اقمولا وبلىسىنىڭ بۋراباي اۋدانىندا كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ «Shabyt Fantasy» شىعارماشىلىق ءۇيى اشىلدى. كەشەن بالالار مەن جاسوسپىرىمدەردىڭ شىعارماشىلىق قابىلەتىن دامىتۋعا جانە ساۋىقتىرۋ دەمالىسىنا باعىتتالعان.

ءىس-شارانىڭ اشىلۋى راسىمىنە قر مادەنيەت جانە اقپارات ۆيتسە-ءمينيسترى ايبەك سىدىقوۆ، «قازاقستان حالقىنا» قوعامدىق قورى باسقارماسىنىڭ توراعاسى ءلاززات شىڭعىسباەۆا، ۋنيۆەرسيتەت رەكتورى عالىم احمەدياروۆ، شىعارماشىلىق قاۋىم وكىلدەرى، وقىتۋشىلار مەن ستۋدەنتتەر قاتىستى.

ايبەك سىدىقوۆ ءوز سوزىندە جاس ۇرپاقتىڭ تالانتىن تانىپ، قابىلەتىن شىڭداۋعا قولايلى جاعداي جاساۋدىڭ ماڭىزى تۋرالى ايتتى.

«مەملەكەت باسشىسى ءوز جولداۋىندا وسكەلەڭ ۇرپاقتىڭ جان-جاقتى دامۋىنا جاعداي جاساۋ، دارىندى بالالاردىڭ قابىلەتىن شىڭداۋ جانە ولاردىڭ شىعارماشىلىق الەۋەتىن قولداۋدىڭ ماڭىزدىلىعىن اتاپ وتكەن. ءار بالانىڭ بويىنداعى تالانتتى دەر كەزىندە تانىپ، ونى شىڭداۋعا جاعداي جاساۋ – بارىمىزگە ورتاق مىندەت. «Shabyt Fantasy» وسى ماقساتقا قىزمەت ەتىپ، جاس ورەندەردىڭ ارمان-تالابىن قولدايتىن، ونەرگە دەگەن قۇشتارلىعىن ارتتىراتىن ورتاعا اينالادى دەپ سەنەمىن»، – دەدى ۆيتسە-مينيستر.

كوپشىلىك سالتاناتتى اشىلۋ ءراسىمى بارىسىندا كەشەننىڭ تىنىس-تىرشىلىگىمەن تانىستى. سونداي-اق ستانوكتى كەسكىندەمە مەن ستسەنوگرافيا بويىنشا «قيال سامعاۋ» شەبەرلىك ساباعى ءوتتى. ۋنيۆەرسيتەتتىڭ جاس ورىنداۋشىلارى مەن شىعارماشىلىق ۇجىمدارىنىڭ قاتىسۋىمەن كونتسەرت ءوتتى.

شىعارماشىلىق ءۇيى قاتاركول كولىنىڭ ماڭىندا ورنالاسقان. جالپى اۋماعى 4,7 مىڭ شارشى مەتردەن اساتىن كەشەنگە 91 بولمەلى ءتورت تۇرعىن كورپۋس جانە ەكى قاباتتى كلۋب-اسحانا عيماراتى كىرەدى. كەشەن ءبىر مەزگىلدە 305 ادامدى قابىلداي الادى. «قازاقستان حالقىنا» قورىنىڭ قولداۋىمەن كەشەن اۋماعىندا سپورت الاڭدارى سالىندى.

شىعارماشىلىق ءۇيى جىل بويى جۇمىس ىستەيدى. مۇندا شەبەرلىك ساباقتارى، دايىندىق جۇمىستارى، وقۋ-جاتتىعۋ جيىندارى، كونتسەرتتەر، بايقاۋلار، فەستيۆالدەر مەن وقۋ كۋرستارىن وتكىزۋ جوسپارلانعان.

قر مادەنيەت جانە اقپارات مينيسترلىگىنىڭ ءباسپاسوز قىزمەتى