وعان قر پرەمەر-ءمينيسترىنىڭ ءبىرىنشى ورىنباسارى رومان سكليار، تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ، وبلىس اكىمى نۇرلىبەك نالىباەۆ، «روسكوسموس» مك باس ديرەكتورى دميتري باكانوۆ، زيالى قاۋىم وكىلدەرى، ەڭبەك ارداگەرلەرى مەن قالا تۇرعىندارى قاتىستى.
شارا بايقوڭىر كەشەنىندەگى 14 ۇيىم مەن مەكەمە ۇجىمدارىنىڭ شەرۋىمەن باستالدى. ودان كەيىن ەكى ەلدىڭ مەملەكەتتىك گيمندەرى ورىندالىپ، قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ پەن رەسەي پرەزيدەنتى ۆلاديمير ءپۋتيننىڭ بەينەقۇتتىقتاۋلارى كورسەتىلدى.
قر پرەمەر-ءمينيسترىنىڭ ءبىرىنشى ورىنباسارى ر.ۆ.سكليار بايقوڭىر – عارىشقا جول اشقان مەكەن، مەرەيتوي قازاقستان مەن رەسەي اراسىنداعى دوستىق پەن ىنتىماقتاستىقتىڭ، عىلىم مەن تەحنيكانىڭ جەتىستىكتەرىنىڭ جارقىن كورىنىسى ەكەنىن ايتتى.
مەرەكەلىك شارادا قالا اكىمشىلىگىنىڭ باسشىسى كونستانتين بۋسىگين جينالعان جۇرتشىلىقتى قۇتتىقتادى. سونداي-اق، حالىقارالىق عارىش ستانتسياسىنىڭ 73-ەكسپەديتسيا مۇشەلەرى – عارىشكەرلەردىڭ ارنايى بەينەقۇتتىقتاۋى ۇسىنىلدى.
مەرەكەدە قوعامدىق-ساياسي جانە الەۋمەتتىك-ەكونوميكالىق سالالارداعى ەرەن ەڭبەگى ءۇشىن باۋىرجان مومىشۇلى اتىنداعى ءىى دارەجەلى «ايبىن» وردەنىمەن قر ءىىم-ءنىڭ بايقوڭىر قالاسىنداعى وكىلدىگى باستىعىنىڭ ورىنباسارى ەرمەك يسكاكوۆ، ءىى دارەجەلى «دوستىق» وردەنىمەن بايقوڭىر قالاسى اكىمشىلىگى باسشىسىنىڭ ورىنباسارى نيكولاي اداسەۆ، «قۇرمەت» وردەنىمەن دارىگەر قاراساي نۇروۆ، اكىمشىلىك قىزمەتكەرى سكەندىر جارەكەسوۆ، مادەنيەت سارايىنىڭ كوركەمدىك جەتەكشىسى عاليا جالعاسباەۆا، «ەرەن ەڭبەگى ءۇشىن» مەدالىمەن وبلىس اكىمى اپپاراتىنىڭ ءبولىم باسشىسى جان شايحىسلاموۆ، «بايقوڭىرەنەرگو» كاسىپورنى باس ينجەنەرىنىڭ ورىنباسارى عالىمجان جۇماباەۆ،
"شاپاعات" مەدالىمەن انالار كەڭەسىنىڭ ءتورايىمى كەنىشكۇل ەسششانوۆا ماراپاتتالدى.
سونداي-اق، بىرنەشە ادام «بايقوڭىر قالاسىنىڭ قۇرمەتتى ازاماتى» اتاعىنا يە بولدى.
كەش وتاندىق ەسترادا جۇلدىزدارىنىڭ قاتىسۋىمەن وتكەن كونتسەرتپەن جالعاسىپ، وتشاشۋمەن اياقتالدى.
