2025 جىلدىڭ باسىنان بەرى جالپى 329 راستالعان جاعداي تىركەلدى، قايتىس بولۋ جاعدايلارى تىركەلگەن جوق. وتكەن جىلدىڭ وسىنداي كەزەڭىمەن سالىستىرعاندا سىرقاتتانۋشىلىق 3,7 ەسەگە ازايعان. رەسپۋبليكا بويىنشا اپتاسىنا 25 جاعدايعا دەيىن تىركەلۋدە.

ينفەكتسيالىق توسەكتەردىڭ جۇكتەمەسى – 27%، رەانيماتسيالىق توسەك-ورىندار – 2%، سونداي-اق ستاتسيونارلاردا كوروناۆيرۋس ينفەكتسياسىمەن 2 ناۋقاس ەم قابىلداۋدا، جاعدايى – ورتاشا اۋىرلىقتا.

الەمدەگى جاعداي سياقتى، قازاقستاندا دا 2022 جىلى العاش انىقتالعان وميكرون نۇسقاسىنىڭ شتامدارى اينالىمدا ءجۇر.

وميكرون نۇسقاسى 30-دان استام مۋتاتسيانى قامتيدى جانە اۋرۋدىڭ جەڭىل وتۋىمەن سيپاتتالادى، سوندىقتان ستاتسيونارلىق ەمدەۋدى قاجەت ەتپەيدى. اۋرۋدىڭ نەگىزگى سيمپتومدارى – جوعارعى تىنىس جولدارىنىڭ زاقىمدانۋى، مۇرىننىڭ بىتەلۋى، تاماقتىڭ اۋىرۋى، جوتەل.

باسقا ەلدەردە سىرقاتتانۋشىلىقتىڭ ءوسۋىن ەسكەرە وتىرىپ، دەنساۋلىق ساقتاۋ مينيسترلىگى كەلەسىلەردى ۇسىنادى:

• ءجىتى رەسپيراتورلىق ينفەكتسيامەن اۋىراتىن ادامدارمەن تىعىز قارىم-قاتىناستان اۋلاق بولۋ;

• قولدى، اسىرەسە ناۋقاس نەمەسە ولاردىڭ اينالاسىنداعى ادامدارمەن تىكەلەي بايلانىستان كەيىن ءجيى جۋ;

• ءۇي-جايلاردى تۇراقتى تۇردە جەلدەتۋ;

• اۋرۋ سيمپتومدارى بايقالعان جاعدايدا مەديتسينالىق كومەككە جۇگىنۋ.

دەنساۋلىق ساقتاۋ مينيسترلىگى