ەلوردانىڭ سارايشىق اۋدانىندا بەلسەندى ۇزاق ءومىر ءسۇرۋ ورتالىعى اشىلدى

استانا قالاسىنىڭ سارايشىق اۋدانى بويىنشا الەۋمەتتىك قىزمەت كورسەتۋ ءبولىمى 1 ساۋىردەن باستاپ ءوز جۇمىسىن باستادى، دەپ حابارلايدى ەلوردا اكىمدىگىنىڭ رەسمي سايتى.

زەينەتكەرلەر ءۇشىن تەگىن ۇيىرمەلەر مەن سەكتسيالار جۇمىس ىستەيدى. بۇگىندە وڭالتۋ گيمناستيكاسى، ترەناجەرلىك زال، يوگا، سكانديناۆيالىق سەرۋەن، توعىزقۇمالاق، شاحمات، تەننيس، ەڭبەك تەراپياسى، الەۋمەتتىك جەلىلەر ۇيىرمەلەرى مەن پروفيلاكتيكالىق ماسساج بار.

بۇگىن وڭالتۋ گيمناستيكاسى مەن تەننيستەن، توعىزقۇمالاقتان، ەگدە جاستاعى ادامدارعا ارنالعان فيتنەستەن العاشقى ساباقتار ءوتتى.

ورتالىققا زەينەتكەرلەردى تىركەۋ 17 ناۋرىزدان باستالدى، قازىرگى ۋاقىتتا سارايشىق اۋدانى بويىنشا 60 ادام تىركەلدى. ورتالىققا كەلىپ تىركەلۋ ءۇشىن زەينەتكەردىڭ جەكە كۋالىگى، زەينەتكەر كىتاپشاسى، استانا قالاسىندا تۇرعىلىقتى جەرى بويىنشا تىركەۋى بولۋ قاجەت.

الداعى ۋاقىتتا سارايشىق اۋدانىندا الەۋمەتتىك-ساۋىقتىرۋ، الەۋمەتتىك-ەڭبەك، الەۋمەتتىك-اۋەسقوي باعىتىندا ۇيىرمەلەر اشۋ جوسپاردا بار.

ورتالىق فيليالدارى الماتى اۋدانى بويىنشا ر.قوشقارباەۆ كوشەسى، 29/1 ۇيدە، بايقوڭىر اۋدانى بويىنشا اباي كوشەسى، 46 ۇيدە، ەسىل اۋدانى بويىنشا دوستىق كەشەسى، 13 ۇيدە، سارىارقا اۋدانى بويىنشا بەيبىتشىلىك كوشەسى، 25 ۇيدە، نۇرا اۋدانى بويىنشا تولە بي كوشەسى، 44 ۇيدە ورنالاسقان.

بۇگىندە 15 مىڭنان استام قالا زەينەتكەرى تەگىن ۇيىرمەلەر مەن سەكتسيالارعا قاتىسۋدا.

ءبولىسۋ
وقي وتىرىڭىز