نۇرسۇلتان نازارباەۆ حالىقارالىق اۋەجايىنىڭ كۇتۋ زالىندا ەسىرتكىنىڭ تارالۋى مەن قولدانىلۋى ماسەلەسىنە قوعام نازارىن اۋدارۋعا ارنالعان ارنايى تاقىرىپتاعى فوتوكورمە ءوتتى، دەپ حابارلايدى استانا اكىمدىگىنىڭ رەسمي سايتى.

جوبانى قالالىق ىشكى ساياسات باسقارماسى مەن استانا قالاسىنىڭ پوليتسيا دەپارتامەنتى بىرلەسىپ ۇيىمداستىردى. وعان «استانا جاستارى» جاستار رەسۋرستىق ورتالىعىنىڭ ەرىكتىلەرى مەن كولىكتەگى پوليتسيا دەپارتامەنتىنىڭ وكىلدەرى دە قاتىستى.

اۋەجاي كەڭىستىگىندە كۇن سايىن مىڭداعان جولاۋشى مەن ولاردى شىعارىپ سالۋشىلار باس قوسادى. بۇل كورمە ارقىلى كەڭ اۋديتوريانى قامتۋعا مۇمكىندىك بەردى. ەكسپوزيتسيا قاراما-قايشىلىق پەن ەموتسيالىق اسەرگە نەگىزدەلگەن. كورمەگە الەمگە تانىمال فوتوگرافتاردىڭ تەرەڭ ماعىنالى تۋىندىلارى مەن ەلوردالىق پوليتسەيلەردىڭ قىلمىسكەرلەردى ۇستاۋ كەزىندە تۇسىرگەن شىنايى كادرلارى قويىلعان.

فوتوكورمەنىڭ نەگىزگى ماقساتى – تىيىم سالىنعان زاتتاردىڭ زاڭسىز اينالىمىنا ارالاسۋدىڭ قۇقىقتىق جانە الەۋمەتتىك زارداپتارىن ناقتى مىسالدار ارقىلى كورسەتۋ.

ءار فوتوسۋرەت زاڭ بۇزعان ادامنىڭ جاۋاپكەرشىلىككە تارتىلاتىنىن جانە ويلانباي جاسالعان ءار ارەكەتتىڭ اۋىر سالدارعا اكەلۋى مۇمكىن ەكەنىن اڭعارتادى.

ۇيىمداستىرۋشىلار جاستاردىڭ قاۋىپسىزدىگىنە، ءوز دەنساۋلىعىنا جاۋاپكەرشىلىكپەن قاراۋىنا جانە ازاماتتاردى زاڭسىز ارەكەتتەرگە تارتۋدىڭ الدىن الۋعا باسا نازار اۋداردى. ءىس-شارا «استانا – ەسىرتكىسىز قالا» جوباسى جانە «زاڭ مەن ءتارتىپ» تۇجىرىمداماسى اياسىندا ءوتتى.

«قازىر ەسىرتكى قىلمىسى قوعامعا تونگەن وزەكتى قاۋىپتەردىڭ ءبىرى بولىپ وتىر. جىل باسىنان بەرى ەلوردادا ەسىرتكىگە بايلانىستى 800-دەن استام قۇقىق بۇزۋشىلىق انىقتالىپ، زاڭسىز اينالىمعا قاتىستى 300-دەن استام قىلمىستىق ءىس قوزعالدى. زاڭسىز اينالىمنان 495 كەلىدەن استام ءتۇرلى ەسىرتكى زاتى تاركىلەندى. ونىڭ ىشىندە 50 كەلىسى – سينتەتيكالىق ەسىرتكى»، – دەدى استانا قالاسى پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسى پروفيلاكتيكا ءبولىمىنىڭ باستىعى، پوليتسيا پودپولكوۆنيگى ءاليا قيباتقىزى.

ءىس-شارا قوعامداعى قاۋىپسىزدىك پەن ءتارتىپتى ساقتاۋ ءار ادامنىڭ جەكە جاۋاپكەرشىلىگىنەن باستالاتىنىن تاعى ءبىر مارتە كورسەتتى.