«جايلى مەكتەپ» ۇلتتىق جوباسىن ىسكە اسىرۋ بارىسى وبلىس اكىمدەرى ورىنباسارلارى، ءبىلىم باسقارمالارى باسشىلارى، ورتالىق مەملەكەتتىك ورگانداردىڭ جانە قۇرىلىس وپەراتورى «Samruk Kazyna Construction» اق-نىڭ وكىلدەرىنىڭ قاتىسۋىمەن وتكەن كەڭەستە قارالدى. مەملەكەت باسشىسىنىڭ تاپسىرماسىمەن ەلىمىزدە «جايلى مەكتەپ» ۇلتتىق جوباسى قارقىندى جۇرۋدە. ونىڭ اياسىندا 2026 جىلعا دەيىن 460 مىڭ وقۋشى ورنىنا ارنالعان 217 جاڭا فورماتتاعى مەكتەپ سالۋ جوسپارلانعان.

2024 جىلدىڭ قورىتىندىسى بويىنشا 254 مىڭ وقۋشى ورنىنا ارنالعان 105 مەكتەپ سالىندى. ۇلتتىق جوبانى ىسكە اسىرۋ بارىسىندا ءبىلىم بەرۋ ورتاسىنىڭ فۋنكتسيونالدىعى مەن قاۋىپسىزدىگىنە باسىمدىق بەرىلگەن. باستاۋىش جانە جوعارى سىنىپ وقۋشىلارىنا ارنالعان بولەك بلوكتار قاراستىرىلعان. باستى تالاپتاردىڭ ءبىرى - قازىرگى زامانعى تەحنيكالىق قۇرالداردى ەنگىزۋ ارقىلى قاۋىپسىزدىك شارالارىن كۇشەيتۋ، ەرەكشە ءبىلىم بەرۋ قاجەتتىلىكتەرى بار بالالار ءۇشىن كەدەرگىسىز ورتا قۇرۋ جانە مەكتەپتەردى زاماناۋي پاندىك كابينەتتەرمەن قامتاماسىز ەتۋ. 

كەڭەس قورىتىندىسى بويىنشا مينيستر نىسانداردىڭ ساپالى قۇرىلىسىن جانە ولاردىڭ ۋاقىتىلى پايدالانۋعا بەرىلۋىن قامتاماسىز ەتۋگە تاپسىرما بەردى.