ونەر دوداسىنا ماڭعىستاۋ وبلىسى اكىمىنىڭ ورىنباسارى تىلەگەن ابىشەۆ، «AMANAT» پارتياسى ورتالىق اپپاراتى ساياسي جۇمىس دەپارتامەنتىنىڭ ديرەكتورى ەركەبۇلان جاۋلىباەۆ، جاڭاوزەن قالاسىنىڭ اكىمى جانسەيىت قاينارباەۆ، «AMANAT» پارتياسى ماڭعىستاۋ وبلىستىق فيليالىنىڭ توراعاسى نۇربەك قاراساەۆ جانە قالا تۇرعىندارى قاتىستى.

ايتىستا الماتى، قاراعاندى، اقتوبە، اتىراۋ، قىزىلوردا، جەتىسۋ، ۇلىتاۋ، شىعىس قازاقستان جانە ماڭعىستاۋ وبلىستارىنان كەلگەن 12 اقىن باق سىنادى.

ءدۇبىرلى دودانى ءماجىلىس دەپۋتاتى، «AMANAT» پارتياسى فراكتسياسىنىڭ مۇشەسى امانجول ءالتاي تىزگىندەدى. ول ءوز سوزىندە جىر دوداسىنىڭ ءمانى مەن ماڭىزىنا توقتالدى.

«تامىرلى تاريحىمىزدا وشپەس ءىز قالدىرعان، اۋليەلىكتىڭ شىڭىنا جەتكەن، حيۋادا ءىلىم الىپ، عۇلامالارعا شاكىرت بولىپ، اتا ءدىنىمىزدىڭ ايقىن باعىتىن بەلگىلەپ بەرگەن ۇلى دالا اۋليەلەرىنىڭ ءبىرى دە بىرەگەيى – بەكەت اتا. تۇركىستاندا – قوجا احمەت، ماڭعىستاۋدا – ەر بەكەت، بايانتاۋدا – ماشەكەڭ. وسى اۋليەلەرىمىز ەل دامۋىنا ولشەۋسىز ۇلەس قوستى. بۇگىن ءدۇبىرلى دودادا اقىندار بەكەت اتانىڭ بولمىسىن، اتا تاريحىمىزدا الار ورنىن، اۋليەلىك سيپاتىن جان جاقتى اشىپ، جىرلايدى»، – دەدى امانجول ءالتاي

ءسوز سايىسىندا اقىندار بەكەت اتا، قاشاعان، سۇگىر جىراۋ، دوسان، شوتان باتىر سىندى ماڭعاز ولكەنىڭ تۇعىرلى تۇلعالارىن جىرعا قوستى. سونىمەن قاتار، ولار ۇلتتىق قۇندىلىقتاردى ۇلىقتاۋ، ەل مۇددەسىن قورعاۋ، ءبىلىم-عىلىمعا جول اشۋ، تۋعان جەردى تۇلەتۋ ىسىنە ولشەۋسىز ۇلەس قوسقان ارداقتى ادامداردىڭ ىزگى امالىن جىرعا ارقاۋ ەتتى.

اقىندار ايتىسىنا قازاقستان ايتىس اقىندارى مەن جىرشى-تەرمەشىلەردىڭ حالىقارالىق وداعىنىڭ توراعاسى ءجۇرسىن ەرمان باستاعان، ءماجىلىس دەپۋتاتى، «AMANAT» پارتياسى فراكتسياسىنىڭ مۇشەسى جاناربەك ءاشىمجانوۆ، بەلگىلى اقىندار قالقامان سارين مەن مەلس قوسىمباەۆ قوستاعان قازىلار قۇرامى باعا بەردى.

ءوز كەزەگىندە، ماڭعىستاۋ وبلىسى اكىمىنىڭ ورىنباسارى تىلەگەن ابىشەۆ ءتول ونەرىمىزدى تورگە وزدىرعان اقىندارعا العىسىن ءبىلدىردى.

«ايتىس – دالا دەموكراتياسىنىڭ دارا شىڭى. ول عاسىرمەن قاناتتاسىپ، داۋىرمەن ۇندەسىپ، زامانمەن تىلدەسىپ بۇگىنگە جەتتى. وسى ورايدا، ۇرپاققا ۇران بولعان ءپىر بەكەتتىڭ 275 جىلدىعى اياسىندا وتكىزىلىپ وتىرعان رەسپۋبليكالىق ايتىستا سۇبەلى سوزىمەن، ورامدى ويىمەن كوزىقاراقتى كورەرمەننىڭ شىنايى ىقىلاسىنا بولەنگەن بارشا اقىنعا ايرىقشا العىس ايتامىن. يگى ىسكە مۇرىندىق بولعان بارشا ازاماتقا ريزاشىلىعىمدى بىلدىرەمىن»، – دەدى تىلەگەن ابىشەۆ.

ايتىس قورىتىندىسى بويىنشا، باس جۇلدەنى اباي جولماعامبەتوۆ (ماڭعىستاۋ وبلىسى) يەلەندى. ال 1-ورىندى مەيىربەك سۇلتانحان (قىزىلوردا وبلىسى) جەڭىپ الدى. بۇل رەتتە، 2-ورىنعا ديدار قامي (قاراعاندى وبلىسى) لايىق دەپ تانىلدى. جۇلدەلى 3-ورىندى مارات احمەتوۆ (اقتوبە وبلىسى) پەن ارعىنبەك قالباەۆ (ماڭعىستاۋ وبلىسى) ءوزارا ءبولىستى.

سونداي-اق ءومىرجان كوپبوسىن (استانا قالاسى) مەن اياۋلىم ديۋسەكەنوۆاعا (الماتى وبلىسى) ارنايى جۇلدە تابىستالدى. وزگە دە قاتىسۋشىلارعا سىي-سىياپاتتار جاسالدى.