كاسىپكەرلىك قىزمەتتى ىنتالاندىرۋ جانە بيزنەستىڭ قارجى رەسۋرستارىنا قولجەتىمدىلىگىن قامتاماسىز ەتۋ ماقساتىندا قر ۇلتتىق ەكونوميكا مينيسترلىگى مەن «بايتەرەك» حولدينگىنىڭ ەنشىلەس ۇيىمى «دامۋ» كاسىپكەرلىكتى دامىتۋ قورى 2025 جىلدىڭ العاشقى بەس ايىندا جالپى سوماسى 755,9 ملرد تەڭگەگە 6 114 جوباعا قولداۋ كورسەتتى.
اعىمداعى جىلدىڭ ءساۋىر ايىنان باستاپ «دامۋ» قورى بازاسىندا كەپىلدىك بەرۋ قورلارىنىڭ جۇمىسى باستالدى. ءبىرىنشى قور – 7 ملرد تەڭگەگە دەيىنگى جوبالاردى، ەكىنشى قور – 7 ملرد تەڭگەدەن اساتىن ءىرى ينفراقۇرىلىمدىق جوبالاردى قولداۋعا باعىتتالعان. قازىرگى تاڭدا 9 بانكپەن كەلىسىمدەر جاسالعان.
كەپىلدىك بەرۋ قورى ىسكە قوسىلعاننان بەرى 66,5 ملرد تەڭگە كولەمىندەگى نەسيەلەر بويىنشا 543 جوباعا قولداۋ كورسەتىلدى. ونىڭ ىشىندە 35,4 ملرد تەڭگە بەرىلگەن كەپىلدىكتەردىڭ كولەمى.
بەكىتىلگەن جوبالاردىڭ 70%-دان استامى ينۆەستيتسيالىق ماقساتتارعا باعىتتالعان: جاڭا وندىرىستەردى ىسكە قوسۋ، جابدىق ساتىپ الۋ جانە قۇرىلىس.
وڭدەۋ ونەركاسىبى بارلىق بەرىلگەن قارىزداردىڭ شامامەن 33%-ىن قۇراپ وتىر. سونداي-اق، كولىك-لوگيستيكا، دەنساۋلىق ساقتاۋ جانە ءبىلىم بەرۋ سالالارىندا دا جوعارى سۇرانىس بايقالدى.
جالپى العاندا، كەپىلدىك بەرۋ قۇرالى اياسىندا 2025 جىلدىڭ بەس ايىندا «دامۋ» قورى 2 470 جوبانى قولدادى. بۇل جوبالار بويىنشا نەسيە كولەمى 325,1 ملرد تەڭگە، ال ۇسىنىلعان كەپىلدىكتەردىڭ جالپى سوماسى 225,8 ملرد تەڭگەنى قۇرادى.
مەملەكەت پايىزدىق مولشەرلەمەنى سۋبسيديالاۋ تەتىگىنەن جەڭىلدەتىلگەن نەسيەلەۋگە كەزەڭ-كەزەڭىمەن كوشۋدە. 2025 جىلى وسى باعىتقا بولىنەتىن قارجى كولەمى 750 ملرد تەڭگەگە دەيىن ۇلعايتىلدى، بۇل وتكەن جىلمەن سالىستىرعاندا شامامەن ءۇش ەسە كوپ.
اتالعان باعىت اياسىندا جاڭا «ورلەۋ» جەڭىلدەتىلگەن نەسيەلەۋ باعدارلاماسى ىسكە قوسىلدى. باعدارلاما بويىنشا كاسىپكەرلەر ءۇشىن سىياقى مولشەرلەمەسى جىلدىق 12,6%-دان اسپايدى. «ورلەۋ» باعدارلاماسىنا قاتىسۋ ءۇشىن كاسىپكەرلەر بانكتەرگە تىكەلەي جۇگىنۋى قاجەت (قازىرگى كەزەڭدە بۇل — Freedom Bank, بانك تسەنتركرەديت جانە Halyk Bank).
2025 جىلدىڭ بەس ايىندا قولدانىستاعى جەڭىلدەتىلگەن نەسيەلەۋ باعدارلامالارى اياسىندا 873 جوبا جالپى سوماسى 73,6 ملرد تەڭگەگە قارجىلاندىرىلدى.
سونىمەن قاتار، سىياقى مولشەرلەمەسىنىڭ ءبىر بولىگىن سۋبسيديالاۋ قۇرالى بويىنشا 2 228 جوبا قولداۋ تاۋىپ، جالپى 290,7 ملرد تەڭگە كولەمىندە نەسيە بەرىلدى.
جوبالاردىڭ سانى مەن نەسيە كولەمى بويىنشا ەڭ كوپ قولداۋ كورسەتىلگەن سالالار - اۋىل شارۋاشىلىعى، وڭدەۋ ونەركاسىبى جانە ساۋدا.
