارىسىندا 9 جىلۋ ەنەرگەتيكا كەشەنى مەن 593 اۆتونومدى قازاندىق شتاتتىق رەجيمدە جۇمىس ىستەدى. ناتيجەسىندە 1 737 الەۋمەتتىك ماڭىزى بار نىسان مەن 1 646 كوپقاباتتى تۇرعىن ۇيگە جىلۋ تۇراقتى جەتكىزىلدى.
جىلىتۋ كەزەڭىندە اۆتونومدى قازاندىقتارعا 61,3 مىڭ توننا، تۇرعىندارعا 144,8 مىڭ توننا كومىر جەتكىزىلدى. قىسقى ماۋسىمدا قاتتى وتىن تاپشىلىعى ورىن العان جوق.
جىلۋ كوزدەرى مەن ينجەنەرلىك ينفراقۇرىلىم جەلىلەرىندە 160 تەحنولوگيالىق بۇزۋشىلىق تىركەلىپ، دەر كەزىندە قالپىنا كەلتىرىلدى. جىلۋ جەلىلەرى گيدراۆليكالىق سىناقتان وتكىزىلىپ، انىقتالعان اقاۋلار جوندەلدى.
جازعى كەزەڭدە تاراز قالاسىنداعى 1025 كوپقاباتتى تۇرعىن ءۇيدىڭ 921-ىنە ىستىق سۋ بەرىلدى. قالعان 104 ۇيگە ىستىق سۋ جوندەۋ جۇمىستارى اياقتالعاننان كەيىن بەرىلەدى.
2025-2026 جىلعى جىلىتۋ ماۋسىمىنا دايىندىق جۇمىستارى كەستەگە سايكەس جۇرگىزىلۋدە. قازىرگى ۋاقىتتا 616 اۆتونومدى قازاندىقتا، 1 831 كوپقاباتتى تۇرعىن ءۇي مەن 1 767 الەۋمەتتىك نىساندا ءتيىستى جۇمىستار اتقارىلىپ جاتىر.
وڭىردە جالپى ۇزىندىعى 350,7 شاقىرىم جىلۋ جەلىسى بار. ولاردىڭ توزۋ دەڭگەيى – 54 پايىز.
بيىل 12,75 شاقىرىم جىلۋ جەلىسىن جوندەۋ جوسپارلانعان.
اتاپ ايتقاندا، تاراز قالاسىنداعى م-1 جىلۋ ماگيسترالىنىڭ 1,5 شاقىرىمى، م-3 جىلۋ جەلىسىنىڭ 0,65 شاقىرىمى قايتا جاڭعىرتىلىپ، 15 شاعىناۋدانداعى جىلۋ جەلىلەرى 0,5 شاقىرىمعا كەڭەيتىلۋدە.
سونداي-اق جاڭاتاس قالاسىندا – 0,9 شاقىرىم، قاراتاۋ قالاسىندا – 2,7 شاقىرىم جىلۋ جەلىسىنە جوندەۋ جۇمىستارى جۇرگىزىلۋدە.
كاسىپورىنداردىڭ ينۆەستيتسيالىق باعدارلامالارى اياسىندا قوسىمشا 6,5 شاقىرىم جىلۋ جەلىسىنە اعىمداعى جانە كۇردەلى جوندەۋ جۇرگىزۋ جوسپارلانعان.
جىل سوڭىنا دەيىن جىلۋ جەلىلەرىنىڭ توزۋ دەڭگەيى 53 پايىزعا تومەندەيدى دەپ كۇتىلۋدە.
2025-2026 جىلعى جىلىتۋ ماۋسىمىنا جالپى 191,2 مىڭ توننا كومىر قاجەت. ونىڭ ىشىندە: الەۋمەتتىك نىساندارعا – 56,3 مىڭ توننا، تۇرعىندارعا – 134,9 مىڭ توننا.
باسقوسۋدا تاراز قالاسى مەن اۋدان اكىمدەرىنىڭ، سونداي-اق الەۋمەتتىك سالاعا جاۋاپتى باسقارما باسشىلارىنىڭ الداعى جىلىتۋ ماۋسىمىنا دايىندىق بارىسى بويىنشا ەسەپتەرى تىڭدالدى.
ەربول قاراشوكەەۆ تاراز قالاسىنىڭ اكىمىنە م-1, م-3 جىلۋ ماگيسترالدارى مەن 15-شاعىناۋدانداعى جىلۋ جەلىلەرىن قايتا جاڭعىرتۋ جۇمىستارىن مەرزىمىندە اياقتاۋعا ەرەكشە نازار اۋدارۋدى، بۇل ماسەلەنى جەكە باقىلاۋعا الۋدى تاپسىردى. سونداي-اق جوندەۋ جانە جاڭعىرتۋ جۇمىستارى ساپالى ورىندالىپ، تۇرعىندارعا قولايسىزدىق تۋىنداتپاۋى ءتيىس ەكەنىن اتاپ ءوتتى.
اپپاراتتىق كەڭەستە وبلىس اكىمىنىڭ مويىنقۇم اۋدانى حالقىمەن كەزدەسۋدە جانە جەكە قابىلداۋدا بەرگەن تاپسىرمالارىنىڭ ورىندالۋ بارىسى سارالاندى.
كەڭەس قورىتىندىسى بويىنشا جاۋاپتى تۇلعالارعا جىلىتۋ ماۋسىمىنا دايىندىق شارالارىن تولىق كولەمدە ىسكە اسىرۋ، الەۋمەتتىك نىساندار مەن تۇرعىنداردى قاتتى جانە ديزەل وتىنىمەن قامتاماسىز ەتۋ ماقساتىندا 1 شىلدەگە دەيىن ءتيىستى كەلىسىمشارتتار جاساسۋ، سونداي-اق بەرىلگەن تاپسىرمالاردى مۇلتىكسىز ورىنداۋ تاپسىرىلدى.
