باس كولىك پروكۋراتۋراسى كاسىپكەرلىك سۋبەكتىلەرىنىڭ قۇقىقتارىنا نۇقسان كەلتىرەتىن زاڭ بۇزۋشىلىقتاردى انىقتاعان، دەپ حابارلايدى Ras.kz پورتالى باس كولىك پروكۋراتۋراسى تاراتقان اقپاراتقا سىلتەمە جاساي وتىرىپ. رەسمي مالەمىتتەرگە قاراساق، وتكەن جىلدان باستاپ قورشاعان ورتاعا تەرىس اسەر ەتكەنى ءۇشىن تولەنەتىن مىندەتتەمەلەر وزگەرتىلىپ، كەي ەكولوگيالىق تولەمدەر الىنىپ تاستالعان.

وسىعان قاراماستان، بۇل ءمان-جايلاردى بىلمەي، كاسىپكەرلەر ءتيىستى تولەمدەردى جۇرگىزۋدى جالعاستىردى، ال سالىق ورگاندارى ولاردىڭ نەگىزسىز شىعىندارىن بولدىرماۋ ماقساتىندا ءتيىستى ءتۇسىندىرۋ جۇمىستارىن جۇرگىزبەگەن.

مىسالى، وسىنداي تولەمدەردى تولەۋشىلەر ساناتىنا كىرمەيتىن «№3 Sk اۆتوۆوكزال پاركى» جشس مەملەكەتتىك بيۋدجەتكە 15 ملن استام تەڭگە تولەگەن.

سول سياقتى باسقا 2 203 كاسىپكەر دە بيۋدجەتكە نەگىزسىز 2,4 ملرد تەڭگەدەن جوعارى قاراجاتتى اۋدارعان.

كولىك پروكۋراتۋراسى ورگاندارىنىڭ ارالاسۋىنان كەيىن عانا، كاسىپكەرلەرگە ولاردى وسىنداي الىمداردى تولەۋشىلەر تىزىمىنەن الىپ تاستاعاندىعى تۋرالى جەتكىزىلدى.

سونىمەن قاتار، كولىك پروكۋراتۋراسىنىڭ اكتىسى بويىنشا كاسىپكەرلەرگە اقشالاي قاراجاتتى قايتارۋ بويىنشا جۇمىس باستالعان، 500 ارتىق كاسىپكەرگە شامامەن 30 ملن تەڭگە قايتارىلدى.

مەملەكەتتىك كىرىستەر كوميتەتىنە سالىق زاڭناماسىنداعى وزگەرىستەر تۋرالى اقپاراتتى بيزنەس قاۋىمداستىققا ءتيىمدى جەتكىزۋ جونىندەگى شارالاردى ازىرلەي وتىرىپ، وسىنداي جاعدايدىڭ تۋىنداۋ سەبەپتەرىن تالداۋ تاپسىرىلدى، - دەپ حابارلايدى باس كولىك پروكۋراتۋراسىندا جاريالانعان رەسمي حابارلامادا.