جاز مەزگىلىندە قالالىق قىزمەتتەر مەن ەكولوگتەر ەسىل وزەنى مەن ونىڭ جاعالاۋ اۋماعىن تازارتۋ بويىنشا كەشەندى جۇمىستار جۇرگىزۋدە. وعان بالدىرلار مەن قوقىستى تازارتۋ، سونداي-اق زاماناۋي بيولوگيالىق تازارتۋ ادىستەرىن قولدانۋ كىرەدى، دەپ حابارلايدى استانا اكىمدىگىنىڭ رەسمي سايتى.
مامانداردىڭ مالىمەتىنشە، بيىل ەسىل وزەنىنىڭ جەكەلەگەن ۋچاسكەلەرىندە سۋدىڭ گۇلدەنۋى كوپجىلدىق كورسەتكىشتەردەن اسىپ تۇسكەن. بۇعان اۋا تەمپەراتۋراسىنىڭ قالىپتان تىس جوعارى بولۋى مەن سۋ دەڭگەيىنىڭ تومەندەۋى نەگىزگى سەبەپ بولىپ وتىر.
وزەننىڭ جاعدايىنا سىرتقى فاكتورلار دا اسەر ەتەدى. سۋ ساپاسى قاتتى اعىستا ورنالاسقان تۇستارداعى جاعدايعا دا بايلانىستى.
بۇدان بولەك، ازوت پەن فوسفور قوسىلىستارى سياقتى بيوگەندىك زاتتار، سونداي-اق ورگانيكالىق لاستاعىشتار قوسىمشا سالماق تۇسىرەدى.
ساراپشىلاردىڭ ايتۋىنشا، ەسىل وزەنى مەن ونىڭ سارىبۇلاق جانە اقبۇلاق جىلعالارىنا رۇقساتسىز اعىندى سۋلاردىڭ توگىلۋ ىقتيمالدىعىن دا تولىق جوققا شىعارۋعا بولمايدى. بۇل فاكتورلاردىڭ بارلىعى بالدىردىڭ قارقىندى كوبەيۋىنە ىقپال ەتەدى.
جاعدايدى جەدەل باقىلاۋ ءۇشىن بەيىندى مەكەمەلەر استانا قالاسىنىڭ ەكولوگيا دەپارتامەنتىمەن بىرلەسىپ، پروبلەمالى ۋچاسكەلەرگە تۇراقتى تۇردە تەكسەرۋ جۇرگىزىپ، سۋ سىنامالارىن الادى.
زەرتحانالىق زەرتتەۋ ناتيجەلەرى نەگىزىندە ماماندار سۋ ايدىنىنىڭ قازىرگى جاي-كۇيىن باعالايدى.
وزەن اكۆاتورياسىندا كۇن سايىن سانيتارلىق تازالاۋ جۇمىسى جۇرگىزىلەدى. قامىس شاباتىن تەحنيكالار، سۋ وسىمدىكتەرىن جيناۋعا ارنالعان ارنايى پونتوندار مەن ءجۇزۋ قۇرالدارى بالدىرلار كوپ جينالعان ۋچاسكەلەردى تازارتۋ ءۇشىن پايدالانىلادى. اسىرەسە جاعالاۋ بويىنداعى حالىق كوپ دەمالاتىن ورىندارعا ەرەكشە نازار اۋدارىلادى. سونىمەن قاتار جاعالاۋ اۋماعى تۇراقتى تۇردە تازارتىلىپ وتىرادى.
سۋ اينالىمى باياۋ، تۇرىپ قالعان ۋچاسكەلەردە جاسىل ميكروبالدىر – حلورەللا سۋسپەنزياسىن قولدانۋ جوسپارلانىپ وتىر.
بۇل ءادىس حيميالىق زاتتاردى قولدانۋعا ەكولوگيالىق تۇرعىدان قاۋىپسىز بالاما رەتىندە قاراستىرىلادى. حلورەللا ازوت پەن فوسفور قوسىلىستارىن – كوك-جاسىل بالدىرلاردىڭ كوبەيۋىنە ىقپال ەتەتىن قورەكتىك زاتتاردى بەلسەندى تۇردە سىڭىرەدى. سونىڭ ناتيجەسىندە ولاردىڭ ءوسۋىن تەجەپ، سۋ ايدىنىنداعى تابيعي بيولوگيالىق تەپە-تەڭدىكتىڭ قالپىنا كەلۋىنە ىقپال ەتەدى.
فوتوسينتەز پروتسەسى كەزىندە حلورەللا سۋدى وتتەگىمەن بايىتىپ، بالىقتار مەن باسقا دا سۋ جانۋارلارى ءۇشىن قولايلى ورتا قالىپتاستىرادى. سونداي-اق سۋدىڭ تابيعي جولمەن وزدىگىنەن تازارۋىنا اسەر ەتەدى.
مامانداردىڭ ايتۋىنشا، قولدانىلاتىن حلورەللا سۋسپەنزياسى ۋلى ەمەس ءارى سۋ ەكوجۇيەسىنە، ونىڭ ىشىندە بالىقتارعا، قۇستارعا جانە سۋ وسىمدىكتەرىنە قاۋىپسىز.
ەكولوگتار حلورەللانى قولدانۋدىڭ ناتيجەسى بىردەن بايقالمايتىنىن اتاپ ءوتتى.
بيولوگيالىق تەپە-تەڭدىكتىڭ قالپىنا كەلۋى بەلگىلى ءبىر ۋاقىتتى قاجەت ەتەدى، ال العاشقى ناتيجەلەر سۋسپەنزيا ەنگىزىلگەننەن كەيىن بىرنەشە اپتادان سوڭ كورىنە باستايدى.
استانا اكىمدىگىنىڭ ءباسپاسوز قىزمەتى
