قۇرىلىس جۇمىستارى بيىل ناۋرىز ايىندا باستالعان. قازىر جوبانىڭ ءبىرىنشى كەزەڭى اياقتالدى.

جاڭا پوليگون سالۋعا باستى سەبەپ — قازىرگى پوليگوننىڭ اۋەجايعا تىم جاقىن ورنالاسۋى. جاڭا نىسان قالانىڭ باس جوسپارىمەن سايكەس، اۋەجايدان 15 شاقىرىم جەردە بوي كوتەرۋدە.

– بىزگە جەكە ينۆەستور كەلدى، وعان جەر تەلىمى ءبولىندى. پوليگون ىسكە قوسىلعاننان كەيىن بۇرىنعى مەردىگەرمەن جۇمىس ىستەپ، ەسكى نىساندى قالپىنا كەلتىرۋگە كىرىسەمىز، – دەدى بالقاش قالاسىنىڭ اكىمى ساپار ساتاەۆ.

پوليگون 40 جىلعا ەسەپتەلگەن. قۇرىلىس جۇمىستارى ەكولوگيالىق ستاندارتتارعا ساي جۇرگىزىلۋدە. تەرەڭدىگى — 4 مەتر، ءۇش قاباتتى گيدرووقشاۋلاۋمەن قامتاماسىز ەتىلگەن.

ينۆەستور جىلىنا 13 مىڭ توننا تۇرمىستىق قاتتى قالدىقتى سۇرىپتاپ، قايتا وڭدەۋدى جوسپارلاپ وتىر. بولاشاقتا قوقىس وڭدەيتىن زاۋىت سالۋ مۇمكىندىگى دە قاراستىرىلۋدا.

ءباسپاسوز قىزمەتى