قازاقستان سپورتتىق اتۋ فەدەراتسياسىنىڭ توراعاسى بەرىك اسىلوۆ جاپونيادا ءوتىپ جاتقان ازيا پارا ويىندارىندا التىن مەدال جەڭىپ العان قازاقستاندىق سپورتشى ەركىن عابباسوۆتى قۇتتىقتادى.
پنەۆماتيكالىق ۆينتوۆكادان 10 مەتر قاشىقتىققا اتۋ سايىسىندا ەركىن 249,1 ۇپاي جيناپ، جارىستىڭ جاڭا رەكوردىن ورناتتى جانە وڭتۇستىك كورەيانىڭ مىقتى قارسىلاستارىن باسىپ وزدى.
بۇل جەڭىس قازاقستان قورجىنىنا التىن مەدال عانا ەمەس، 2028 جىلى لوس-اندجەلەستە وتەتىن پاراليمپيادا ويىندارىنا دا جولداما اكەلدى.
بەرىك اسىلوۆ چەمپيوندى جوعارى جەتىستىگىمەن قۇتتىقتاپ، حالىقارالىق ارەنادا ەل نامىسىن ابىرويمەن قورعاعانى ءۇشىن العىس ءبىلدىردى. سونداي-اق سپورتشىلاردىڭ ساپالى دايىندالۋىنا قاجەتتى جاعداي جاساۋ، ونىڭ ىشىندە ولاردى ەڭ زاماناۋي سپورتتىق قۇرال-جابدىقتارمەن قامتاماسىز ەتۋدىڭ ماڭىزدىلىعىن اتاپ ءوتتى.
اڭگىمە بارىسىندا ەركىن عابباسوۆ فەدەراتسيا باسشىسىنا تۇراقتى كوڭىل ءبولىپ، قولداۋ كورسەتىپ كەلە جاتقانى ءۇشىن ريزاشىلىعىن ءبىلدىردى. سپورتشى اسىرەسە بەرىك اسىلوۆ بيىلعى تامىز ايىندا چەمپيوناتقا دايىندىق قارساڭىندا تابىستاعان WALTHER LG500 ITEC BTE كاسىبي پنەۆماتيكالىق ۆينتوۆكاسىن ەرەكشە اتاپ ءوتتى.
زاماناۋي سپورتتىق قارۋ جاتتىعۋ ۇدەرىسىندە جانە جاۋاپتى حالىقارالىق جارىستارعا دايىندىق بارىسىندا ماڭىزدى قولداۋ بولدى.
ايتا كەتەيىك، ەركىن عابباسوۆ بۇعان دەيىن پاراليمپيادا ويىندارىنىڭ كۇمىس جۇلدەگەرى اتانعان. ال قازىرگى التىن مەدال مەن جاڭا رەكورد ونىڭ جوعارى شەبەرلىگىنىڭ، تاباندىلىعى مەن ماقساتكەرلىگىنىڭ كەزەكتى دالەلى بولدى.
ەركىن عابباسوۆتى، ونىڭ جاتتىقتىرۋشىلارىن جانە ۇلتتىق قۇراما مۇشەلەرىن لايىقتى جەڭىسىمەن قۇتتىقتايمىز!
باس پروكۋراتۋرانىڭ ءباسپاسوز قىزمەتى