جوبانىڭ ماقساتى – ۇلى جەڭىسكە ولشەۋسىز ۇلەس قوسقان قازاقستاندىقتاردىڭ ەرلىگى مەن جانكەشتىلىگى تۋرالى بولاشاق ۇرپاققا قۇندى اقپاراتتاردى جەتكىزۋ.

پورتالدا كەڭ كولەمدى مالىمەتتەر بازاسى بار. سايتتا قازىردىڭ وزىندە 677 مىڭنان استام سوعىس ارداگەرى، ونىڭ ىشىندە 365 كەڭەس وداعىنىڭ باتىرى، 4 ەكى مارتە كەڭەس وداعىنىڭ باتىرى جانە 19 «داڭق» وردەنىنىڭ كاۆالەرى تۋرالى اقپارات جيناقتالعان. ينتەرفەيس قاجەتتى اقپاراتتى تابۋعا عانا ەمەس، سونىمەن قاتار ءوز ارداگەر تۋىستارى تۋرالى دەرەكتەردى قوسۋعا، جاڭالىقتارمەن تانىسۋعا مۇمكىندىك بەرەدى. وسىلايشا، بۇل پورتال تاريحتى بولاشاق ۇرپاق ءۇشىن ساقتاپ، باتىرلارعا تاعزىم ەتىپ، قۇرمەت كورسەتۋگە ارنالعان پلاتفورما قىزمەتىن اتقارادى.

ونلاين-پورتالدى پايدالانۋشىلار:

- سايتقا ءوز تۋىسىنىڭ تاريحىن قوسا الادى: ءار ادامنىڭ سوعىسقا قاتىسقان جاقىندارى تۋرالى ەستەلىكتەرىن بولىسۋگە مۇمكىندىگى بار.

- فوتوسۋرەتتەردى جۇكتەي الادى: ءار قولدانۋشى ارداگەر تۋىسىنىڭ سۋرەتتەرىن ۆەب-پورتالعا جۇكتەپ، ونىڭ جارقىن بەينەسىن ماڭگىلىككە امانات ەتۋگە مۇمكىندىگى بار.

- ارداگەرلەردىڭ جاڭا مالىمەتتەرىن قوسا الادى: ۆەب-پورتالدىڭ دەرەكقورىندا جوق ارداگەرلەردىڭ مالىمەتتەرىن وڭاي ەنگىزۋگە بولادى.

- باتىرلار گالەرەياسىن كورە الادى: سايتتا قازىردىڭ وزىندە كوپتەگەن باتىرلاردىڭ ءومىرباياندارى جازىلعان گالەرەيا بار، كەز كەلگەن قولدانۋشى بۇل بولىمنەن ولاردىڭ ءومىرى مەن جاساعان ەرلىكتەرى تۋرالى كوبىرەك اقپارات الادى.

- جاڭالىقتار ۇنەمى جاڭارىپ وتىرادى: ۆەب-پورتالدا ارداگەرلەرگە جانە جوباعا قاتىستى جاڭالىقتار مەن وقيعالار تۇراقتى تۇردە جاريالانىپ تۇرادى.

ايتا كەتەيىك، جەڭىستىڭ 80 جىلدىعىنا وراي رەسپۋبليكا بويىنشا 200-دەن استام ءىس-شارا ۇيىمداستىرىلادى.

مينيسترلىكتىڭ ءباسپاسوز قىزمەتى