ورتالىقتىڭ الماتى اۋدانىنا قاراستى فيليالىنداعى ارت-ستۋديادا ءدارىس الىپ جۇرگەن 30 زەينەتكەر «قىس كەلبەتى» تاقىرىبىندا ءوز كارتينالارىن ۇسىندى. بۇگىندە زەينەتكەرلەردىڭ قولىمەن دايىندالعان سۋرەت كورمەسىن ورتالىققا كەلۋشى قىزمەت الۋشىلار مەن قالا تۇرعىندارى تاماشالاۋدا.
زەينەتكەرلەر «قىسقى قيال» كورمەسىنە دايىندىقتى ءۇش اي بۇرىن باستاعان. العاشقى قار تۇسكەن ۋاقىتتان باستاپ ولار قىستى، العاشقى قاردى، مۇزدى، قار ۇيىندىلەرىن، تاڭعاجايىپ ۋاقىتتى، تابيعاتتىڭ سۇلۋ قۇبىلىستارىن اڭعارىپ، قاعاز بەتىنە تۇسىرە بىلگەن.
«ارت-تەراپيانىڭ ەگدە جاستاعى ادامدار ءۇشىن پايداسى زور. سۋرەت ارقىلى ادامنىڭ ىشكى شىعارماشىلىعىن ىسكە قوسۋعا، ەستە ساقتاۋ قابىلەتىن، زەيىنىن جاقسارتۋعا بولادى. ءبىز بەينەلەۋ ساباقتارىن كۇن سايىن وتكىزەمىز. ستۋديامىزعا سۋرەت سالۋدى ۇيرەنگىسى كەلەتىن زەينەتكەرلەر كەلەدى. ولاردىڭ اراسىندا زەينەت جاسىندا سۋرەت سالۋدى ۇيرەنگەن، بەلسەندى، ءارى قابىلەتتى زەينەتكەرلەر دە بار. اسىرەسە، مادەني اساتوۆا، ماريا سەريموۆا، سالتانات مىرزاباەۆا مەن گاۋھار كاماليەۆا ىنتاسىن ەرەكشە اتاپ وتكىم كەلەدى»، - دەدى ۇيىرمە جەتەكشىسى ايگۇل قوجاحمەتوۆا.
