بۇگىن وبلىس اكىمى مۇرات ەرگەشباەۆتىڭ توراعالىعىمەن جالاعاش اۋدانىندا وتكەن اكتيۆ وتىرىسىندا اۋداننىڭ جاڭا باسشىسى تانىستىرىلدى.
قازاقستان رەسپۋبليكاسى پرەزيدەنتى اكىمشىلىگى جانە جالاعاش اۋداندىق ءماسليحاتىنىڭ كەلىسىمدەرى نەگىزىندە وبلىس اكىمىنىڭ وكىمىمەن جالاعاش اۋدانىنىڭ اكىمى لاۋازىمىنا توراليەۆ ەرلان كارىمبەكۇلى تاعايىندالدى.
ايماق باسشىسى اۋداننىڭ بۇرىنعى اكىمى ارداق يبرايموۆقا العىس ءبىلدىرىپ، جاڭا اكىمنىڭ قىزمەتىنە ساتتىلىك تىلەدى، الەۋمەتتىك-ەكونوميكالىق دامۋ باعدارىنا قاتىستى بىرقاتار مىندەت جۇكتەدى.
«ەڭ الدىمەن ينۆەستيتسيا تارتۋ، سالىق بازاسىن ۇلعايتۋ، جاڭا جۇمىس ورىندارىن اشۋ، كاسىپكەرلىكتى دامىتۋ باعىتىنداعى ماڭىزدى جوبالاردى جۇزەگە اسىرىپ، قوعامدىق-ساياسي تۇراقتىلىقتى ساقتاۋدا ناقتى جۇمىستار جۇرگىزۋ قاجەت.
اۋىل شارۋاشىلىعى ونىمدەرىن وندىرۋدە ۇزدىك اۋدانداردىڭ ءبىرى رەتىندە تانىلعان
جالاعاشتىڭ ەرەكشە اگرارلىق پوتەنتسيالى ءتيىمدى پايدالانىلۋى ءتيىس.
سوڭعى جىلدارداعى سۋ تاپشىلىعىن ەسكەرە وتىرىپ، ەگىستى ءارتاراپتاندىرۋ، سۋدى از قاجەت ەتەتىن داقىلدار ەگۋ جانە شارۋاشىلىقتارعا وزىق تەحنولوگيالاردى ەنگىزۋ ماڭىزدى.
سونىمەن قاتار، ۇكىمەت باسشىسىنىڭ تاپسىرماسىنا سايكەس ءىرى شارۋاشىلىقتار تەك ەگىن عانا ەمەس، مال شارۋاشىلىعىن دا دامىتىپ، جىل بويى جۇمىس جاسايتىن جوبالاردى جۇزەگە اسىرۋى كەرەك»، – دەدى مۇرات نالقوجاۇلى.
جيىندا ەل اعالارى يمامزادا شاعىرتاەۆ، سادىق اليەۆ، امىربەك شايماعانبەتوۆ، قابىلبەك نۇرماعانبەتوۆ ىزگى تىلەك ءبىلدىردى.
ەرلان كارىمبەكۇلى 1977 جىلى قىزىلوردا قالاسىندا دۇنيەگە كەلگەن. قورقىت اتا اتىنداعى قىزىلوردا مەملەكەتتىك ۋنيۆەرسيتەتىن «ونەركاسىپ جانە ازاماتتىق قۇرىلىس»، «ەكونوميكا جانە مەنەدجمەنت» ماماندىقتارى بويىنشا تامامداعان.
ەڭبەك جولىن «فارماتسيا» اكتسيونەرلىك قوعامىندا مەنەدجەر بولىپ باستاپ، كەيىن مەملەكەتتىك ورگاندار مەن جەكە سەكتوردا ءتۇرلى جاۋاپتى قىزمەتتەر اتقارعان.
2004-2013 جىلدارى وبلىس اكىمى اپپاراتىنىڭ باس ينسپەكتورى، قىزىلوردا قالاسى اكىمىنىڭ ورىنباسارى، وبلىستىق قۇرىلىس باسقارماسى باسشىسىنىڭ ورىنباسارى، باسقارما باسشىسى جانە وبلىس اكىمىنىڭ كەڭەسشىسى بولدى.
2013-2020 جىلدارى جەكە قۇرىلىس كومپانياسىنىڭ ديرەكتورى، «مەمساراپتاما» رمك باس ديرەكتورىنىڭ ءبىرىنشى ورىنباسارى، سونداي-اق «قازاقستاندىق تۇرعىن ءۇي-كوممۋنالدىق شارۋاشىلىعىن جاڭعىرتۋ جانە دامىتۋ ورتالىعى» اق باسقارما توراعاسىنىڭ ورىنباسارى بولىپ ەڭبەك ەتتى.
2022 جىلدىڭ ءساۋىر ايىنان باستاپ قىزىلوردا وبلىسىنىڭ قۇرىلىس، ساۋلەت جانە قالا قۇرىلىسى باسقارماسىنىڭ باسشىسى قىزمەتىن اتقارىپ كەلدى.
ءباسپاسوز قىزمەتى
