ەلوردانىڭ الماتى اۋدانىندا «حالىق قاتىساتىن بيۋدجەت» باعدارلاماسى اياسىندا عابيدەن مۇستافين كوشەسى، 5/1 مەكەنجايىندا ورنالاسقان ءۇشىنشى كۇردەلى اباتتاندىرىلعان اۋلا پايدالانۋعا بەرىلدى، دەپ حابارلايدى ەلوردا اكىمدىگىنىڭ رەسمي سايتى.

2026 جىلعا ارنالعان «حالىق قاتىساتىن بيۋدجەت» باعدارلاماسىنىڭ قورىتىندىسى بويىنشا اتالعان مەكەنجايدا ورنالاسقان تۇرعىن ءۇي تۇرعىندارى «100+ پاتەر» ساناتىندا 2-ورىن يەلەنگەن.

سونىڭ ناتيجەسىندە بيىل اۋلا اۋماعىندا كەشەندى اباتتاندىرۋ جۇمىسى جۇرگىزىلدى.

سالتاناتتى ءىس-شاراعا الماتى اۋدانى اكىمىنىڭ ورىنباسارى ماقسات تاسبولات، استانا قالاسى ءماسليحاتىنىڭ دەپۋتاتى ازامات ومىرزاقوۆ جانە اۋدان تۇرعىندارى قاتىستى.

اۋلادا تۇرعىنداردىڭ جايلى دەمالىسىنا ارنالعان ينفراقۇرىلىم تولىق جاڭارتىلدى. اتاپ ايتقاندا، اۋماققا جاڭا اسفالت توسەلىپ، كەسپەتاسپەن جابدىقتالعان تروتۋارلار سالىندى. سونداي-اق بورديۋرلەر مەن پاليسادتار جاڭارتىلىپ، بالالار الاڭىنا زاماناۋي ويىن كەشەندەرى مەن شاعىن ساۋلەتتىك نىساندار ورناتىلدى. الاڭعا تارتان جابىنى توسەلىپ، كوگالداندىرۋ جۇمىسى جۇرگىزىلگەن.

بۇدان بولەك، اۋلادا workout ەلەمەنتتەرى بار زاماناۋي سپورتتىق-جاتتىعۋ ايماعى جابدىقتالىپ، ورىندىقتار مەن قوقىس جاشىكتەرى ورناتىلدى.

ءىس-شارادا العاشقى بولىپ ءسوز العان الماتى اۋدانى اكىمىنىڭ ورىنباسارى ماقسات تاسبولات تۇرعىنداردى اۋلانىڭ جاڭارتىلۋىمەن قۇتتىقتادى.

«قۇرمەتتى تۇرعىندار! يگىلىكتەرىڭىزگە بەرىلىپ جاتقان جاڭارتىلعان اۋلادا بالالارىڭىز اسىر سالىپ ويناپ، ءوسىپ-ونە بەرىڭىزدەر. وسى اۋلادان بولاشاقتا ەلىمىزدىڭ تۋىن بيىككە كوتەرەتىن سپورتشىلار شىقسىن. سىزدەردى شىن جۇرەكتەن قۇتتىقتايمىن»، – دەدى ماقسات تاسبولات.

ءوز كەزەگىندە استانا قالاسى ءماسليحاتىنىڭ دەپۋتاتى ازامات ومىرزاقوۆ باستاماشىل توپقا العىسىن ءبىلدىردى.

«بۇل جاي عانا اۋماق ەمەس، بۇل – ءبىرىنشى كەزەكتە وتباسى مۇشەلەرى كورشىلەردىڭ ورتاسىندا تاماشا كەشتەردى بىرگە وتكىزۋگە، بالالاردىڭ بوس ۋاقىتىن قىزىقتى وتكىزۋىنە ارنالعان بىردەن-ءبىر ورىن. اۋلانى جاڭعىرتۋعا زور ۇلەس قوسقان باستاماشىل توپقا، مەردىگەر ۇيىمعا، اۋدان اكىمدىگىنە العىس بىلدىرەمىز»، – دەدى ازامات ومىرزاقوۆ.

اۋدان اكىمدىگىنىڭ مالىمەتىنشە، الماتى اۋدانىندا «حالىق قاتىساتىن بيۋدجەت» باعدارلاماسى اياسىندا جۇزەگە اسىرىلىپ جاتقان بارلىق اۋلا 1 ماۋسىمعا دەيىن اياقتالىپ، پايدالانۋعا بەرىلەدى.