دوستار، وزدەرىڭىز بىلەسىزدەر، 1 ناۋرىز - 2015 جىلى كۇنتىزبەمىزگە العىس ايتۋ كۇنى بولىپ ەندى. 2016 جىلى جالپى حالىقتىق سيپاتتا تويلاندى. قيىن-قىستاۋ زاماندا تەپەرىش كورگەن ەتنوستار مەن جەرگىلىكتى حالىق اراسىنداعى بىرلىك پەن تەڭ دارەجەدەگى دوستىقتى دارىپتەيتىن مەرەيلى كۇننىڭ ماڭىزى وتە زور. اشىعىن ايتۋ كەرەك، كەزىندە قازاق دالاسىنان پانا تاپقان سان ءتۇرلى ۇلت وكىلدەرىنىڭ ۇرپاقتارى ءدال وسى كۇنى قازاق حالقىنا العىس ايتامىز دەگەن باستامانى كوتەرگەن بولاتىن. كەيىن، بالانىڭ اكە-شەشەگە، اتا-انانىڭ بالاعا العىسى، دوستار مەن ارىپتەستەردىڭ ءوزارا العىس ايتۋىنا ۇلاسىپ، حالىقتىق يگى ىسكە اينالدى.

مەملەكەت باسشىسى ق.ج.توقاەۆ «ءوزارا قۇرمەت كورسەتۋ، وزگەگە جاناشىرلىقپەن قاراپ، شىنايى تىلەۋلەس بولۋ – ۇلتىمىزدىڭ بويىنا سىڭگەن قاسيەتتەر. العىس ايتۋ ءداستۇرى ءتول رۋحانياتىمىزدىڭ تەمىرقازىعى رەتىندە ەل ىشىندەگى سەنىم مەن بىرلىكتى نىعايتۋعا زور ىقپال ەتىپ كەلەدى» - دەپ اتاپ وتكەن بولاتىن. راسىندا، ءبىز ءوزارا قۇرمەت پەن جاناشىرلىق سەزىمىن كۇشەيتىپ عانا، ىنتىماق-بىرگىمىزدى ساقتاي الامىز. قازاق ەلىنىڭ تاۋەلسىزدىگىن باياندى ەتە الامىز. قازاقستاندىقتارعا تاۋەلسىزدىك پەن بەيبىت ومىردەن ارتىق قۇندىلىق جوق. سوندىقتان، دوستار! كيەلى وتانىمعا ادال قىزمەت ەتۋ جولىندا بەرەكە –بىرلىك تىلەيمىن. كوكتەمنىڭ مەرەيلى مەرەكەسى ءار شاڭىراققا يگى جاقسىلىعىمەن كەلسىن!