ايماق باسشىسىنىڭ جەكە قابىلداۋىنا قالالار مەن اۋدانداردا 139 ادام جۇگىندى. اشىق ديالوگ تۇيىتكىلدى پروبلەمالاردى شەشۋگە باعىتتالعان ماسەلەلەر شەڭبەرىن انىقتاۋعا كومەكتەسەدى. قورىتىندى كەزدەسۋ ساران قالاسىندا، قالالىق مادەنيەت ۇيىندە ءوتتى.

– جالپى ايتقاندا ساران قالاسى دامىپ كەلەدى، بىراق ءالى دە جۇمىس ىستەۋ كەرەك. ءبىرىنشى كەزەكتە بۇل تكش جاڭعىرتۋ، ينجەنەرلىك ينفراقۇرىلىمدى جاڭارتۋ ماسەلەلەرى. سۋ قۇبىرى جەلىلەرىن قايتا جاڭارتۋ جۇرگىزىلۋدە، ەكىنشى سۋ تاراتقىشتى جاڭعىرتۋ جۇمىستارى باستالدى. بۇل جوبالار قالانى تۇراقتى سۋمەن قامتاماسىز ەتۋ ءۇشىن كەلەسى جىلى اياقتالۋى ءتيىس، – دەپ اتاپ ءوتتى ەرماعانبەت بولەكپاەۆ.

جىلۋمەن جابدىقتاۋ ماسەلەسى دە كۇن تارتىبىنەن الىنبايدى. مەردىگەر جابدىقتى رەتتەۋدى جالعاستىرۋدا. جىلۋ كوزىنىڭ جوسپارلى قۋاتقا شىعۋى تۇراقتى باقىلاۋدا قالادى. ەلەكتر جەلىلەرىن جاڭارتۋمەن اينالىسۋ قاجەت. ەكونوميكانى ءارتاراپتاندىرۋدىڭ ارقاسىندا ساران مونوقالالار ساناتىنان شىقتى. قازىرگى ۋاقىتتا Saran سولتۇستىك ونەركاسىپتىك جانە يندۋستريالىق ايماعىنىڭ الاڭدارىندا جالپى قۇنى 380 ملرد تەڭگەگە جۋىق 9 ينۆەستيتسيالىق جوبا ىسكە اسىرىلۋدا، 6 مىڭعا جۋىق جۇمىس ورنى قۇرىلدى.

كەزدەسۋدە تۇرعىندار يندۋستريالىق ايماقتان قاراعاندىعا جەكە جول سالۋعا بولا ما دەپ سۇرادى. بۇل جاعدايدا اۋىر جۇك ماشينالارى قازىرگى نەگىزگى جولدى توزدىرمايدى. جوبانىڭ مۇمكىندىكتەرى زەرتتەلەتىن بولادى. سونداي-اق، تۇرعىن ءۇي-كوممۋنالدىق سالا، كولىك ماسەلەلەرى كوتەرىلدى. ولاردىڭ بىرقاتارىن شەشۋ ءۇشىن وبلىس اكىمى بىردەن تاپسىرما بەردى.  قالانىڭ جاڭا اكىمى دارىن بۇلقايىردىڭ الدىنا اباتتاندىرۋ، تازالىق جانە ءتارتىپ ورناتۋ مىندەتتەرى قويىلدى. ونىڭ ىشىندە اۋلالار، ۇيلەردىڭ قاسبەتتەرى بويىنشا باعدارلاما بولۋى ءتيىس.

– جىل باسىنان بەرى بارلىق قالالار مەن اۋدانداردا كەزدەسۋلەر وتكىزدىم. بارلىق جەردە وزەكتى ماسەلەلەر كوتەرىلەدى. نەگىزىنەن بۇل تكش، تۇرعىن ءۇي، اباتتاندىرۋعا قاتىستى سۇراقتار. ءبىزدىڭ وبلىس تۇرعىندارىن مازالايتىن كۇندەلىكتى ماسەلەلەر. الداعى ۋاقىتتا ءالى قورىتىندى جاساۋىمىز كەرەك. كەيبىرى شەشىلدى. شەشۋ جولدارىن ازىرلەۋ ءۇشىن بەلگىلى ءبىر زەرتتەۋ مەن تالداۋدى قاجەت ەتەتىن ماسەلەلەر بار، – دەدى ەرماعانبەت بولەكپاەۆ.