استانا قالاسىنداعى №114 مەكتەپتە «مەكتەپ كۇرەس ليگاسى» جوباسى اياسىندا كۇرەس سپورتىنا ارنالعان ارنايى جابدىقتاردى تاپسىرۋ ءراسىمى ءوتتى. جوبا مەكتەپ سپورتىن دامىتۋ ماقساتىندا تۋريزم جانە سپورت مينيسترلىگى، وقۋ-اعارتۋ مينيسترلىگى جانە قازاقستان كۇرەس فەدەراتسياسىنىڭ بىرلەسكەن باستاماسىمەن جۇزەگە اسىرىلىپ جاتىر.
ءىس-شاراعا تۋريزم جانە سپورت ءمينيسترى ەربول مىرزابوسىنوۆ، وقۋ-اعارتۋ ءمينيسترى جۇلدىز سۇلەيمەنوۆا، قازاقستان كۇرەس فەدەراتسياسىنىڭ پرەزيدەنتى ەركىن وقاسوۆ جانە سپورت سالاسىنىڭ وكىلدەرى قاتىستى.
مەكتەپتەردىڭ سپورت زالدارىن كۇرەسكە قاجەتتى ارنايى جابدىقتارمەن قامتاماسىز ەتۋ ەلدەگى كۇرەس سپورتىن دامىتۋعا، سونداي-اق جاسوسپىرىمدەردىڭ سپورتپەن تۇراقتى تۇردە اينالىسۋىنا مۇمكىندىك بەرەدى. سونىمەن قاتار جوبا ءبىلىم بەرۋ ۇيىمدارىندا كۇرەسپەن شۇعىلدانۋعا قولايلى ورتا قالىپتاستىرۋعا باعىتتالعان. وسى باستاما اياسىندا №114 مەكتەپكە ستاتسيونارلىق كۇرەس كىلەمى تابىستالدى.
«مەملەكەت باسشىسى بۇقارالىق سپورتتى دامىتۋعا، بالالار مەن جاسوسپىرىمدەردىڭ سپورتپەن جۇيەلى تۇردە اينالىسۋىنا ەرەكشە كوڭىل ءبولىپ كەلەدى. وسى مىندەتتەردى ىسكە اسىرۋ اياسىندا ءبىلىم بەرۋ ۇيىمدارىندا ۇلتتىق جانە وليمپيادالىق سپورت تۇرلەرىن كەڭىنەن ناسيحاتتاۋ جۇمىستارى جۇرگىزىلۋدە. كۇرەس – حالقىمىزدىڭ رۋحىمەن بىتە قايناسقان، باتىلدىق پەن تاباندىلىققا تاربيەلەيتىن سپورت ءتۇرى. بۇگىن مەكتەپكە تابىستالىپ وتىرعان كۇرەس كىلەمى وقۋشىلاردىڭ سپورتپەن تۇراقتى اينالىسۋىنا، شەبەرلىكتەرىن شىڭداۋىنا جانە بولاشاق چەمپيونداردىڭ قالىپتاسۋىنا ءوز ۇلەسىن قوسادى دەپ سەنەمىن»، – دەپ اتاپ ءوتتى ەربول مىرزابوسىنوۆ.
سونداي-اق ءىس-شارا بارىسىندا ۇشجاقتى ىنتىماقتاستىق تۋرالى مەموراندۋمعا قول قويىلدى.
مەموراندۋم اياسىندا بىرىككەن كۇرەس الەمى (United World Wrestling) ۇيىمىنىڭ قولداۋىمەن «وليمپيادالىق ىنتىماقتاستىق» باعدارلاماسىن ىسكە اسىرۋ، ەرەكشە ءبىلىم بەرۋ قاجەتتىلىگى بار بالالار اراسىندا گرەك-ريم، ەركىن جانە ايەلدەر كۇرەسىن دامىتۋ، سونداي-اق سەمينارلار مەن بىلىكتىلىكتى ارتتىرۋ كۋرستارىن ۇيىمداستىرۋ كوزدەلگەن.
جوبانىڭ نەگىزگى ماقساتى – وقۋشىلار اراسىندا بۇقارالىق سپورتتى دامىتۋ، كۇرەس تۇرلەرىن بارىنشا قولجەتىمدى ەتۋ جانە بولاشاق جاس سپورتشىلاردى دايارلاۋعا قولايلى جاعداي قالىپتاستىرۋ.
