ايتۋلى وقيعا مەملەكەت باسشىسى قاسىم-جومارت توقاەۆتىڭ ەرەۆانعا جاساعان رەسمي ساپارى بارىسىندا قول جەتكىزىلگەن مەملەكەتتەر باسشىلارى اراسىنداعى كەلىسىم ناتيجەسىندە جۇزەگە استى.
سالتاناتتى ءىس-شاراعا قازاقستان رەسپۋبليكاسىنىڭ رەسمي دەلەگاتسياسىن باستاپ بارعان قر مادەنيەت جانە اقپارات ءمينيسترى ايدا بالاەۆا، ارمەنيا رەسپۋبليكاسىنىڭ ءبىلىم، عىلىم، مادەنيەت جانە سپورت ءمينيسترى جاننا اندرەاسيان، ەرەۆان قالاسى مەرىنىڭ ءبىرىنشى ورىنباسارى ارمەن پامبۋحچيان، قازاقستان رەسپۋبليكاسىنىڭ ارمەنيا رەسپۋبليكاسىنداعى توتەنشە جانە وكىلەتتى ەلشىسى بولات يمانباەۆ، سونداي-اق قوس ەلدىڭ زيالى قاۋىم وكىلدەرى، جەرگىلىكتى تۇرعىندار مەن ارميان استاناسىنىڭ قوناقتارى قاتىستى.
ساياباقتىڭ اشىلۋ سالتاناتىندا قىسقاشا ءسوز سويلەگەن ايدا بالاەۆا ارمەنيا بيلىگىنە جانە جوبانىڭ جۇزەگە اسۋىنا اتسالىسقان بارلىق ازاماتتارعا العىسىن ءبىلدىردى. مينيستر بۇل وقيعانىڭ ەكى ەل اراسىنداعى مادەني ىنتىماقتاستىقتىڭ جاڭا كەزەڭىن بىلدىرەتىنىن اتاپ ءوتتى.
- ءبىز بۇگىن تاريحي وقيعانىڭ كۋاسى بولىپ وتىرمىز. ارمەنيا استاناسىندا قازاقتىڭ ۇلى اقىنى ءارى ويشىلى اباي قۇنانبايۇلىنا ارنالعان ساياباق اشىلدى. قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ ارمەنيا رەسپۋبليكاسىنا رەسمي ساپارى اياسىندا استانا قالاسىنداعى ءبىر كوشەگە ارميان ءالىپبيىنىڭ نەگىزىن قالاۋشى مەسروپ ماشتوتس ەسىمىن بەرۋ تۋرالى ەكىجاقتى كەلىسىم جاسالعانى بەلگىلى. بۇگىن ءبىز سول كەلىسىمنىڭ، دوستىق پەن تىعىز مادەني بايلانىستاردىڭ ايقىن كورىنىسىنە اينالعانىن كورىپ وتىرمىز، - دەدى قر مادەنيەت جانە اقپارات ءمينيسترى.
سالتاناتتى ءىس-شارا اياسىندا قازاقستان مەن ارمەنيا مينيسترلەرى ەكى ەل اراسىنداعى مادەني بايلانىستاردىڭ تامىرى تەرەڭدەپ، بولاشاقتا ودان ءارى نىعايا تۇسەتىنىنىڭ نىشانى رەتىندە ساياباققا اعاش وتىرعىزدى.
ايتا كەتەيىك، ابايعا ارنالعان ەسكەرتكىشتەر، بيۋستتەر مەن مەموريالدىق تاقتالار الەمنىڭ ونداعان ەلىندە – بوسنيا جانە گەرتسەگوۆينا، گەرمانيا، گرۋزيا، يران، كورەيا، قىتاي، قىرعىزستان، ۆەنگريا، ەگيپەت، وزبەكستان، رۋمىنيا، تۇركيا، تۇرىكمەنستان، فرانتسيا، شۆەيتساريا جانە تاتارستاندا (رەسەي) ورناتىلعان.
مەرەكەلىك ءىس-شارا سوڭى اباي قۇنانبايۇلىنىڭ «سەگىز اياق» شىعارماسىن ورىنداعان قازاقستاننىڭ دومبىراشىلار ءانسامبلى مەن اۆان مادەنيەت ءۇيىنىڭ جاس ونەرپازدارىنىڭ كونتسەرتىمەن جالعاستى. سونىمەن قاتار قوناقتار قازاق حالقىنىڭ ۇلتتىق مادەنيەتىمەن، زاماناۋي ادەبيەتىمەن جانە ءداستۇرلى تاعامدارىمەن تانىستى.
بۇگىن مينيستر ايدا بالاەۆا باستاعان قازاقستاندىق دەلەگاتسيا مەسروپ ماشتوتس اتىنداعى كونە قولجازبالار عىلىمي-زەرتتەۋ ينستيتۋتى – ماتەنادارانعا بارىپ، ارميان حالقىنىڭ ەجەلگى جازبا مۇراسىمەن، ونىڭ ىشىندە ارميان ءالىپبيىنىڭ نەگىزىن قالاۋشىنىڭ قولتاڭباسى بار دەلىنەتىن مانۋسكريپتتەرمەن تانىستى.
مادەني كۇندەر بۇگىن ەرەۆان قالاسىنداعى ارام حاچاتۋريان اتىنداعى ورتالىق كونتسەرت زالىندا وتەتىن گالا-كونتسەرتپەن قورىتىندىلانادى.
مادەنيەت جانە اقپارات مينيسترلىگىنىڭ ءباسپاسوز قىزمەتى
