بۇگىن ەڭبەك كۇنى قارساڭىندا وبلىس اكىمى نۇرلىبەك نالىباەۆتىڭ قاتىسۋىمەن قىزىلورداداعى ونەر ورتالىعىندا «ادال ەڭبەك – ادال ازامات» اتتى سالتاناتتى شارا ۇيىمداستىرىلدى. وعان قر پارلامەنتى سەناتىنىڭ دەپۋتاتى ن.بايقاداموۆ، ءماجىلىس دەپۋتاتى م.ابەنوۆ پەن قۇقىق قورعاۋ ورگاندارىنىڭ باسشىلارى، قالا، اۋدان اكىمدەرى، ەڭبەك ارداگەرلەرى، زيالى قاۋىم، شارۋاشىلىق وكىلدەرى قاتىستى.

سالتاناتتى جيىندا ايماق باسشىسى «ۇلگىلى ەلدى مەكەن» وبلىستىق كونكۋرسى جەڭىمپازدارىنا 19 ارنايى كوممۋنالدىق تەحنيكا جانە قارجىلاي سىياقى تابىستادى.

«پرەزيدەنتىمىزدىڭ باستاماسىمەن قولعا الىنعان  «تازا قازاقستان» جالپىۇلتتىق ەكولوگيالىق باعدارلاماسى وڭىرىمىزدە قارقىندى جۇزەگە اسۋدا. قالامىزداعى، اۋدان ورتالىقتارىنداعى، اۋىلدارداعى پاركتەر، سكۆەرلەر مەن اللەيالاردى، كوپقاباتتى تۇرعىن ۇيلەردىڭ اۋلالارىن اباتتاندىرۋدامىز. اۋا رايىنىڭ قولايسىزدىعىنا قاراماستان، تىنىمسىز ەڭبەك ەتكەن جەرلەستەرىمىزدىڭ ارقاسىندا وبلىسىمىز تازا ءارى كوركەم ايماققا اينالىپ كەلەدى.

«اۋىل – ەل بەسىگى»، - دەپ دانا حالقىمىز بەكەر ايتپاعان. اۋىلدى دامىتۋ – مەملەكەتتىك ساياساتتىڭ اسا ماڭىزدى ستراتەگيالىق ماقساتتارىنىڭ ءبىرى.

ەلدى مەكەندەردى دامىتۋ، ونىڭ ىشىندە اۋىلداعى اعايىننىڭ ءومىر ساپاسىن جاقسارتۋ، قولايلى ورتا قالىپتاستىرۋ، اۋىلداعى كوركەيتۋ-كوگالداندىرۋ جۇمىستارىن ىنتالاندىرۋ ماقساتىندا 2023 جىلدان باستاپ ءداستۇرلى تۇردە «ۇلگىلى ەلدى مەكەن» كونكۋرسى وتكىزىلۋدە.

بيىل 564 ملن. تەڭگەگە 19 تەحنيكا ساتىپ الىندى.

ءار اۋدانداعى ءبىر اۋىلدى اباتتاندىرۋ، كوركەيتۋ جۇمىستارىنا 100 ملن. تەڭگەدەن استام قارجى بەرىلەدى.

اۋىل-ايماقتىڭ اجارىن ايشىقتاپ، كەلبەتىن كوركەم ەتۋگە باعىتتالعان «ۇلگىلى ەلدى مەكەن» كونكۋرسى الداعى ۋاقىتتا دا ءداستۇرلى تۇردە جالعاسادى.

كەلەر جىلى كونكۋرستى وتكىزۋگە وبلىستىق بيۋدجەتتەن

500 ملن. تەڭگەدەن استام قارجى بولىنەدى.

بىرلىكتىڭ تۋىن بيىك ۇستاپ، تۋعان جەرىمىزدىڭ كەلبەتىن كوركەيتۋ جولىندا ايانباي قىزمەت ەتىپ جۇرگەن ەڭبەك ادامدارىن ءاردايىم قۇرمەتتەيمىز!»، - دەدى ن.نالىباەۆ.

جىل سايىن ءداستۇرلى تۇردە وتەتىن «ۇلگىلى ەلدى مەكەن» كونكۋرسىنىڭ «ۇلگىلى اۋىل» نوميناتسياسى بويىنشا 1-ورىندى سىرداريا اۋدانىنىڭ ناعي ءىلياسوۆ اۋىلى، 2-ورىندى ارال اۋدانىنىڭ قىزىلجار اۋىلى، 3-ورىندى قارماقشى اۋدانىنىڭ اقجار اۋىلى جەڭىپ الدى.

«ۇلگىلى اۋدان» نوميناتسياسى بويىنشا 1-ورىندى شيەلى كەنتى، 2-ورىندى ايتەكە بي كەنتى، 3-ورىندى جاڭاقورعان كەنتى يەلەندى.

تىرەك جانە سەرىكتەس ەلدى مەكەندەر ساناتىنا كىرمەيتىن اۋىلداردىڭ اباتتاندىرۋ جوبالارىن قارجىلاندىرۋعا 15 ملن.تەڭگەنىڭ سەرتيفيكاتتارى تابىستالدى. اتاپ ايتساق، ارال اۋدانىنىڭ اقباي، قازالى اۋدانىنىڭ بوزكول، قارماقشى اۋدانىنىڭ قۋانداريا، جالاعاش اۋدانىنىڭ جاڭاداريا، سىرداريا اۋدانىنىڭ ىڭكارداريا، شيەلى اۋدانىنىڭ مايلىتوعاي جانە جاڭاقورعان اۋدانىنىڭ قىراش اۋىلدارىنا بەرىلدى.

ەسكە سالايىق، سوڭعى ەكى جىلدا كونكۋرس جەڭىمپازدارىنا 1 ملرد. 500 ملن. تەڭگەنىڭ كۇندەلىكتى ەل تۇرمىسىنا قاجەتتى زاماناۋي ۇلگىدەگى 48 ارنايى تەحنيكاسى تابىستالعان بولاتىن.

قىزىلوردا وبلىسى اكىمىنىڭ ءباسپاسوز قىزمەتى