«QazaqGaz Aimaq» اق استانا وندىرىستىك فيليالىنىڭ كۇشىمەن تۇرعىن ءۇي ءماسسيۆىنىڭ تاراتۋ جەلىلەرىنە گاز العاش رەت قوسىلدى، وندا 458 ءۇي كوگىلدىر وتىنعا قول جەتكىزدى. بۇل حالىقتىڭ ءومىر ءسۇرۋ ساپاسىن جانە ەكولوگيالىق جاعدايىن جاقسارتۋعا باعىتتالعان قالانى گازداندىرۋدىڭ اۋقىمدى جوباسىنىڭ بولىگى بولىپ سانالادى.

جوبا اياسىندا 8,7 كم گاز تاراتۋ جەلىسى سالىنىپ، 277 گاز تاراتۋ شكاف پۋنكتى ورناتىلدى.

جىلىتۋعا ۋاقىتىندا حالىقتىڭ كوممۋنالدىق قىزمەتتەرگە بايلانىستى شىعىندارى ايتارلىقتاي ازايادى. تابيعي گاز ەكولوگيالىق قاۋىپسىزدىكتەن بولەك، قولجەتىمدى جانە ىڭعايلى وتىن بولىپ سانالادى.

«استانانى گازداندىرۋ – بۇل ەكولوگيالىق جاعدايدى جاقسارتاتىن جانە حالىقتىڭ قارجىسىن ۇنەمدەۋگە مۇمكىندىك بەرەتىن ستراتەگيالىق جوبا. ءبىز ناقتى ناتيجەلەردى كورىپ وتىرمىز جانە تاعى ءبىر ەلدى مەكەن كوگىلدىر وتىنعا قوسىلعانىنا قۋانىشتىمىز»، – دەپ اتاپ ءوتتى قالا اكىمدىگىنىڭ گازداندىرۋ ءبولىمىنىڭ باسشىسى راقىمجان التىنبەك.

بۇعان دەيىن اكىمدىك گازداندىرۋدىڭ ەكى كەزەگىنىڭ قۇرىلىسىن اياقتادى. ولار – سارىارقا اۋدانى (كوكتال-1, كوكتال-2 ەلدى مەكەندەرى، اگروقالاشىق جانە قالانىڭ ەسكى بولىگىندەگى پوتانين كوشەسىنىڭ اۋماعى), الماتى اۋدانى (جەلەزنودوروجنىي، پرومىشلەننىي ەلدى مەكەندەرى، سول سياقتى وڭتۇستىك-شىعىس ەلدى مەكەنىنىڭ وڭ جانە سول جاق بولىكتەرى، ينتەرناتسيونالنىي، سونداي-اق اقبيداي، قازاقاۋىل شاعىن اۋداندارى), سارايشىق اۋدانى (كۇيگەنجار جانە ميچۋرينو ەلدى مەكەندەرى), ەسىل اۋدانى (ۆەللا ۆيللادج كوتتەدج قالاشىعى، كۋرشاۆەل ت/ك، فەمەلي تاۋن، فەمەلي پارك ت/ك) جانە نۇرا اۋدانى (بۋداپەشت، كوسميك سيتي تۇرعىن ءۇي كەشەندەرى).

سونداي-اق، «تۇران»، «تەلمان»، «وڭتۇستىك-شىعىس» گاز جىلۋ ستانتسيالارىنا جانە ۇركەر، پريگورودنىي، Family Village, ءوندىرىس، كيرپيچنىي ەلدى مەكەندەرىنە گاز جەتكىزۋ جەلىلەرىنىڭ قۇرىلىسى اياقتالدى.